1-3. (a) Yika twalilongesa mu mukanda wa Yishima 13:20? (b) Mumu liaka twatamba kusakula masepa jetu ni mana?

WAKUMONA chize mwana akutala yisemi jenyi? Chipwe muze kanda achiputuka kuhanjika, mwana kakumona yuma yeswe yize akutala ni yize akwivwa. Muze anayi ni kukola, iye kakweseka kwimbulula yisemi jenyi. Kashika, kutwatambile kukomoka, nyi makulwana hanji akweze waze alikata ni masepa api membulula yitanga yo yipi.

² Mukanda wa Yishima 13:20 unambe ngwo: “Nyi muwenda ni akwa mana ni yena nawa muopwa ni mana.” Liji ‘kwenda ni,’ linalumbunuka kupalikisa mashimbu ni mutu wacho. Linalumbunuka nawa yuma yinji hi wika ko kulikata ni mutu. Umwe mukwa kuhengwola Mbimbiliya kambile ngwenyi, kwenda ni mutu chinalumbunuka kumuzanga ni kulikwachilila hali mutu wacho. Kashika, twakwimbulula ndako ja atu waze twakulikata no, chipi-chipi nyi twakutwama no ha mashimbu anji.

³ Masepa jetu, mahasa kututwala mu jila yipi hanji yipema. Mukanda wa Yishima 13:20 unanungu ngwo:  “Alioze mweswe malikata ni yihepuke kumakevwa kusasaminya.” Liji lia Hepreu ‘kulikata ni’ linalumbunuka “kununga ni kulikata” ni mutu wacho, hanji kupwa sepa lienyi. (Yishima 22:24; Akwa Kuyula 14:20) Masepa waze akuzanga Zambi, matukolweza hanga tununge ni kushishika kuli iye. Tutalenu atu waze Yehova akusakula hanga apwe masepa jenyi. Chino muchitukwasa kupwa ni mana akusakula masepa.

4. Mumu liaka kupwa sepa lia Zambi chili chiwape chinene? Mumu liaka Yehova avulukile Apalahama ngwenyi “kasendo kami”?

⁴ Yehova, Sakatanga wa yuma yeswe, kakutwaha uhashi wa kupwa masepa jenyi. Kupwa sepa lia Yehova chili chiwape chinene. Alioze, Yehova kakusakula kanawa masepa jenyi. Yehova kakusakula atu waze akumuzanga ni kumufuliela. Tutalenu chilweza cha Apalahama. Iye te kakulinga yuma yeswe yize Zambi te akumutuma. Ha shimbu limwe, Apalahama kasolwele ufulielo wenyi ni kwononoka. Iye yatayiza kuhana mwanenyi Izake ngwe chitapo. Apalahama kafulielele ngwenyi, “Zambi mahasa kumuhindwisa, chipwe ha kachi ka afu.” (A-Hepreu 11:17-19; Uputukilo 22:1, 2, 9-13) Yehova kavulukile Apalahama ngwenyi, “kasendo kami,” mumu Apalahama te kakumufuliela ni kumwononokena.—Izaia 41:8; Tiangu 2:21-23.

5. Kuchi Yehova akwivwa hali waze akushishika kuli iye?

⁵ Yehova kakulemesa chinji masepa jenyi. Masepa jenyi kakushishika kuli iye kuhiana yuma yeswayo. (Tanga 2 Samuele 22:26.) Ayo kakushishika ni kumwononokena, mumu kakumuzanga. Mbimbiliya yinambe ngwo, Zambi “kakulikata ni mukwa ululi,” yoze  wa kumwononokena. (Yishima 3:32) Yehova kakutambika masepa jenyi hanga apwe ngeji jenyi alemu mu “mbalaka” yenyi. Iye kakwaatambika hanga amuwayile ni kulemba kuli iye ha shimbu lieswalio.—Samu 15:1-5.

6. Kuchi mutuhasa kusolola ngwetu, twakuzanga Yesu?

⁶ Yesu kambile ngwenyi: “Nyi kachi umwe manguzanga, mafunga liji liami. Mwe Tata makamuzanga.” (Yoano 14:23) Kashika, mba tupwe masepa ja Yehova, twatamba kuzanga Yesu ni kulinga yuma yize alongesele. Chakutalilaho, twakwononokena shimbi ja Yesu ja kwambujola sango jipema ni kutayisa tumbaji. (Mateu 28:19, 20; Yoano 14:15, 21) Twakuzanga Yesu, kashika twakukaula kanawa “ngano jenyi”. (1 Petulu 2:21) Yehova kakuwahilila chinji ha tachi jize twakusa hanga twimbulule Mwanenyi, ha yeswe yize twakulinga ni kwamba.

7. Mumu liaka chili chipema kulinga usepa ni atu waze ali masepa ja Yehova?

⁷ Masepa ja Yehova kashishika, kakwononoka nawa kakuzanga Mwanenyi. Shina twakusakula masepa ngwe chize Yehova akusakula? Nyi masepa je kakwimbulula Yesu nawa kakwambujola ni kulongesa hakutwala ku Wanangana wa Zambi, ayo mahasa kukukwasa kupwa mutu mupema, ni kununga ni kushishika kuli Yehova.

8. Yika yena wakuzanga chinji hakutwala ku usepa wa Rute ni Noemi?

⁸ Mu Mbimbiliya muli yilweza ya usepa upema, ngwe usepa wa Rute ni naye-weno Noemi. Mapwo wano kapwile a ku yifuchi yalisa ni ndako jalisa, nawa Noemi te mukulwana chinji kuhiana Rute. Alioze, ayo yapwa masepa  apema, mumu te kakuzanga Yehova. Muze Noemi azangile kukatuka mu chifuchi cha A-Moape hanga aye ku Izalele, “Rute yamukakaminya.” Iye yamba kuli Noemi ngwenyi: “Atu je kumapwa atu jami, Zambi ye kumapwa Zambi yami.” (Rute 1:14, 16) Rute yazanga chinji Noemi. Muze ahetele mu Izalele, Rute kakalakalile chinji hanga akwase sepa lienyi. Noemi te kakuzanga chinji Rute nawa kamuhele yiyulo yipema. Rute kapanjikile naye-weno, ha chino eswe aali yazuka yiwape yinji.—Rute 3:6.

9. Yika yakukukomwesa ha usepa wa Ndawichi ni Jonata?

⁹ Ndawichi ni Jonata kali chilweza chikwo cha masepa apema, mumu ayo te kakushishika kuli Yehova. Jonata te mukulwana wa Ndawichi ha miaka 30, nawa iye mwe te mahinga wanangana wa tato mu Izalele. (1 Samuele 17:33; 31:2; 2 Samuele 5:4) Alioze, chipwe muze Jonata anyingikine ngwenyi, Yehova hanasakula Ndawichi hanga apwe mwanangana, iye kakevwile ukwa hanji kulimika nenyi. Shimbu te alinge chino, Jonata yakwasa Ndawichi. Chakutalilaho, muze Ndawichi apwile mu ponde, Jonata kamukwashile “nikumutakamisa” hanga ajikijile muli Yehova. Iye nawa kasele mwono wenyi mu ponde hanga akwase Ndawichi. (1 Samuele 23:16, 17) Ndawichi neye kapwile umwe sepa washishika. Iye yalakenya kufunga usoko wa Jonata, nawa muze Jonata afwile Ndawichi yamanununa chilakenyo chenyi.—1 Samuele 18:1; 20:15-17, 30-34; 2 Samuele 9:1-7.

10. Yika walilongesa hakutwala ku chilweza cha usepa wa akweze wano atatu?

¹⁰ Shadrake, Meshake ni Abedenego kapwile akweze atatu a Hepreu waze apwile masepa apema, nawa kaachijile mu chifuchi cho muze te achili twanuke. Chipwe  ngwe, kapwile kusuku ni asoko jo, alioze ayo kalikolwezele umwe ni mukwo hanga anunge ni kushishika kuli Yehova. Muze te hakola, ufulielo wo kausele mu cheseko muze Mwanangana Nabukanezore aahele shimbi yakuwayila lukaponya lwa oru. Shadrake, Meshake ni Abedenego yalituna kuwayila lukaponya lwacho, nawa yalweza mwanangana ngwo: “Kutuchi kulingila tuzambi twenu, chipwe kuwayila lukaponya lwa oru luno hinwamika.” Muze esekele ufulielo wo, masepa wano atatu kanungine ni kushishika kuli Zambi.—Daniele 1:1-17; 3:12, 16-28.

11. Kuchi tunanyingika ngwetu Paulu ni Timoteu kapwile masepa apema?

¹¹ Muze postolo Paulu anyingikine kanawa mukweze Timoteu, iye kamwene ngwenyi, Timoteu te kakuzanga chinji Yehova nawa kapwile ni mbunge ya kufunga chikungulwila. Ha chino, Paulu yafumba Timoteu hanga te akwase mandumbu jenyi, ku yihela yalisa. (Yilinga 16:1-8; 17:10-14) Timoteu kakalakalile chinji, kashika Paulu ambile ngwenyi: “Iye hahondangana hamwe ni yami mukusenyesa kulutwe Sango Lipema.” Paulu te kananyingika ngwenyi, Timoteu ‘kakunyonga’ chinji hali mandumbu. Paulu ni Timoteu kakalakalile chimuwika mu mulimo wa Zambi, kashika apwile masepa apema.—A-Fwilipu 2:20-22; 1 A-Korindu 4:17.

12, 13. (a) Mumu liaka twatamba kukeya hakusakula masepa jetu mu chikungulwila? (b) Mumu liaka postolo Paulu ahanyine utowezo uli ha 1 A-Korindu 15:33?

¹² Mu chikungulwila, mutuhasa kulilongesa ha yilweza ya mandumbu jetu ni kulikwasa umwe ni mukwo  hanga tununge mu ufulielo. (Tanga A-Roma 1:11, 12.) Alioze chipwe muchikungulwila, twatamba kukeya ha kusakula masepa jetu. Tuli ni mandumbu anji apema a ku yifuchi ni minyachi yalisa. Amwe achili aha mu chikungulwila, akwo halingila Yehova ha miaka yinji. Mutu mahasa kumbata mashimbu anji ha kukolesa usepa wenyi ni Yehova, ngwe chize yimwe mihuko ku mutondo yakumbata mashimbu anji mba yihe. Kashika, twatamba kusolola uhomboloji ni zango kuli akwetu, ni kusakula masepa jetu ni mana.—A-Roma 14:1; 15:1; A-Hepreu 5:12–6:3.

 ¹³ Ha mashimbu amwe, mukuhasa kusoloka umwe kapinda mu chikungulwila, kashika twatamba kukeya chinji. Umwe ndumbu mu chikungulwila mahasa kulinga yuma yize akukanjisa mu Mbimbiliya. Hanji umwe yoze uli ni ndako ya kulinyenyeta yize muyihasa kuneha mbwanja mu chikungulwila. Yuma yino kuyatambile kutukomwesa, mumu chipwe mu chikungulwila cha ku sekulu yitangu ha mashimbu amwe te yakulingiwa. Kashika postolo Paulu atowezele akwa-Kristu a ha mashimbu jacho ngwenyi: “Kanda nulionga, usepa upi kuwakupihisa ndako jipema.” (1 A-Korindu 15:12, 33) Paulu yatoweza nawa Timoteu hanga akanyame ha kusakula masepa jenyi. Ni yetu che twatamba kulinga musono.—Tanga 2 Timoteu 2:20-22.

14. Kuchi kusakula masepa jetu chikwete ulemu ha usepa wetu ni Yehova?

¹⁴ Usepa wetu ni Yehova uli chuma chilemu chinji, kashika twatamba kuufunga kanawa. Ha chino, twatamba kwehuka kulikata ni atu waze mahasa kukokolola ufulielo wetu ni kupihisa usepa wetu ni Yehova. Chakutalilaho, kutuchi kuhasa kusa mbolo mu yamwa ni kushimbwila ngwo muyishisa meya. Chizechene nawa, kutwatambile kulinga usepa ni atu ali ni yitanga yipi ni kushimbwila ngwo yetu mutupwa ni yitanga yipema. Kashika, twatamba kukanyama ha kusakula masepa jetu.—1 A-Korindu 5:6; 2 A-Tesalonika 3:6, 7, 14.

15. Yika muhasa kulinga hanga uwane masepa apema mu chikungulwila?

¹⁵ Mu chikungulwila, mutuhasa kuwanamo atu waze akuzanga chinji Yehova. Ayo mahasa kupwa masepa je apema. (Samu 133:1) Kanda ufupa wika masepa waze ali ni miaka yimuwika ni yena hanji a ku vungu lie. Ewuluka  ngwe, Jonata kapwile mukulwana wa Ndawichi, nawa Rute kapwile kanuke wa Noemi. Tunazange kukaula chiyulo cha mu Mbimbiliya chinambe ngwo: “Mbunge jenu jikatohe.” (2 A-Korindu 6:13; tanga 1 Petulu 2:17.) Nyi mulikolweza hanga wimbulule Yehova, atu anji mazanga kupwa masepa je.

16, 17. Nyi umwe ndumbu mu chikungulwila matulinga upi, yika yize kutwatambile kulinga?

¹⁶ Mu hita usoko, mwatwama atu waze akwete ndako, utu, ni manyonga alisa, nawa kakulinga yuma mu majila alisa. Kalisa wacho ni mu chikungulwila katwamamo. Kalisa wacho kakupemesa mwono, mutuhasa kulilongesa yuma yinji hali mandumbu jetu. Ha mashimbu amwe, kalisa wetu mahasa kuneha kapinda mukachi ka mandumbu jetu nawa mahasa kwaapinjisa. Ha kupalika cha mashimbu, yitanga yacho muyihasa kutuvwisa yikola ku mbunge. (Yishima 12:18) Shina twatamba kwecha kapinda wacho hanga atukokolole ni kutulingisa hanga tuhichike chikungulwila?

¹⁷ Ka. Chipwe ngwe umwe ndumbu matulinga upi, kutwatambile kukokoloka hanji kuhichika chikungulwila. Hi Yehova ko watulinga upi. Iye mwe watuhele mwono ni yuma yeswe yize tuli nayo. Iye kanatela zango ni ushishiko wetu. (Usolwelo 4:11) Chikungulwila chili chawana cha Yehova chize chakutukwasa hanga tutakamise ufulielo wetu. (A-Hepreu 13:17) Kashika, kutwatambile kulituna chawana chino cha Yehova, mumu ngwo umwe ndumbu katulinga upi.—Tanga Samu 119:165.

18. (a) Yika muyihasa kutukwasa kulivwashana ni mandumbu jetu? (b) Mumu liaka twatamba kukonekena mandumbu jetu?

 ¹⁸ Twakuzanga mandumbu jetu nawa tunazange hanga tulivwashane no. Yehova keshi kushimbwila ungunu kuli atu, ni yetwe che twatamba kulinga. (Yishima 17:9; 1 Petulu 4:8) Yetu eswe twakulinga uhenge, alioze zango mulitukwasa kununga “nikulikonekena umwe ni mukwo.” (A-Kolosu 3:13) Zango mulitukwasa tuchine kwokesa milonga yikehe. Kwamba pundu, nyi umwe mutu matulinga yuma yipi, chakupwa chikalu kuvulama yuma yacho. Nawa chakupwa chashi kumwivwila toto ni chikulikuli. Alioze, yino yakutunehena wika yinyengo ni lamba. Chikwo nawa, nyi mutukonekena mutu yoze watutuka, mutupwa ni sambukila ku mbunge, kulinunga mu chikungulwila, chikwo nawa, mutupwa ni usepa upema ni Yehova.—Mateu 6:14, 15; Luka 17:3, 4; A-Roma 14:19.

19. Mumu liaka kutwatambile kulikata ni mutu yoze asosolola mu chikungulwila?

¹⁹ Mu usoko, hita mutu kakulinga yuma yize yakuneha sambukila kuli akwo. Achinyonga nyi umwe mapwa chihulia. Eswe mu usoko meseka kumukwasa, alioze iye malituna ukwaso wacho. Ha chino, iye makwata chiyulo cha kukatuka ku zuwo, hanji mwenya zuwo mamwita hanga akatuke ku zuwo. Yino nawa ye muyihasa kulingiwa mu chikungulwila. Mutu hanji masakula kununga ni kulinga yuma yize Yehova keshi kuzanga ni kupihisa chikungulwila. Mutu wacho hanji malituna ukwaso, ni kusolola mu yitanga ngwenyi, kazangile kununga mu chikungulwila. Iye masakula mwene kukatuka  mu chikungulwila, hanji kumusosolola. Nyi yino yalingiwa, Mbimbiliya yinambe ndusu ngwo, “kanda nuliendela ni” mutu wacho. (Tanga 1 A-Korindu 5:11-13; 2 Yoano 9-11) Muchihasa kupwa chikalu kwecha usepa wacho chipi-chipi nyi mutu wacho kali sepa hanji usoko wetu. Alioze, nyi chino muchilingiwa, twatamba kusolola ngwo, ushishiko wetu kuli Yehova uli chuma chilemu ku mwono wetu kuhiana kuli mutu mweswawo.—Tala Maliji Akusongo 8.

20, 21. (a) Mumu liaka ululikiso wa kusosolola mutu uli chitanga cha zango? (b) Mumu liaka chili chilemu kusakula masepa jetu ni mana?

²⁰ Kusosolola mutu chili chitanga cha zango lia Yehova. Kusosolola atu waze keshi kuzanga kukaula shimbi ja Yehova, chakufunga chikungulwila. (1 A-Korindu 5:7; A-Hepreu 12:15, 16) Chino, chakutukwasa kusolola zango ha jina lisandu lia Yehova, ha shimbi jenyi, ni hali iye mwene. (1 Petulu 1:15, 16) Ululikiso wa kusosolola wakusolola zango hali mutu yoze walinga shili. Fumbo lino mulihasa kukwasa mutu kunyingika ngwenyi, yize alinga yili yipi, ni kusa tachi hanga alumune ndako jenyi. Atu anji waze asosolwele, ha kupalika cha mashimbu yahiluka kuli Yehova, nawa kaatambwile kanawa kuli mandumbu mu chikungulwila.—A-Hepreu 12:11.

²¹ Yitanga ya masepa jetu muyihasa kukwata hali yetu. Kashika, chili chilemu kusakula kanawa masepa jetu. Nyi twazanga waze Yehova akuzanga, mutupwa ni masepa waze mahasa kutukwasa kununga ni kushishika kuli iye.