Kuli yuma yinji yize yakutuvwisa yinyengo, alioze twakunenganyana chinji muze umwe usoko hanji sepa lietu mamusosolola mu chikungulwila ha mukunda wa kulinga shili chakuhona kulikonyeka. Ha chino, chize twakunyonga ha usongwelo wa mu Mbimbiliya hakutwala ku chikuma cha kusosolola mutu, muchihasa kusolola nyi tuli ni zango likolo muli Zambi nyi ka, nawa nyi twakushishika ha shimbi jenyi nyi ka. * Haliapwila tushimutwinenu yimwe yihula hakutwala ku chikuma chino.

Kuchi twatamba kumona mutu yoze asosolola mu chikungulwila? Mbimbiliya yinambe ngwo: “Kanda nuliendela ni umwe yoze anavuluka ngwo, Ndumbu, nyi mapwa chitanji, hanji mukwa kwivwa kuzo, hanji mukwa kukombelela mahamba, hanji mukwa kutukana, hanji mukwa kuzengewa, hanji mukwa lufutu; hamwe ni umwe ngwe yono kanda nulia.” (1 A-Korindu 5:11) Hakutwala kuli atu waze “keshi kutwama mu longeso lia Kristu,” Mbimbiliya yinambe ngwo: “Kanda umutambula mu zuwo lie, kanda umumeneka: mumu yoze mamumeneka, malifutula ni yitanga yenyi ya ungulungulu.” (2 Yoano 9-11) Yetu kutushi kulikata ni waze asosolola mu chikungulwila, chipwe kulinga no yuma ya ku spiritu chipwe ya ha tangwa ni tangwa. Kaposhi wa Kutalila wa 15 Dezembro wa 1981 ha lifwo 21 kanambe ngwo: Kumeneka mutu wacho muchihasa kupwa uputukilo wa kuhanjika nenyi hanji kulinga nenyi usepa. Shina unazange lume kupwa sepa lia mutu yoze asosolola?”

Shina twatamba lume kwehuka kulikata ni mutu wacho? Ewa, ha mukunda wa yitela yinji. Chitangu, chikuma chino chinatale ha ushishiko wetu kuli Zambi ni ha Liji lienyi. Yetu kutushi kwononokena wika Yehova muze tunahase kuchilinga, alioze chipwe muze mutupalika mu yipikalo. Zango lietu muli Zambi liakutukolweza kwononokena shimbi jenyi jeswe, ni kunyingika ngwetu, shimbi jenyi jili ja ululi ni zango, nawa jakutukwasa. (Izaia 48:17; 1 Yoano 5:3) Chamuchaali, kwecha kulikata ni mutu yoze asosolola mu chikungulwila, chakutukwasa kwehuka yuma yize muyihasa kutupinjisa ku spiritu ni ku manyonga, ni kupwa ni lufuma mupema mu chikungulwila. (1 A-Korindu 5:6, 7) Chamuchitatu, ushishiko wetu ha shimbi ja mu Mbimbiliya muuhasa kukwasa mutu yoze asosolola mu chikungulwila hanga ahiluke. Nyi twakaula chiyulo chize makulwana akwata, mutuhasa kukwasa mutu yoze wavulumuna, chipwe ngwe te katayijile ukwaso uze makulwana a mu chikungulwila amwaha. Nyi twecha kulikata ni mutu wacho, chino muchihasa kumukwasa kupwa ni “mana,” nawa ni kumona ngwenyi kavulumuna, ha chino, aye mahasa kulikolweza hanga afune kuli Yehova.​—Luka 15:17.

Yika mutulinga nyi usoko wetu mamusosolola mu chikungulwila? Nyi masosolola usoko wetu, muchihasa kupwa chikalu kushishika. Kuchi twatamba kumona usoko wetu yoze asosolola? Kutuchi kuhasa kuhanjika ha yikuma yeswe yize muyihasa kusoloka, alioze tuhanjikenu ha yikuma yaali.

Muchihasa kupwa, hanji mutu yoze asosolola kali usoko wetu hanji twatwama nenyi ku zuwo limuwika. Kusosolola mutu kuchishi kuhwisa usoko, milimo ya tangwa ni tangwa yize akupwa nayo mu usoko muyihasa kununga. Alioze, ha yitanga yenyi, iye kasakula kwehuka kupwa hamwe ni usoko wenyi ha milimo ya Zambi. Kashika, asoko waze ashishika katambile kuhanjika nenyi hakutwala ku yuma ya ku spiritu. Chakutalilaho, nyi mutu yoze asosolola kali ku zuwo ha mashimbu a uwayilo wa mu usoko, aye katambile kupwa mu uwayilo wacho. Alioze, nyi yoze asosolola kali kanuke, yisemi nihindu achili ni chiteli chakumufumba. Ha chino, yisemi a zango, mahasa kulinga nenyi longeso lia Mbimbiliya. *​—Yishima 6:20-22; 29:17.

Alioze, muchihasa kupwa nawa hanji mutu yoze asosolola mu chikungulwila kutwatwamine nenyi chimuwika ku zuwo. Chipwe ngwe ha mashimbu amwe mutufupa kulinga nenyi yimwe milimo ya mu usoko, nihindu twatamba kulikata nenyi hakehe. Asoko waze ashishika katambile kufupa kaliongelo hanga apwe ni usepa ni usoko wo yoze asosolola. Alioze, ushishiko wo hali Yehova ni ululikiso wenyi wakwalingisa hanga akaule shimbi ja mu Mbimbiliya hakutwala ku chikuma cha kusosolola. Yitanga ye ya ushishiko yakukwasa waze asosolola, nawa muyihasa kwaakwasa hanga ayuke ku fumbo lize atambula. *​—A-Hepreu 12:11.