1, 2. Mumu liaka busula yikwete ulemu, nawa kuchi mutuhasa kuyitesa ni mbunge yipema?

UMWE mukwa-kwendesa ulungu, kanendesa ulungu mu kalunga-lwiji; umwe mukwa-kulinga wenyi kanayi ukawenyi mu puya; mukwa-kwendesa ndeke kanendesa ndeke helu lia malelwa. Unanyingika kapinda yoze atu wano atatu mahasa kupwa nenyi? Ayo mahasa kutoka hanji kufwa nyi mahona kasongwelo yoze akuvuluka ngwo, busula, ni yuma yikwo yaha yize akwa-mana anatuhwisa musono.

² Busula yili chimwe chuma chikehe chalifwa ni loloji ya ku kwoko, yikwete ndongo yize yakutalikisa wika ku norte. Busula muyihasa kulamwina mwono wa atu nyi yinakalakala kanawa nawa nyi atu jacho mazachisa mapa apema. Chizechene nawa, mutuhasa kutesa busula ni chawana chilemu chize  Yehova hanatwehe, shimbi yipema ya mbunge. (Tiangu 1:17) Nyi te kutushi nayo kachi tuli ngwe atu waze hanatoko jila. Nyi twazachisa kanawa mbunge yetu, muyitukwasa kuwana jila yipema ku mwono wetu. Kashika tutalenu yize mbunge yipema yinalumbunuka nawa chize yakukalakala. Mba tuhase kushimunwina yikuma yino: (1) Chize mutuhasa kufumba mbunge yipema, (2) Mumu liaka twatamba kunyonga ha mbunge ya akwetu, ni (3) Yiwape yize yakwiza ha kupwa ni mbunge yipema.

3. Mu Ngregu “mbunge yipema,” yika yinalumbunuka, nawa uhashi uka uze atu wika e alinawo?

³ Mu Mbimbiliya, liji lia Ngregu lize alumbununa “mbunge yipema” linalumbunuka nawa “kunyingika, hanji kulinyingika ena mwene.” Kulisa ni yitangiwa yikwo ya hano hashi, atu e wika Zambi atangile ni uhashi wakulinyingika ene. Mutuhasa kulitala yetwene ni kunyingika chize mwono wetu watamba kupwa. Mbunge yipema yili ngwe chela yoze uli mukachi ketu, hanji ngaji yoze mahasa kuhengula yitanga, manyonga ni yuma yize twakuzanga kulinga ku mwono wetu. Muyihasa nawa kutusongwela hanga tukwate yiyulo yipema hanji kutukinda muze mutuzanga kulinga yuma yipi. Chikwo nawa, muyihasa kutuvwisa kuwaha ha mukunda wa chiyulo chipema chize twakwata hanji kutunehena yikola mu mbunge nyi twalinga chuma chipi.

4, 5. (a) Kuchi tunanyingika ngwetu, Alama ni Eva kaatangile ni shimbi ya mbunge, nawa yika yalingiwile muze o alingile shili? (b) Yilweza yika yinasolola ngwo atu ashishika aku mashimbu akunyima kazachishile kanawa shimbi yo ya mbunge?

⁴ Lunga ni pwo mutangu kaatangile ni uhashi wacho. Alama ni Eva kasolwele ngwo ayo kapwile ni mbunge yipema. Mutuhasa kuchinyingika ha sonyi jize evwile muze avulumwine. (Uputukilo 3:7, 8) Chipwe ngwe, mbunge yo yaapinjishile chinji, te kuyichi kwaakwasa nawa ha shimbu liacho. Mumu o  kehukile shimbi ya Zambi ku tachi. Yasakula ene kupwa yihulia, ni kulimika ni Yehova Zambi. Ayo te atu angunu, kashika te kanyingika kanawa yize analingi, nawa te kanyingika ngwo kechi kupwa nawa ni usepa upema ni Zambi.

⁵ Kulisa ni Alama ni Eva, atu anji yihenge kakupanjika shimbi yo yipema ya ku mbunge. Chakutalilaho, Yombi umwe lunga washishika kambile ngwenyi: “Mungulalaminya ululi wami, chichi kuwecha. Mbunge Yami kuyanguhishile ha yitanga yami niyimwe.” * (Yombi 27:6) Yombi te kakupanjika kanawa mbunge yenyi, ni kwecha hanga yisongwele yitanga ni yiyulo yenyi. Kashika, iye ahashile kwamba ni hamu lieswe ngwenyi, mbunge yenyi kuyamuhishile hanji kumupinjisa ni manyonga asonyi. Tunawane kulisa hali Yombi ni Ndawichi. Muze Ndawichi ahonene Saulu vumbi, mwanangana yoze Yehova awayishile, “kulutwe Ndawichi yalikonyeka mu mbunge.” (1 Samuele 24:5) Chinyengo chize Ndawichi evwile ku mbunge chamukwashile, ni kumulongesa hanga ehuke kulinga nawa upi wacho.

6. Yika yinasolola ngwo atu eswe kaatangile ni mbunge yipema?

⁶ Shina tuvumbi ja Yehova e ali wika ni mbunge yipema? Tutalenu maliji waze postolo Paulu asonekene ngwenyi: “Mumu muze mavungu aze keshi shimbi, malinga ni mbunge jo yuma ya shimbi, o se keshi shimbi, kanapu shimbi kuli ayoene. Waze kakulweza chitanga cha shimbi chakusonewa mu mbunge jo, mbunge jo nawa se jinashindakenya hamuwika, ni manyonga jo kaanasumu hanji kanaasambisa hakachi ko.” (A-Roma 2:14, 15) Chipwe atu waze keshi kunyingika shimbi  ja Yehova ha mashimbu amwe mbunge jo jakwashinjila hanga alinge yuma kulita ni shimbi ja Zambi.

7. Kuchi mbunge yetu muyihasa kutwonga ha mashimbu amwe?

⁷ Alioze, ha mashimbu amwe, mbunge yetu muyihasa kutwonga. Mumu liaka? Tunanyingika ngwetu, nyi mutu masa chikungo cha zembwe hakamwihi ni busula, ndongo ya busula kuyichi kutondekeza ku norte, alioze muyitala kuze kuli chikungo. Atu mahasa kupwa ni busula, alioze nyi keshi ni mapa apema busula kuyichi kwaakwasa kanawa. Chizechene nawa, nyi mbunge yetu muyizala too ni usolo upi shimbi yetu ya mbunge muyihasa kutusongwela mu majila api. Chikwo nawa, nyi mutukaula mbunge yetu chakuhona usongwela wa Liji lia Zambi, kutuchikuhasa kunyingika upi ni upeme ha yikuma yilemu. Kashika, mba mbunge yetu yikalakale kanawa, twatamba kukaula usongwelo wa spiritu yisandu ya Yehova. Paulu kasonekene ngwenyi: “Mbunge yami yakushindakenya hamwe ni yami muli spiritu musandu.” (A-Roma 9:1) Alioze yika twatamba kulinga mba mbunge yetu yikaule usongwelo wa spiritu yisandu ya Yehova? Twatamba wika kuyifumba.

8. (a) Kuchi mbunge yetu yipema muyihasa kupihia, nawa yika twatamba kunyingika chitangu mba tukwate yiyulo? (b) Mumu liaka kuchakumbanyine wika mukwa-Kristu kwamba ngwenyi kali ni mbunge yitoma? (Tala maliji mushi lia lifwo.)

⁸ Kuchi muhasa kukwata chiyulo chize chinakatuka ha usongwelo wa mbunge yipema? Atu amwe kakukwata chiyulo kulita ni yize akwivwa hanji kunyonga mu mbunge yo. Hanyima, mahasa kwamba ngwo: “Ami mbunge yami kuyishi kulipikala.” Usolo muhasa kwoka chinji ku mbunge ya mutu, ni kupihisa mbunge yenyi yipema. Mbimbiliya yinambe ngwo: “Mbunge kuyakwonga kuhiana yuma yeswe, ni kupihia chikolo. Iya mayinyingika?” (Jeremia 17:9) Kashika, kutwatambile kulemesa chinji usolo wa mbunge yetu. Alioze, twatamba  kunyingika kanawa yuma yize muyivwisa Yehova Zambi kuwaha. *

9. Kuvwila Zambi woma yika chinalumbunuka, nawa kuchi muchihasa kutukwasa hanga tupwe ni mbunge yipema?

⁹ Nyi mutukwata chiyulo chize chinakatuka ku mbunge yakufumba, mutusolola ngwetu twakuvwila Zambi woma, hi usolo wetu ko. Tutalenu chimwe chilweza. Nguvulu Nehemia, lunga washishika kapwile ni ulite wakwita lijimo kuli atu a mu Yerusaleme. Alioze kakachilingile. Mumu liaka? Kakazangile hanga Yehova amuvwile kupihia mumu hakumwesa atu jenyi lamba. Aye yamba ngwenyi: “Yami chalingile chocho mumu ha woma wa Zambi.” (Nehemia 5:15) Kashika chili chilemu kuvwila Zambi woma, woma wa kulinga yuma yize muyivwisa Tata yetu wa mu malilu kupihia. Woma wacho upema wakutukwasa hanga tukaule usongwelo wa Liji lia Zambi muze mutukwata yiyulo.

10, 11. Shimbi jika ja Mbimbiliya jize jinambe hakutwala ku kunwa walwa, nawa kuchi mutuhasa kupwa ni usongwelo wa Zambi ha kujikaula?

¹⁰ Chakutalilaho, achinyonga hakutwala ku chikuma cha kunwa walwa. Kanji-kanji muze tuli ha chimwe chiwanyino, anji akuli yetu twakufupa kukwata chiyulo cha kunwa walwa hanji ka. Chitangu twatamba kufumba mbunge yetu, ni kunyingika shimbi ja Mbimbiliya jize jinahanjika ha chikuma chacho. Kwamba pundu, Mbimbiliya kuyishi kukanjisa kunwa walwa. Yakuhalisa Yehova hakutwaha chawana chino cha vinyu. (Samu 104:14, 15) Alioze, Mbimbiliya yakukanjisa kunwa walwa unji ni kuzengewa. (Luka 21:34; A-Roma 13:13)  Chikwo nawa, yinavuluka uzengi hamwe ni yitanga yikwo ya shili, ngwe utanji ni upangala. *—1 A-Korindu 6:9, 10.

¹¹ Shimbi jino je jakufumba ni kululieka mbunge ya mukwa-Kristu. Kashika muze mutuzanga kuya ku chimwe chiwanyino kuze mukukapwa walwa, twatamba kulihula ngwetu: ‘Chiwanyino chacho chamutapu uka? Shina ha chiwanyino chacho, atu makazengewa? Ngukwete ndako ya kunwa walwa unji? Kutala nakuzanga chinji kunwa walwa, nguli kapinji ka walwa nyi nakuunwa hanga nguvulame milonga hanji yitanga yami? Shina munguhasa kulifunga hanga nguchine kunwa walwa unji?’ Muze mupukuna ha shimbi ja Mbimbiliya ni ha yihula yino, muchilita kulemba kuli Yehova hanga akwehe usongwelo wenyi. (Tanga Samu 139:23, 24.) Nyi twalinga chocho, tunechi Yehova hanga atusongwele ni spiritu yenyi yisandu. Nawa mutufumba mbunge jetu hanga yikaule shimbi ja Zambi. Alioze kuli nawa chikuma chikwo chize twatamba kuhengula kanawa muze tunambe kukwata yiyulo yetu.

12, 13. Mbunge ja akwa-Kristu mujihasa kulisa ha yikuma yika, nawa kuchi twatamba kumona kalisa wacho?

¹² Ha mashimbu amwe muhasa kukomoka ha kumona chize mbunge ja akwa-Kristu jalisa. Mukwa-Kristu umwe mahasa kumona ngwenyi yitanga hanji ndako yimwe yili yipi; alioze mukwo kakuyizanga nawa keshi kuyimona ngwe yipi. Chakutalilaho, hakutwala ku chikuma cha kunwa walwa ha mbunga, mukwa-Kristu umwe mahasa kumona ngwe chili chipema kunwa ndambu ya walwa hamwe ni masepa jenyi ha chingoloshi; mukwo hanji kechi kuhasa kuchilinga. Mba mumu liaka hali kulisa chacho, nawa kuchi kulisa chacho muchihasa kutwa ku yiyulo yetu?

 ¹³ Atu kalisa chinji ha yuma yeka ni yeka. Mutu ni mutu kalisa kulita ni chize akolele. Chakutalilaho, amwe kanyingika kanawa ulelu uze apwile ni kupinda nawo ku mashimbu akunyima, kota ni haliapwila machivwa woma wakuhilukila mu ulelu wacho. (1 Mianangana 8:38, 39) Nyi ulelu wacho te wakunwa walwa, kota mutu wacho kakwivwa woma wa kunwa walwa. Mutu wacho nyi maya ni kukumeneka ku zuwo lie, nyi mumwaha walwa mahasa kulituna. Mumu liaka kuwatambile kwivwa kupihia? Shina watamba kumujijiminya kunwa walwa? Ka. Chipwe ngwe unanyingika chikuma chize anechela kunwa walwa chipwe ka, iye hanji kechi kumona ulemu wakukulweza. Kashika zango lie lia undumbu mulikukwasa hanga uvumbike chiyulo chenyi.

14, 15. Ha chikuma chika mbunge ja akwa-Kristu atangu te jalisa, nawa yika Paulu ambile?

¹⁴ Postolo Paulu kamwene ngwenyi akwa-Kristu ku sekulu yitangu kapwile ni mbunge jalisa. Ha mashimbu jacho, akwa-Kristu amwe kapwile ni kulipikala chinji ha chimwe kulia chize te akuhana ngwe chitapo ku mahamba. (1 A-Korindu 10:25) Mbunge ya Paulu te kuyishi kulipikala ha kulia yifwo yacho, te akulanjisa ha yitanda. Kuli iye, mahamba te keshi ni ulemu niumwe; mumu Yehova mwe watangile yuma yakulia, nawa yuma yeswe yili ni yenyi hi ya mahamba ko. Alioze Paulu kanyingikine ngwenyi, mandumbu akwo te keshi ni nyonga ngwe lia iye ha chikuma chacho. Amwe kota kapwile ni kukombelela mahamba jacho muze te kanda achipwa akwa-Kristu. Kuli ayo, chuma cheswacho chinakatuka ku mahamba chapwile chipi. Kuchi Paulu ahwishile kapinda wacho?

¹⁵ Paulu yamba ngwenyi: “Yetu tuli ni tachi kuchatutambile kuliwahisa yetwene, alioze shinoho chatutamba kumbata yiteli ya waze keshi tachi jinji. Mumu chipwe Kristu kaliwahishile mwene.” (A-Roma 15:1, 3) Paulu kanyingikine ngwenyi, twatamba kunyonga chitangu hali mandumbu jetu ngwe chize alingile Kristu, hi hali yetwene wika ko. Mu sango jenyi jikwo, Paulu kambile ngwenyi, mutuhasa tuhu kulituna kulia  yifwo hanga tuchine kutalingisa mapanga jambala waze afwilile kuli Kristu.—Tanga 1 A-Korindu 8:13; 10:23, 24, 31-33.

16. Mumu liaka mandumbu katambile kuyenga-yenga akwo ha mukunda wa kulisa cha mbunge jo?

¹⁶ Chikwo nawa, mandumbu waze mbunge yo yakwaakinda kulinga yimwe yuma, katambile kwambila akwo ha yuma yize o anamona ngwe hi yipema ko kulita ni mbunge jo. (Tanga A-Roma 14:10.) Twatamba kuzachisa mbunge yetu hanga tulisopese yetwene, hi kusopesa akwetu ko. Twatamba nawa kwiwuluka maliji a Yesu, akwamba ngwo: “Kanda nupatwila akwenu, mba kechi kanupatwila.” (Mateu 7:1) Yetweswe mu chikungulwila twatamba kwehuka kusopesa akwetu ha yikuma yize mutu ni mutu mahasa kukwata chiyulo kulita ni mbunge yenyi. Alioze, twatamba kufupa kupwa  ni sambukila hamwe ni mandumbu, kwaatakamisa hi kwaahandununa ko.—A-Roma 14:19.

17. Yika yinalingiwa ku mbunge ja atu anji musono?

¹⁷ Postolo Petulu kasonekene ngwenyi: “Pwenu ni mbunge yipema.” (1 Petulu 3:16) Mbunge yize yili yitoma kumeso ja Yehova Zambi yakuneha yiwape yinji. Mbunge yamutapu au yalisa chinji ni mbunge ja atu anji musono. Paulu yambila atu jacho ngwenyi, ‘manyonga jo amu mbunge haanapu ngwe akwocha ni utale wa kahia.’ (1 Timoteu 4:2) Utale wa kahia nyi wocha ha chikonda, homa hacho hakukala mbe hi mutu kechi kwivwaho nawa yikola. Mbunge ja atu anji hi jinafu kulu, chekwamba ngwo, kujishi kwaatoweza hanji kwivwa yikola  muze malinga upi. Atu anji musono kakuwahilila chinji amu keshi kwivwa nawa yikola ku mbunge muze malinga upi.

18, 19. (a) Kwivwa yikola ku mbunge ulemu uka ulinawo? (b) Yika mutuhasa kulinga nyi mutununga ni kwivwa yikola ku mbunge yetu ha mukunda wa shili yize twalingile nawa hitunalikonyeka?

¹⁸ Chochene, kwivwa yikola ku mbunge muchihasa kusolola ngwo chuma chize twalinga chili chipi. Nyi ye yikola yacho muyilingisa mutu hanga alikonyeke, chipwe kalinganga shili yinene, Zambi mamukonekena. Chakutalilaho, Mwanangana Ndawichi kalingile shili yinene, chipwe chocho Zambi yamukonekena, mumu kalikonyekene. Kuvwila kole yitanga yenyi yipi ni kupwa ni hamu lia kwononokena shimbi ja Yehova, yamukwashile kunyingika ngwenyi Yehova kali ‘mupema, kali mukwa kukonekena.’ (Samu 51:1-19; 86:5) Yika mutulinga nyi mutununga ni kwivwa yikola ku mbunge muze hitwalikonyeka nawa hatukonekena ha shili yize twalingile?

¹⁹ Ha mashimbu amwe, mbunge muyihasa kupinjisa chinji mutu yoze wavulumuna chipwe ngwe kuchishi ni ulemu wa kwivwa chocho. Ha shimbu liacho twatamba kunyingika ngwetu, Yehova kali munene chinji kuhiana mbunge yetu. Twatamba kulinga chuma chize twakukolweza akwetu hanga alinge, kufuliela ni kutayiza zango ni ukonekeno wa Zambi. (Tanga 1 Yoano 3:19, 20.) Chikwo nawa, mbunge yitoma yakuneha sambukila, uhumikizo, ni chiseke chize atu anji keshi nacho hano hashi. Atu anji waze hanalingi shili yinene hanevu kuwaha ha kuhuzuluka ku mbunge, haliapwila kanawayila Yehova Zambi ni mbunge yipema.​—1 A-Korindu 6:11.

20, 21. (a) Mukanda uno kaulingile hanga ukukwase kulinga yika? (b) Utusuko uka akwa-Kristu alinawo, nawa kuchi twatamba kuuzachisa?

²⁰ Mukanda uno kaulingile hanga ukukwase kuwana chiseke chacho, hanga ununge ni kupwa ni mbunge yipema ha matangwa wano akusula a hano hashi ha Satana. Chochene, mukanda uno kuwambile shimbi jeswe ja Mbimbiliya ni yiyulo yize yena watamba kukwata ni kukaula ha yuma yize yakusoloka ha tangwa ni tangwa. Nawa kutwatambile  kushimbwila hanga Mbimbiliya yitwehe shimbi ha yuma yize yinatale wika mbunge ni mbunge ya mutu. Mukanda uno kaulingile hanga ufumbe ni kululieka mbunge ye, ha kulilongesa chize mukaula Liji lia Zambi matangwa eswe ku mwono we. Kulisa ni Shimbi ya Mose, “shimbi ya Kristu” yakukolweza atu waze akuyikaula hanga azachise mbunge yo yipema ni yiyulo, hi ko shimbi jize anasonekamo. (A-Ngalashia 6:2) Yehova hanatwehe utusuko wakusakula chipi ni chipema. Kashika, Liji lienyi linatwiwulula ngwo kanda tuzachisa utusuko wacho ngwe ‘chifuko cha kulingila upi.’ (1 Petulu 2:16) Uhashi wacho wakutukwasa kusolola ngwetu twakuzanga chinji Yehova.

²¹ Nyi mulemba ni kutwama kulita ni shimbi ja mu Mbimbiliya ni kukaula kanawa yiyulo ye, yena mununga mu jila yize wasakwile muze waputukile kunyingika Yehova. “Mana” je mapwa kufumba ‘mumu ha mukunda wa kwaazachisa.’ (A-Hepreu 5:14) Mbunge ye yize hiyinafumbiwa ni Mbimbiliya muyikunehena yiwape yinji ku mwono we wa tangwa ni tangwa. Ngwe busula yize yakusongwela akwa-wenyi, mbunge ye yipema muyikukwasa hanga ukwate yiyulo yize muyivwisa kuwaha Tatenu wa mu malilu. Chino muchikukwasa hanga ulifunge mu zango lia Zambi.