Mandumbu Jetu a Zango
Chizavu cha Tusongo a Yela ja Yehova:
Yesu kambile ngwenyi, “Kumunukanyingika umwenemwene, mba umwenemwene kumuukanutusula.” (Yoano 8:32) Maliji wano kakutwaha chiseke chinji. Chochene, mutuhasa kunyingika umwenemwene chipwe ngwe twatwama ha “miaka yikalu.” (2 Timoteu 3:1) Unewuluka muze umwenemwene wa Liji lia Zambi waputukile kukulumbunuka? Wevwile chiseke chinji!
Alioze, chuma chilemu chili kupwa ni umwenemwene ungunu ni kuusolola kuli akwenu mashimbu eswe, nawa twatamba kutwama kulita ni umwenemwene. Mba tuchilinge, twatamba kulifunga mu zango lia Zambi. Yika chinalumbunuka? Maliji waze Yesu ambile ha ufuku uze amushihile kanakumbulula chihula chino. Iye kambile kuli tumbaji twenyi ashishika ngwenyi: “Nyi munufunga shimbi jami, munukatwama mu zango liami; chizechene ngwe yami hingunafungu shimbi ja Tata, natwama mu zango lienyi.”—Yoano 15:10.
Yesu kalifungile mu zango lia Zambi ha kufunga shimbi ja Tato. Ni yetu che twatamba kulinga. Mba tulifunge mu zango lia Zambi twatamba kutwama matangwa eswe kulita ni umwenemwene. Ha ufuku uzewene, Yesu kambile ngwenyi: “Nyi nunanyingika yino yuma, munuwaha nyi munuyilinga.”—Yoano 13:17.
Tunazane hanga mukanda uno unukwase hanga nununge ni kukaula umwenemwene ku mwono wenyi, hanga nuhase kulifunga mu “zango lia Zambi . . . ndo ku mwono wa mutolo.”—Yundase 21.
Chizavu cha Tusongo a Yela ja Yehova
Kota Muzanga Chinji Yuma Yize Mumona
YIHULA YIZE ATU AKUHULA CHINJI
Chizavu Cha Tusongo cha Yela ja Yehova Aya?
Shina mandumbu a mu Chizavu cha Tusongo kali miata a mu ululikiso wetu?
