Yehova kanazange hanga waze alimbata amanunune chilakenyo cho chize alingile ha tangwa lia umbachiso. Muze alingile ulo utangu, Yehova kambile ngwenyi: “Lunga . . . akalalaminye kuli mukwo-pwo, mba kumapwa musunya umuwika.” Yesu Kristu neye katongwele maliji wowene ha kwamba ngwenyi: “Chize Zambi hanunga, niumwe mutu kanda achihandununa.” (Uputukilo 2:24; Mateu 19:3-6) Ha chino, Yehova ni Yesu, kakumona ulo ngwo uli usepa ukolo, uze muuhasa kuhwa wika muze umwe wa kuli waze alimbata mafwa. (1 A-Korindu 7:39) Kulilakula chili chikuma chilemu chinji, mumu ulo uli usandu. Kwamba pundu, Yehova kakuvwila kole kulilakula chize kuchishi kukatuka mu Mbimbiliya.​—Malakia 2:15, 16.

Kulita ni Mbimbiliya, yika muyihasa kutwala atu mba alilakule? Yehova keshi kuzanga utanji ni upangala. (Uputukilo 39:9; 2 Samuele 11:26, 27; Samu 51:4) Kashika, kuli iye utanji uli chikuma chilemu chize muchihasa kutwala atu waze alimbata hanga alilakule. (Mba unyingike yuma yikwo hakutwala ku utanji, tala Kapitulu 9, paragrafu 7.) Ku meso ja Yehova, chili kuli lunga hanji pwo nyi mazanga kulilakula nyi ka ni mutu yoze walinga utanji mu ulo. (Mateu 19:9) Ha chino, nyi mutu yoze kavulumwine, makwata chiyulo cha kulilakula, aye keshi kuvulumuna ku meso ja Yehova. Chikwo nawa chikungulwila cha akwa-Kristu kuchishi kushinjila niumwe hanga alilakule. Kashika, ha mukunda wa yimwe yuma hanji mutu mafupa kununga ni lunga hanji pwo lienyi yoze wavulumuna, kanji-kanji muze iye malikonyeka ni mbunge yeswe. Ha chino, nyi mutu kali ni ulite wa kulilakula kulita ni Mbimbiliya, iye katamba kukwata chiyulo chenyi mwene, ni kushimbwila yipikalo yize muyihasa kwiza ha mukunda wa chiyulo chacho.​—A-Ngalashia 6:5.

Ha mashimbu amwe kwakupwa yimwe yuma, yize yakutwala akwa-Kristu hanga alihandunune ni yoze alimbata nenyi hanji kulilakula chipwe ngwe kalingile upangala. Hakutwala ku chikuma ngwe chino, Mbimbiliya yinambe ngwo, yoze machilinga katamba ‘kutwama chizechene twamishi, nyi ka akalivwashane ni’ yoze alimbata nenyi. (1 A-Korindu 7:11) Nyi mukwa-Kristu mapwa ni kapalia wacho katambile kufupa mutu mweka hanga alimbate nenyi. (Mateu 5:32) Tutalenu yimwe yuma yize muyihasa kutwala waze alimbata hanga alihadunune.

Kulituna kulisa usoko. Asoko amwe kakupalika mu kapalia ha mukunda wa lunga kulituna kulisa usoko wenyi, chipwe ngwe kali ni uhashi wakuchilinga. Mbimbiliya yinambe ngwo: “Nyi umwe keshi kulisa . . . akwa zuwo lienyi, iye hanalikale ufulielo, kapiha kuhiana yoze kafulielele.” (1 Timoteu 5:8) Nyi lunga katayijile kwalumuna yitanga yenyi, pwo mahasa kukwata chiyulo cha kulihandununa hanga alifunge mwene hamwe ni ana jenyi. Nawa makulwana a mu chikungulwila katamba kutala kanawa mulonga uze analamikiza mukwa-Kristu ngwo kanalitunu kulisa usoko wenyi. Mutu mahasa kumusosolola mu chikungulwila ha mukunda wa kulituna kulisa usoko.

Kumwesa pwo lamba. Lunga yoze uli chitenu mahasa kumwesa mukwo-pwo lamba ni kusa mwono wenyi mu ponde. Nyi lunga kali mukwa-Kristu, makulwana a mu chikungulwila katamba kuhengwola kanawa hanga amone nyi yuma yize anamulamikiza yili yamwenemwene nyi ka. Nyi mutu mapwa ni ndako ya ufwatulo ni kulambalamba mukwo-pwo, mahasa kumusosolola mu chikungulwila.​—A-Ngalashia 5:19-21.

Kukinda ufulielo wa usoko. Lunga hanji pwo mahasa kweseka kukinda shimbu lieswe mukwa-Kristu kuwayila Zambi, ni kweseka kumushinjila kwehuka shimbi ja Zambi. Ha chino, mutu katamba kukwata chiyulo chenyi mwene nyi mazanga kulihandununa hanga ahase “kwononoka kuli Zambi, hi kuli atu ko.”​—Yilinga 5:29.

Ha yikuma ngwe yino, niumwe katambile kushinjila pwo hanji lunga yoze unapalika mu yipikalo yacho hanga alihandunune ni yoze alimbata nenyi. Chipwe ngwe makulwana a mu chikungulwila ni masepa waze ajama mu ufulielo mahasa kuhana umwe ukwaso ni yiyulo yize yinakatuka mu Mbimbiliya, nihindu ayo kechi kuhasa kunyingika yuma yeswe yize yinalingiwa hakachi ka pwo ni lunga. Yehova wika mwe wakumona yuma yeswe. Kashika, nyi pwo hanji lunga mukwa-Kristu mokesa yuma hanga awane jila yakulihandunwinamo ni yoze alimbata nenyi masolola ngwo keshi kulemesa Zambi yoze walingile ulo. Yehova kananyingika mutu yoze wakufupa kaliongelo wa kulihandununa ni mukwo chipwe ngwe mutu wacho meseka kusweka yize yili ku mbunge yenyi. Chochene, “Yuma yeswe yapwa ya uselesele, ya kufukula kumeso ja yoze mutukamulumbunwina yuma yeswe.” (A-Hepreu 4:13) Alioze nyi milonga yinoko chinji, niumwe katambile kuhanjika chipi hakutwala kuli mukwa-Kristu yoze makwata chiyulo cha kulihandununa ni yoze alimbata nenyi. Kwamba pundu, ‘mutu ni mutu, kumakalumbununa yitanga yenyi kuli Zambi.’​—A-Roma 14:10-12.