Apendice
Ha Mashimbu Aka,-Nawa Mumu Liaka Pwo Atamba Kuzala Chitambala?
Ha mashimbu aka nawa mumu liaka umwe pangi mukwa-Kristu atamba kusa chitambala ku mutwe ha milimu yimwe ya mu uwayilo wetu? Tushimutwinenu yize postolo Paulu asonekene akutwala ku chikuma chino. Iye kahanyine usongwelo uze tunafupu hanga tukwate yiyulo yipema, yize muyihalisa Zambi. (1 A-Korindu 11:3-16) Postolo Paulu kasolwele yikuma yitatu yize twatamba kusela shindakenyo: (1) milimo yize yakufupiwa kufuka ku mutwe, (2) ha mashimbu waze atamba kuchilinga, nawa ni (3) ulemu wa kukaula shimbi yacho.
Milimo. Paulu kanatongola milimo yaali: kulemba ni ku profetizala. (Versu 4, 5) Kulemba, chinalumbunuka kuhanjika ni Yehova, ni necho chili ni ulemu mu uwayilo. Musono, kuprofetizala muchihasa kulumbunuka kulongesa Mbimbiliya chize mukwa-Kristu akulinga. Shina Paulu te kanambe ngwo, pwo katamba kuzala chitambala mashimbu eswe muze malemba hanji malongesa Mbimbiliya? Ka. Alioze, mahasa kuchilinga kulita ni haze analembela ni kulongesa Mbimbiliya.
Mashimbu. Maliji a Postolo Paulu kanasolola yihela yaali, mu chikungulwila ni mu usoko. Iye kambile ngwenyi: “Lunga, iye mutwe wa pwo; . . . pwo mweswe malemba, hanji maprofeteza ni mutwe wenyi kaufukile, malelesa mutwe wenyi.” (Versu 3, 5) Mu usoko Yehova kasakwile lunga hanga apwe mutwe wa pwo. Alioze pwo mahasa kulinga mulimo uze Yehova ahanyine kuli lunga. Nyi pwo machilinga chakuhona kulweza mukwo lunga, iye kanamukolesa sonyi. Chakutalilaho, nyi pwo kanasongwela longeso lia Mbimbiliya kulutwe lia mukwo-lunga, iye mahasa kusolola ngwo kakuvumbika chiyulo cha mukwo-lunga ha kuzala chitambala hanji kufuka ku mutwe. Pwo mahasa kuchilinga chipwe ngwe lunga hanamupapachisa chipwe ka, mumu iye kali mutwe wa usoko. * Nyi pwo malemba hanji malongesa kulutwe lia mwanenyi wa lunga wa kanuke yoze hanamupapachisa, katamba kufuka ku mutwe hanji kuzala chitambala, chino kuchishi kulumbunuka ngwo mwanenyi kali mutwe mu usoko, alioze ha mukunda wa chiteli chize ahanyine kuli malunga waze hanapapachisa mu chikungulwila cha kwa-Kristu.
Postolo Paulu kanatongola chikungulwila ha kwamba ngwenyi: ‘Alioze nyi kachi umwe masoloka mukwa pami, etu kutushi ni ndako yacho, chipwe yikungulwila ya Zambi.’ (Versu 16) Mu chikungulwila cha kwa-Kristu, yiteli kakuyihana kuli malunga waze hanapapachisa. (1 Timoteu 2:11-14; A-Hepreu 13:17) Malunga e akusakula wika hanga apwe tuvumbi hanji makulwana a mu chikungulwila hanga alinge yiteli yize Zambi akwaha ya kufunga mapanga Jenyi. (Yilinga 20:28) Ha mashimbu amwe, mapangi kakwaha yiteli yize te yatela kulinga kuli malunga waze hanaapapachisa. Chakutalilaho, ayo mahasa kusongwela kukunguluka cha kuya mu munda muze kukushi niumwe lunga yoze hanamupapachisa nawa wajama mu chikungulwila. Hanji kusongwela longeso lia Mbimbiliya kulutwe lia umwe ndumbu yoze hanamupapachisa. * Milimo yeswe ai yili ya mu chikungulwila cha akwa-Kristu, kashika pangi katamba kusa chitambala ku mutwe hanga asolole ngwenyi kanalinga mulimo uze te watela wika kulinga kuli umwe ndumbu wa lunga.
Chikwo nawa, kuli yuma yikwo mu uwayilo wetu yize kuyishi kufupiwa kusa chitambala ku mutwe. Chakutalilaho, ha kuhana kumbululo ku kukunguluka chetu, muze mambujola ku zuwo ni zuwo hamwe ni lunga lienyi hanji ni umwe ndumbu yoze hanamupapachisa hanji muze malongesa ni kulemba ni ana jenyi waze kanda achaapapachisa. Chochene, mukuhasa kusoloka yihula yinji hakutwala ku chikuma chino. Nyi umwe pangi kali ni chihula, mahasa kuhengwola hanga awane kumbululo. * Chipwe chize, nyi wamona ngwe mbunge ye yinakupinjisa muhasa kuzala kwe chitambala, hi chipi ko kuzala chitambala, ngwe chize anasolola ha chizulie chino.
Mumu liaka. Ha versu 10, twawanaho yikuma yaali yize yakulingisa pwo mukwa-Kristu akaule shimbi yinambe ngwo: “Ha chikuma chino chatamba pwo akapwe ni chinyingi [chilayi] cha kuzeyela ha mutwe wenyi, ha mukunda wa angelo.” Chitangu tala liji “chinyingi cha kuzeyela.” Kusa chitambala ku mutwe yili jila yize pwo akusolwelamo ngwenyi, kakutayiza chiyulo chize Yehova ahanyine kuli malunga a mu chikungulwila waze hanapapachisa. Nyi malinga chino, masolola zango ni ushishiko wenyi kuli Yehova Zambi. Chamuchaali, “ha mukunda wa angelo.” Kuchi chikuma chakusa chitambala ku mutwe chinatale hali angelo?
Angelo kakuwahilila ha kunyingika ngwo, wata wa Yehova kakuulemesa mu ululikiso wenyi hano hashi ni mu malilu. Ayo nawa kakuyuka chinji ha chilweza chipema chize atu yivulumunyi akuhana hakutwala ku chikuma chino. Angelo ni no katamba kuvumbika shimbi ya Yehova hakutwala ku wata, mumu angelo anji ku mashimbu akunyima kehukile shimbi yino. (Yundase 6) Angelo kota kakumona chize mapangi ajama, ali ni yinyingi nawa ni mana anji, kuhiana umwe ndumbu mu chikungulwila yoze hanamupapachisa; chipwe chocho, mapangi kakulikehesa ha chiyulo cha mandumbu a malunga. Muchihasa kupwa hanji umwe wa kuli pangi jacho kali mukwa-Kristu wa kuwayisa yoze makayula hamwe ni Kristu. Pangi yono makapwa ni chiteli chinene kuhiana angelo nawa makayula hamwe ni Kristu mu malilu. Chino chili chilweza chipema chize angelo akumona! Chochone, mapangi jetu kakusolola ngwo kakuzeya ni kushishika, nawa chili chiwape chinji kuli ayo ha kusolola kwononoka ni kulikehesa cho kuli tununu a tununu a angelo ashishika!
^ kax. 3 Pwo mukwa-Kristu katambile kulemba ni liji mwilu kulutwe lia lunga lienyi mukwa-Kristu, alioze mahasa kuchilinga nyi lunga lienyi keshi kuhasa kuhanjika hamukunda wa yimwe yikola.
^ kax. 6 Alioze nyi umwe pangi kanasongwele longeso lia Mbimbiliya hamuwika ni mukwa-kwambujola wa lunga yoze kanda achimupapachisa, nawa hi mukwo-lunga ko, mahasa kusongwela chakuhona kafuka ku mutwe.
^ kax. 7 Mba unyingike nawa, tala Kaposhi wa Kutalila 15 wa Fevereiro wa 2015, lifwo 30; 15 wa Julho wa 2002, mafwo 26-27, ni wa 15 wa Agosto wa 1977, mafwo 509-512.
