1, 2. Mumu liaka Yehova akuwahilila muze akumona tachi jize twakusa hanga tupwe ni mbunge yipema? Lumbununa.

ACHINYONGA, umwe mama ni mwanenyi wa lunga kali mu loja. Hi susumuku mwana mamana ni kukomoka cheswe. Kanakwata chimwe chuma cha kuheha nacho, chize anda mu loja. Alioze kavulama kuchisa ha chihela chawo hanji kwita kuli naye hanga amulanjilecho. Aye malipikala ni kwita kuli naye hanga amukwase. Naye mamuhumikiza ni kumutwala cheka mu muzwo lia kulanjishila hanga afunyise chuma chacho ni kwita ukonekeno. Muze mwana malinga chino, naye mevwa chiseke ni kwahilila chinji hali mwanenyi. Mumu liaka?

² Chakuneha chiseke kuli yisemi ha kumona chize anajo akulilongesa kupwa ni mbunge yipema. Ni Tata yetu wa mu malilu, “Zambi ya umwenemwene,” neye che akwivwa. (Samu 31:⁠5) Iye kakuwahilila chinji ha kumona tachi jize twakusa hanga tupwe ni mbunge yipema ni kukola mu ufulielo. Tunazange kumwivwisa kuwaha ni kununga mu zango lienyi, ngwe chize Paulu ambile ngwenyi: “Tunazange kwenda kanawa ha kutwala ku yuma yeswe.” (A-Hepreu 13:18) Tutalenu yikuma yiwana ya ku mwono wetu yize muyihasa kupwa yikalu ha kusolola mbunge yipema. Mba hi mutumona yiwape yize mutuhasa kupwa nayo.

3-5. (a) Kuchi Liji lia Zambi linatutoweza hakutwala ku utoji wa kulionga yetwene? (b) Yika muyitukwasa kupwa ni mbunge yipema?

³ Chuma chitangu twatamba kulilongesa chili, kupwa ni mbunge yipema kuli yetwene. Ha mukunda wa shili, mutuhasa kulionga yetwene. Ha chino, Yesu kambile ku chikungulwila cha akwa-Kristu mu Laotisea ngwenyi, te kanaliongo ayo ene ha kunyonga ngwo kali pichi, alioze ku spiritu te kali ‘yiswale, tupuputa, nawa ni uselesele,’ kwamba pundu te keshi kanawa. (Usolwelo 3:17) Kulionga cho chapinjishile chinji mwono wo.

⁴ Twiwulukenu ngwetu, postolo Tiangu katowezele ngwenyi: “Nyi kachi umwe malishinginyeka kupwa mukwa shindakenyo, shimbu keshi kuhombola limi lienyi, awo kakwonga mbunge yenyi mwene, shindakenyo ya yono mutu yamokomoko.” (Tiangu 1:26) Nyi twanyonga ngwetu Yehova mahasa kutayiza uwayilo wetu chipwe twazachisa chipi limi lietu tunalionga. Uwayilo wetu kuli Yehova muupwa wamokomoko. Yika muyihasa kutukwasa kwehuka kapinda yono?

⁵ Ha chisoneko chino, Tiangu kanatese umwenemwene wa mu liji lia Zambi ni katalilo. Tiangu kanatutoweza hanga tulitale mu shimbi jingunu ja Zambi ni kwalumuna yitanga yetu. (Tanga Tiangu 1:​23-25.) Mbimbiliya muyihasa kutukwasa kupwa ni mbunge yipema ni kulinga yize twatamba hanga tupemese mwono wetu. (Lungungu wa Jeremia 3:40; Hagaia 1:⁠5) Mutuhasa nawa kulemba kuli Yehova hanga atukwase kuhengula mbunge yetu ni kwambulula kapinda mweswawo tuli nenyi ni kwalumana mwono wetu. (Samu 139:​23, 24) Kuhona kupwa ni mbunge yipema chili ulelu uze muuhasa kutupiangula. Twatamba kupwa ni nyonga ngwe lia Tata yetu wa mu malilu hakutwala ku chikuma chino. Mukanda wa Yishima 3:32 unambe ngwo: “Mukwa kupihia kapwa chizelwokeso kuli Yehova, alioze kakulikata ni mukwa ululi.” Yehova mahasa kutukwasa kupwa  ni nyonga ngwe lia iye nawa ni kulinyonga yetwene ngwe chize iye akutunyonga. Twiwulukenu ngwetu, Paulu kambile ngwenyi: “Tunazange kwenda kanawa ha kutwala ku yuma yeswe.” Yetwe kutuchi kuhasa kupwa angunu liakulu, alioze tunazange pundu kupwa ni mbunge yipema nawa twakusa tachi jinji hanga tuchilinge.

6. Mumu liaka waze alimbata katamba kupwa ni mbunge yipema, upi uka atamba kwehuka?

⁶ Kusolola mbunge yipema chatamba kupwa chitanga chilemu kuli asoko akwa-Kristu. Lunga ni pwo katamba kulisolwela mbunge yipema ni kuhanjika umwenemwene kuli umwe ni mukwo. Mu ulo, mukwa-Kristu katambile kupwa ni yitanga ya luchisa, ngwe kutenya-tenya mutu yoze kalimbachile nenyi, kupwa ni usendo kutenga ha Internet chipwe kutala yizulie ya sonyi. Amwe akwa-Kristu alimbata kakulinga yuma yino ni kuswekela yoze alimbata nenyi. Chino chili kuhona kusolola mbunge yipema. Mwanangana Ndawichi kambile ngwenyi: “Chatwamine hamwe ni atu amokomoko; chipwe akwa kalimbalimba chichi kulifutula no.” (Samu 26:4) Nyi hiwambata hanji hiwaya kulu ulo, kanda uswekela yoze walimbata nenyi yuma yize wakulinga.

7, 8. Yilweza yika ya Mbimbiliya muyihasa kukwasa ana kulilongesa ulemu wa kupwa ni mbunge yipema?

⁷ Yisemi akwete mana kakuzachisa yilweza ya mu Mbimbiliya hanga alongese ano kupwa ni  mbunge yipema. Mahasa kutongola yilweza yipi ngwe ya Akane, yoze waswekele yuma yize eyile; ni Ngehaze, yoze waliongele hanga atambule upite; ni cha Yundase, mwiji nawa yoze wakunjikile Yesu.​—Yoshua 6:17-19; 7:11-25; 2 Mianangana 5:14-16, 20-27; Mateu 26:14, 15; Yoano 12:6.

⁸ Chikwo nawa, mahasa kutongola yilweza yipema ngwe ya Yakomba, yoze wetele kuli ana jenyi hanga afunyise mbongo jize awanyine mu njeke jo; mumu kuli iye kota mbongo jacho kajiselemo chakuhona kujinyingika; ni chilweza cha Jefeta ni mwanenyi; ayo kalingile tachi jinji hanga amanunune chilakenyo chize alingile; ni cha Yesu, yoze walihanyine ni hamu lieswe ni kulisolola ha kachi ka mbunga yipi hanga amanunune uprofeto nawa ni kufunga masepa jenyi. (Uputukilo 43:12; Akwa Kuyula 11:30-40; Yoano 18:3-11) Yilweza yino yikehe muyihasa kukwasa yisemi kulongesa ano yikuma yilemu yize tunawane mu Liji lia Zambi hanga azange kupwa ni mbunge yipema ni kuyilemesa.

9. Yika yisemi atamba kulinga nyi kanazange kupwa yilweza yipema ha kusolola mbunge yipema kuli ano, nawa mumu liaka chino chili chilemu?

⁹ Kulongesa ana kupwa ni mbunge yipema chili chuma chilemu chinji kuli yisemi. Postolo Paulu kahulile ngwenyi: ‘Yena wakulongesa mukwenu, kushi kulilongesa yena mwene, nyi? Yena wakwambujola ngwe, Mutu kanda akeya, yena mwene wakwiya, nyi?’ (A-Roma 2:21) Yisemi amwe kakulongesa anajo hanga apwe ni mbunge yipema, alioze ayo ene keshi kuchilinga. Ha mashimbu amwe ayo kakukalila wiji ni saki ha kwamba ngwo: “Aha, ene akwa-mulimo kananyingika ngwo atu kakwanda yuma yacho” hanji nawa ngwo ­“Kanda upalako, ndambu yasaki wika.” Kwamba umwenemwene, wiji we wiji lume, kukushi wiji ukehe hanji unene; nawa saki je saki lume, kukushi saki jikehe hanji jinji. *  (Tanga Luka 16:10.) Chili chashi ana kumona ulembekese wa yisemi jo nawa chino muchihasa kwaapinjisa chinji. (A-Efwesu 6:⁠4) Alioze, nyi yisemi mapwa ni mbunge yipema ni ano mahasa kulilongesa kusolola mbunge yipema nawa muze makola mahasa kufumanyisa Yehova mukachi ka atu anji waze keshi kusolola mbunge yipema.​—Yishima 22:⁠6.

10. Ha kuhanjika ni mandumbu jetu, yika twatamba kusela shindakenyo?

¹⁰ Kukunguluka ni mandumbu jetu chakutukwasa kusolola mbunge yipema ni umwenemwene. Ngwe chize twalilongesa mu Kapitulu 12, twatamba kusa ushindakenyo ha chize twakuhanjika, chipi-chipi ni mandumbu jetu akwa-Kristu. Kuhanjika chetu muchihasa kupwa cha saki hanji cha mahuza. Nyi twapwa ni ndako yakwamba yuma yize kutushi ni shindakenyo, mutupwa akwa-mahuza. Kashika chili chilemu kufunga limi lietu. (Yishima 10:19) Chikwo nawa, mutuhasa kunyingika yimwe yuma yize yili yamwenemwene, alioze chino kuchalumbunukine ngwo twatamba kuyihanjika. Chakutalilaho, ngwe yuma yize kuyatutalile, hanji yuma yize yili yikalu kuhanjika. (1 A-Tesalonika 4:11) Atu amwe kakuhanjika ni kukalumioka ni kulikalila ngwo achize kanahanjika umwenemwene ni kusolola mbunge yipema, alioze yetu twatamba kupwa yimbovu ni zango hakuhanjika.​—Tanga A-Kolosu 4:⁠6.

11, 12. (a) Yika amwe akulinga muze havulumuna? (b) Mahuza aka Satana akuvundula, nawa kuchi mutuhasa kwehuka? (c) Kuchi mutuhasa kusolola mbunge yipema ku ululikiso wa Yehova?

 ¹¹ Chili chilemu kuhanjika umwenemwene kuli waze akusongwela chikungulwila. Amwe muze malinga yuma yipi kakuzanga kusweka shili yo ni kulionga kuli makulwana muze mahula. Atu jacho kakupwa ni mwono waali, malionga kulingila Yehova, alioze aku kanalingi shili. Kwamba umwenemwene, yitanga yino yakupwisa mutu mukwa-saki. (Samu 12:2) Akwo kakulweza makulwana ndambu ya umwenemwene ni kusweka yuma yikwo. (Yilinga 5:1-11) Yitanga yino ya mahuza yakusoloka ha kutayiza mahuza a Satana.​—Tala kasha “ Saki ja Satana Hakutwala ku Shili,” ha mafwo 164-165.

¹² Chili nawa chilemu kusolola mbunge yipema muze mutuhana sango ku ululikiso wa Yehova ha kukumbulula yihula yize yakwiza ha mapapilo. Chakutalilaho, ha kusoneka sango ja mu munda, kutwatambile kulumba yuma yize kutwalingile. Chizechene nawa, muze mutusoneka umwe mukanda hanga tunjile mu mulimo wa shimbu lieswe, kanda tulionga hakutwala ku chize twapwa ku mujimba hanji ku chuma cheswacho cha ku mwono wetu.​—Tanga Yishima 6:16-19.

13. Kuchi mutuhasa kusolola mbunge yipema ha kulinga mingoso ni mandumbu jetu akwa-Kristu?

¹³ Kuhanjika umwenemwene ni mandumbu jetu akwa-Kristu necho chinatale ha yikuma ya mingoso. Ha mashimbu amwe akwa-Kristu kakulinga mingoso ni akwa-Kristu akwo. Ayo katambile kuchinga mingoso yo ni milimo yize akulingila Zambi mu Zuwo lia Wanongana ni mu munda. Mu mingoso yacho, umwe mahasa kupwa mwata mu mukwo hanji mukwa-kukalakala. Nyi twahana umwe mulimo kuli umwe ndumbu, twatamba kuhanjika nenyi umwenemwene, ni kumwaha fweto lienyi lialita nawa ha tangwa lialita, ni yuma yeswe yize twalitesele ni yize shimbi  yakwita. (1 Timoteu 5:18; Tiangu 5:1-4) Alioze, nyi twakukalakalila umwe ndumbu, twatamba kukalakala kulita ni chize twalitesele nenyi. (2 A-Tesalonika 3:10) Kutwatambile kunyonga ngwetu mwata wetu katamba kutusa ulemu unji, kutwaha matangwa akuhwima ni yuma yikwo, kuhiana atu akwo ku mulimo ha mukunda wa kupwa ndumbwetu.​—A-Efwesu 6:​5-8.

14. Muze akwa-Kristu analingi mingoso, yika atamba kusela shindakenyo, nawa mumu liaka?

¹⁴ Yika mba mutwamba hakutwala ku mungoso uze ndumbu akutambula kongo? Mbimbiliya yinambe yimwe shimbi yilemu chinji ngwo: Ndo kusoneka yuma yeswe ha lifwo. Chakutalilaho, muze Jeremia alanjile chimwe chihela, iye kasonekene mikanda yaali, yize yapwile ni yela nawa yayitulika. (Jeremia 32:9-12; tala nawa Uputukilo 23:16-20.) Kashika ha kulinga mingoso ni mandumbu twatamba kusoneka umwe mukanda hamwe ni yela hanga asele shindakenyo. Chino chakukwasa hanga kuhone kupwa kalumbanganyiso, hanji vunda yize muyihasa kuhandununa mandumbu. Mandumbu eswe waze akulinga mingoso ni mandumbu katamba kunyingika ngwo hi chipema ko kupihisa sambukila mu chikungulwilala ha mukunda wa mbongo. *​—1 A-Korindu 6:1-8.

15. Kuchi Yehova akwivwa hakutwala ku mingoso ya kalimba-limba, nawa kuchi akwa-Kristu akunyonga hakutwala ku yitanga yacho?

¹⁵ Mukwa-Kristu katambile kusolola wika mbunge yipema mu chikungulwila. Postolo Paulu kambile ngwenyi: “Tunazange kwenda kanawa ha kutwala ku yuma yeswe.” (A-Hepreu 13:18) Sakatanga wetu neye kanazange hanga tusolole mbunge yipema ha mingoso yize mutulinga ni atu waze hi  Yela ja Yehova ko. Mukanda wa Yishima unahanjika yisuho yiwana hakutwala ku mbalansa ya kwonga. (Yishima 11:1; 20:10, 23) Kushakulu, atu te kakuzachisa mbalasa ha mingoso yo hanga apezale yikumba ni mbongo jize te akulanda nayo yuma. Akwa-mingoso waze te keshi ni mbunge yipema te kakuzachisa mbalasa jaali, alioze yize te kuyishi kulita, ye te akwonga nacho atu. * Yehova keshi kuzanga yitanga yino! Mba tupwe mu zango lienyi, twatamba kulituna yitanga yeswe ya mingoso yize kuyishi kusolola mbunge yipema.

16, 17. Mutapu uka wa kalimbalimba wakusoloka hano hashi, nawa yika akwa-Kristu amwenemwene atamba kulinga?

¹⁶ Satana kali mwata wa hano hashi, kashika kutwatambile kukomoka ha kumona chize atu akuhona kusolola mbunge yipema. Matangwa eswe mutuhasa kupalika mu yeseko ya kusolola mbunge yipema. Atu muze akusoneka mikanda hanga apwe ni milimo, ayo kakulionga chinji, kakulumba yuma, ni kutongola milimo yize kanyingikine. Akwo ha kusoneka mikanda yize nguvulu akwita, hanji kufuta lijimu ni yuma yikwo, kanji-kanji kakuhanjika yuma ya saki hanga apwe ni yize anazange. Alongi anji kakwonga malongeshi muze analingi yijimbikilo ku shikola, ngwe kuya ha internet ni kulinga kopia ya milimo ya mutu mweka ni kuyisolola ngwe ni yenyi. Nawa muze atu akuwana waze akwete ndako ya kalimbalimba, chakupwa chashi kwonga hanga ehe yize anazange. Yuma yacho yakulingiwa chinji hano hashi haze “atu akulifwila ene, akwa kufwila mbongo, keshi kufwila yipema.”​—2 Timoteu 3:1-5.

¹⁷ Akwa-Kristu amwenemwene kakulinga yeswe yize mahasa hanga ehuke ndako jino. Hano hashi, atu waze keshi ni mbunge jipema kakusoloka ngwe kali ni yuma yeswe yize akufupa, nawa ngwe kakutwama kanawa. (Samu 73:​1-8) Hanji ha mashimbu jacho akwa-Kristu kanahono mbongo  mumu kanazange kwenda kanawa “ha yuma yeswe.” Shina tachi jize twakusa jili jamokomoko? Ka! Mumu liaka? Yiwape yika mutuzuka nyi twasolola mbunge yipema?

18. Mumu liaka lufuma mupema ni mbunge yipema yili ni ulemu unji?

¹⁸ Mbunge yipema ni lufuma mupema yili yuma yilemu chinji ku mwono, kuhiana yeswawo. (Tala kasha “ Shina Nakusolola Mbunge Yipema?” ha lifwo 167.) Nyonga ha chino, mutu weswawo mahasa kupwa ni lufuma wacho! Chino kuchishi kutala ha yinyingi, upite, chifwa hanji ha malongeso waze tuli no hanji yuma yikwo. Chipwe chocho, chili chikalu chinji kupwa ni lufuma mupema. (Mika 7:2) Amwe mahasa kutuyenga-yenga hamukunda wa kusolola mbunge yipema, akwo mawahilila, ha chino atu mafuliela hali yena ni kukuvumbika. Yela ja Yehova anji kakuyuka chinji ha kusolola mbunge yipema. Akwo kakununga ku milimo muze atu waze akalakala no akwaahanga ha mukunda wa mbunge yo yipi, akwo nawa kawanyine milimo muze mwata wa milimo apwile ni kufupa atu waze ali ni mbunge yipema.

19. Kuchi yitanga ya mbunge yipema yakutwa ha mbunge yetu yitoma ni usepa wetu kuli Yehova?

¹⁹ Chipwe ngwe chino muchilingiwa kuli yena chipwe ka, mumona ngwe mbunge yipema yakuneha yiwape yinji. Yena muupwa nawa ni mbunge yitoma. Paulu kasonekene ngwenyi: “Tunakunuka mbunge yipema.” (A-Hepreu 13:18) Nawa, Tata yetu wa mu malilu kakumona chize twakusolola mbunge yipema, iye nawa kakuzanga atu waze ali ni mbunge yipema. (Tanga Samu 15:1, 2; Yishima 22:1.) Kupwa ni mbunge yipema muchitukwasa kununga mu zango lia Zambi, chino chili chiwape chilemu chinji chize mutu mweswe anazange kupwa nacho. Mu kapitulu yoze masulaho mutuhengwola chikuma chize chinatale ha kupwa ni mbunge yipema: Nyonga lia Yehova hakutwala ku milimo.