1, 2. Chihula chika mutushimutwina, nawa mumu liaka?

NYI hiwambata hanji hiwaya ulo, shina wakuwahilila mu ulo we, nyi wakupinda chinji ni mutu yoze walimbata nenyi? Shina unanungu wika mu ulo we alioze kuushi ni kuwahilila? Nyi chenacho, kota unanenganyana mumu zango lienu linakeketela. Unazange hanga ulo we ulemese Yehova, Zambi yetu yoze twazanga mumu tuli akwa-Kristu. Kashika wakulihulumba ni kunenganyana muze muupwa ni yipikalo mu ulo we. Alioze nyi chino chalingiwa, kanda unyonga ngwe kuuchi kuhasa kuhwisa kapinda wacho.

² Musono, tuli ni akwa-Kristu anji, waze ku mashimbu akunyima te keshi ni chiseke mu ulo wo. Alioze, amwe yawana jila yakukoleselamo ulo wo. Ni yena muhasa kuwahilila ni ulo we. Kuchi muhasa kuchilinga?

3, 4. Mumu liaka waze alimbata nyi makundama kuli Zambi, o makundama kuli umwe ni mukwo? Lumbununa.

³ Yena ni yoze walimbata nenyi, munuhasa kukundama kuli umwe ni mukwo nyi nwasa tachi hanga nukundame kuli Zambi. Mumu liaka? Tutalenu chilweza chino: Achinyonga umwe mulundu unene nawa usuku chinji. Lunga kali sali limwe lia mulundu, pwo neye kali sali likwo lia mulundu. Mba hi muwaali wo maputuka  kukanduka. Muze o achili mushi lia mulundu kuli yimwe tando yinene yize yinahandununa. Alioze muze maya nikukanduka ndo helu lia mulundu, tando yacho muyiya ni kukeha. Shina wamona longeso lipema lize lili ha chilweza chino?

⁴ Tachi jize wakusa hanga ulingile Yehova ni mbunge yeswe, chili ngwe tachi jize mutu akusa ha kunyina umwe mulundu. Amu yena wakuzanga chinji Yehova, unase tachi jinji hanga unyine ha mulundu wacho. Alioze nyi walihandununa ni yoze walimbata nenyi, muchipwa ngwe mutu ni mutu kanakanduka sali lia lisa lia mulundu. Yika muyilingiwa ni wanunga ni kukanduka? Ku uputukilo mukuhasa kupwa umwe usuhwe hakachi kenu. Alioze muze munusa tachi hanga nukundame kuli Zambi ha  kukanduka mulundu ndo helu, chino muchinukwasa kukundama kuli umwe ni mukwo. Kukundama kuli Zambi yili jila yipema ya kukundama kuli mukwenu-pwo hanji mukwenu-lunga. Mba kuchi munuhasa kuchilinga?

5. (a) Mu jila yika muhasa kukundamina kuli Yehova ni kuli yoze walimbata nenyi? (b) Kuchi Yehova akumona ulo?

⁵ Jila yilemu yakunyinyinamo mulundu yili kutayiza shimbi ja mu Liji lia Zambi hakutwala ku ulo. (Samu 25:4; Izaia 48:17, 18) Tutalenu chiyulo chize postolo Paulu ahanyine. Aye kambile ngwenyi: “Umbachiso akaulemese kuli eswe.” (A-Hepreu 13:4) Yika chino chinalumbunuka? Liji “akaulemese” linalumbunuka chuma chilemu. Yehova kanazange hanga tumone ulo ngwe chuma chilemu.

6. Yika chiyulo cha Paulu chinasolola pundu hakutwala ku ulo, nawa mumu liaka chili chilemu kuchinyingika?

⁶ Tuvumbi ja Zambi kananyingika ngwo ulo uli chuma chilemu, nawa chisandu. Yehova mwe walingile ulo. (Tanga Mateu 19:4-6.) Alioze nyi mu ulo mwapwa yipikalo, kunyingika wika ngwo ulo uli ulemu kota kuchichi kukukwasa kusolola zango ni vumbi hali yoze walimbata nenyi. Yika muyikukwasa kuchilinga? Sela shindakenyo ha yize Paulu ambile hakutwala ku chikuma chakusolola ulemu. Iye kakambile ngwenyi, “umbachiso uli ulemu” alioze kambile ngwenyi, “umbachiso akaulemese.” Paulu te kaso kuhanjika wika, iye te kanahane umwe utowezo. * Kunyingika kalisa yono muchikukwasa kuzanga chinji mutu yoze walimbata nenyi. Mumu liaka mutuhasa kwamba chocho?

7. (a) Shimbi jika wakukaula, nawa mumu liaka? (b) Nawa yuma yika yipema muyihasa kulingiwa?

⁷ Achinyonga ndambu chize yena wakulemesa shimbi  jikwo ja Mbimbiliya, ngwe, shimbi yakutayisa tumbaji hanji ya kukunguluka hanga tuwayile Zambi. (Mateu 28:19; A-Hepreu 10:24, 25) Kwamba pundu, ha mashimbu amwe chakupwa chikalu kukaula shimbi jino. Atu waze wakwambulwila sango lipema hanji keshi kupanjika, nawa hanji mulimo we wa ku musunya wakukuhongesa chinji ni kukuhwisa mashimbu a kukunguluka. Chipwe chocho, yena wakununga ni kwambujola sango lia Wanangana ni kukunguluka. Niumwe mahasa kukukwika kuchilinga wakuhi chipwe mwe Satana! Mumu liaka? Mumu zango lie lingunu hali Yehova liakukukwasa kwononokena shimbi jenyi. (1 Yoano 5:3) Yika yakulingiwa? Kwambujola sango lipema ni kukunguluka muchikwaha sambukila ku mbunge ni uwahililo unji mumu unanyingika ngwe unalinga upale wa Zambi. Ha chino yuma yino yakuneha tachi. (Nehemia 8:10) Yika twalilongesa ha chino?

8, 9. (a) Yika muyihasa kukukwasa kulemesa ulo we nawa mumu liaka? (b) Kuchi yena muhasa kulemesa ulo we?

⁸ Ngwe chize zango lie lingunu hali Zambi liakukukwasa kwononoka shimbi ya kwambujola ni kukunguluka chipwe mukupwa kapinda, chizechene nawa zango lie hali Yehova mulihasa kukukwasa kwononokena shimbi ya Mbimbiliya ya ‘kulemesa umbachiso’ chipwe muze mukupwa yipikalo. (A-Hepreu 13:4; Samu 18:29; Chilumbununyi 5:4) Chikwo nawa, ngwe chizechene Yehova akuwahisa tachi jetu ja kwambujola ni kukunguluka, chizechene nawa iye kakumona ni kuwahisa tachi je ja kulemesa ulo we.​—1 A-Tesalonika 1:3; A-Hepreu 6:10.

⁹ Kuchi yena muhasa kulemesa ulo we? Watamba kwehuka yitanga yipi yize muyihasa kupihisa usendo we ni mutu yoze walimbata nenyi ni kusa tachi hanga ukolese usendo wenu mu ulo.

10, 11. (a) Yitanga yika yakulelesa ulo? (b) Chihula chika yena watamba kuhula kuli yoze walimbata nenyi?

¹⁰ Limwe tangwa umwe pangi mukwa-Kristu yamba ngwenyi: “Nakulemba kuli Yehova hanga angwehe tachi hanga nguhase kujikiza ha lamba lize nakumona.” Yika yenayo? “Lunga liami kakungulemeka ku mbunge ni maliji api. Chishi ni yimbandu ya kungulamba ku mujimba alioze maliji jenyi akalu akwamba ngwo, ‘Yena uli pwo ena! Yena kuushi ni ulemu!’ Maliji wano kakuhichika mbandu jinene ku mbunge yami.” Pwo yono katongola kapinda yoze wakwiza ha kuzachisa chipi limi.

¹¹ Chakupwa chipi chinji ha kumona akwa-Kristu waze alimbata malizwelesa umwe ni mukwo ni kuliamba-mba maliji api, waze akulemeka ku mbunge chakuhona kuuka! Pundu lume mu ulo muze mwakupwa maliji api kumushi ulemu. Kuchi ulo we uli hakutwala ku chikuma chino? Mba uchinyingike watamba kuhula yoze walimbata nenyi ngwe: “Kuchi wakwivwa maliji jami?” Nyi kutala iye kakwivwa chinyengo ha maliji waze wakuhanjika, watamba kwalumuna ndako ye ya kuhanjika.​—A-Ngalashia 5:15; tanga A-Efwesu 4:31.

12. Kuchi uwayilo wa mutu muhasa kupwa wamokomoko ku meso ja Zambi?

¹² Iwuluka ngwe, chize wakuhanjika ni mukwenu pwo hanji mukwenu lunga chili chilemu ha usendo we ni Yehova. Mbimbiliya yinambe ngwo: ‘Nyi umwe mutu mashinginyeka ngwenyi, kali mukwa-kuwayila Zambi, alioze keshi kufunga limi lienyi, iye kakwonga mbunge yenyi mwene, uwayilo wa yono mutu uli wamokomoko.’ (Tiangu 1:26) Kuhanjika che kanda chilisa ni uwayilo we. Mbimbiliya kuyishi kwamba ngwo mutu mahasa kulinga yeswayo mazanga ku zuwo nganda kuwayila Zambi.  Lisesa kanda ulilionga yena mwene. Chino chili chikuma chilemu chinji. (Tanga 1 Petulu 3:7.) Chipwe ngwe ukwete umwe utotombo ni zango linji lia kulingila Zambi, nihindu nyi wapwa ni kulemeka mukwenu ni maliji api, kuunalelesa ulo we, nawa ni we uwayilo we kuli Zambi kuuchi kupwa ni ulemu niumwe.

13. Kuchi mutu mahasa kuvwisa yinyengo yoze alimbata nenyi?

¹³ Nawa, waze alimbata katamba kulifunga hanga achine kuvwisa akwo yinyengo. Tala yilweza yaali: Umwe mama twamishi maputuka kutelefonala mashimbu eswe kuli umwe ndumbu yoze uli ni pwo hanga amwite ukwaso, o mahanjika ha mashimbu anji; nawa umwe ndumbu twamishi maputuka kutuhuka mashimbu eswe mu munda ni umwe pangi yoze uli ni lunga lienyi. Atu alimbata waze twatongola mu yilweza yino, kota te kali ni nyonga lipema, alioze kuchi yuma yize analinga muyihasa kutwa kuli waze alimbata no? Umwe pwo yoze wapalikile mu yuma yino, yamba ngwenyi: “Nakwivwa yinyengo muze nakumona lunga liami masolola zango linji kuli umwe pangi mu chikungulwila. Nakwivwa ngwe kuchishi ni ulemu kuli iye.”

14. (a) Kuchi shimbi yili mu Uputukilo 2:24 muyihasa kukwasa waze alimbata? (b) Chihula chika muhasa kulihula?

¹⁴ Hi chipi ko nyi mutu yoze walimbata nenyi mevwa yinyengo muze mapalika mu yuma ngwe yino. Mumu nyi lunga hanji pwo malinga chuma ngwe chino, aye kanehuka shimbi yilemu yize yinambe ngwo: “Lunga mahichika tato ni naye akalalaminye kuli mukwo-pwo.” (Uputukilo 2:24) Chino kuchishi kulumbunuka ngwo waze alimbata kechi kuvumbika nawa yisemi jo, alioze Zambi kakuzanga hanga o alihulikile chitangu kuli waze alimbata no. Chizechene nawa, akwa-Kristu kakuzanga mandumbu jo, alioze katamba kuzanga chinji waze alimbata no. Kashika, muze mukwa-Kristu yoze hambata hanji uli ku  ulo, mapalikisa chinji mashimbu ni ndumbu yoze hi pwo lienyi ko hanji hi mukwo-lunga ko, chino chakuneha yipikalo mu ulo. Shina chino muchihasa kuneha kapinjiso mu ulo we? Lihule ngwe: ‘Shina nakusolola zango ni kupalikisa mashimbu anji ni yoze nalimbata nenyi?’

15. Kulita ni Mateu 5:28, mumu liaka akwa-Kristu katambile kusela chinji mbunge kuli mutu yoze kalimbachile nenyi?

 ¹⁵ Chikwo nawa, akwa-Kristu waze akusa chinji mbunge kuli mutu yoze kalimbachile nenyi, kakulisa mu ponde. Amwe akwa-Kristu kakupwa ni zango lia ulo kuli mutu yoze kalimbachile nenyi hakupalikisa mashimbu anji ni mutu wacho. (Mateu 5:28) Ha chino, amwe hanalingi yuma yize yakulelesa ulo. Tutalenu yize postolo Paulu ambile hakutwala ku chikuma chino.

16. Utowezo uka Paulu ahanyine hakutwala ku ulo?

¹⁶ Muze Paulu ahanyine utowezo unambe ngwo, “umbachiso akaulemese kuli eswe” yamba nawa ngwenyi: “Muhela kanda akausela ku luchisa: mumu mapangala ni yitanji Zambi kumakaapatwila.” (A-Hepreu 13:4) Paulu kazachishile liji “muhela” hanga alumbunune kulisumbakenya cha pwo ni lunga. Kulisumbakenya chacho ‘chalinanga’ nyi muchilingiwa wika mu ulo. Kashika akwa-Kristu akwononokena maliji anambe ngwo: “Wahilila ni pwo wa ukweze we.”​—Yishima 5:18.

17. (a) Mumu liaka manyonga waze atu anji ali no katambile kupiangula akwa-Kristu? (b) Kuchi mutuhasa kukaula chilweza cha Yombi?

¹⁷ Atu waze akulisumbakenya ni waze kalimbachile no, kakusolola ngwo keshi kuvumbika shimbi ja Zambi. Atu anji musono kakutayiza upangala. Alioze, manyonga waze atu akwo ali no hakutwala ku upangala, katambile kwalumuna manyonga waze tuvumbi twa Zambi ali no hakutwala ku chikuma chino. Akwa-Kristu amwenemwene kananyingika ngwo Zambi wika mwe ‘makaapatwila mapangala ni yitanji.’ (A-Hepreu 10:31; 12:29) Kashika akwa-Kristu amwenemewene, kali ni nyonga ngwe lia Yehova hakutwala ku chikuma chino. (Tanga A-Roma 12:9.) Iwuluka yize ambile kalamba Yombi ngwenyi: “Nakolesele  shingo nyi meso jami.” (Yombi 31:1) Ha chino, akwa-Kristu, hanga achine kulinga utanji, ayo kakufunga meso jo, nawa keshi kutala mutu yoze kalimbachile nenyi nyi usolo wakulinga utanji.—Tala Apendice ha mafwo 219-221.

18. (a) Kuchi Yehova akunyonga ha upangala? (b) Kulifwa chika chili ha upangala ni kukombelela mahamba?

¹⁸ Kuchi Yehova akunyonga ha upangala? Shimbi ya Mose yinatukwasa kunyingika chize Yehova akunyonga ha chikuma chacho. Mu Izalele, upangala ni kukombelela mahamba te yili shili yize te yakutwala mutu ku kumushiha. (Ulevi 20:2, 10) Shina tunahase kumona kulifwa chize chili ha yino yuma yaali? Ka-Izalele mweswe yoze te makombelela mahamba te kakwehuka usendo wa Yehova. Chizechene nawa, nyi umwe Ka-Izalele te malinga utanji, iye te kakutanguka usendo uze alingile ni yoze alimbata nenyi. Ha chino, eswe te keshi kushishika. (Kutuhuka 19:5, 6; Shimbi Yamuchiali 5:9; tanga Malakia 2:14.) Kashika, mukwa-kukombelela mahamba ni chitanji te kakutambula shingo kuli Yehova, Zambi wa ushishiko nawa wamwenemwene.​—Samu 33:4.

19. Yika muyihasa kukwasa mutu kupwa ni tachi ja kwehuka upangala, nawa mumu liaka?

¹⁹ Tunanyingika ngwetu, akwa-Kristu keshi nawa mwishi lia Shimbi ja Mose. Chipwe chocho, kunyingika ngwetu, mu Izalele kulinga upangala te shili yinene, chino muchihasa kukolesa hamu lia akwa-Kristu hanga ehuke kulinga utanji. Mumu liaka? Tala chilweza chino: Shina yena muhasa kunjila mu yimwe yingeleja, ni kusa makungunwa hashi hanga ulembe kulutwe lia umwe kaponya? ‘Ka, kuuchi kuhasa kuchilinga!’ Mba nyi makwaha falanga jinji shina muhasa kuchilinga? Kota muhasa kumbulula ngwo: ‘Chichi keza kachilinga!’ Mukwa-Kristu wamwenemwene keshi kunyonga kwehuka Yehova hanga  alembele tuponya. Chizechene nawa, mukwa-Kristu katambile kupwa ni nyonga lia kwehuka Zambi yenyi Yehova ni yoze alimbata nenyi, chipwe ngwe mevwa usolo unji. (Samu 51:1, 4; A-Kolosu 3:5) Kutwazangile kulinga nichimwe chuma chize muchivwisa Satana kuwaha, alioze muchivwisa Yehova chinyengo ni kulelesa ululikiso wa ulo.

20. Yika yakulingiwa mu malo amwe? Lumbununa.

²⁰ Ku chizako chikuma cha kwehuka kulelesa ulo, yika muhasa kulinga hanga ukolese zango ni vumbi hali mutu yoze walimbata nenyi? Mba tukumbulule chihula chino, tulalenu chilweza chino. Tunyongenu ngwe ulo uli limwe zuwo nawa upeme walio uli maliji apema ni yitanga yingunu ni vumbi lia mutu yoze walimbata nenyi. Nyi nwakundama kuli umwe ni mukwo, ulo wenu muupwa ngwe zuwo liakupemesa lize mulinwaha chiseke ni sambukila. Nyi zango lienu liaputuka kutepuluka, upeme wacho muupihia hakehe-hakehe, ha chino ulo wenu muupwa wa yinyengo nawa kuuchi kupwa ni zango ngwe zuwo lize kulishi chiseke. Nyi wazanga kwononokena shimbi ja Zambi ja ‘kulemesa ulo’ yena musa tachi hanga ululieke ulo we. Kashika chili chipema kufunga kanawa ni kululieka ulo. Kuchi muhasa kuchilinga? Liji lia Zambi linambe ngwo: “Kakutungisa zuwo ni mana; kakulikolesa ni malinjekela. Ku yinyingi kakuzalisa yipatulo yayo ni upite upema wa ndando yinene.” (Yishima 24:3, 4) Tutalenu chize mutuhasa kuzachisa maliji wano mu ulo.

21. Yika muyihasa kunukwasa kukolesa ulo wenu? (Tala kasha ha  lifwo 131.)

²¹ Upite upema wa ndando yinene uze watwama mu ulo muze muli uwahililo uli zango liamwenemwene, ufulielo ukolo ni kuvwila Zambi woma. (Yishima 15:16, 17;  1 Petulu 1:7) Yitanga yino yakukolesa ulo. Shina wamona chize upite wa ndando wakuzalisa yipatulo yize anatongola mu mukanda wa Yishima? Ngwo, “ku yinyingi.” Chochene, nyi waze alimbata atwama kulita ni yinyingi ya Mbimbiliya, mahasa kwalumuna manyonga jo ni kukolesa zango lio. (A-Roma 12:2; A-Fwilipu 1:9) Kashika, nyi yena ni yoze walimbata nenyi nwapwa ni mashimbu hanga nuhanjike ni kushimutwina yimwe yisoneko ya Mbimbiliya, ngwe chisoneko cha tangwa hanji umwe mutwe wa mu Kaposhi wa Kutalila ni mikanda yikwo yize yinahanjika hakutwala ku ulo, chino muchipwa ngwe nunasakula chimwe chuma hanga nupemese nacho zuwo lienu. Nyi zango lienu muli Yehova lianukolweza kukaula shimbi twevwa, munupwa ngwe nunutwala upeme wacho mu yipatwilo ya zuwo lienu. Chino muchinunehena chiseke ni kukundama kuli umwe ni mukwo ngwe chize te chakulingiwa mu ulo wenu.

22. Chiseke chika mutuhasa kwivwa nyi twalinga chihanda chetu ha kukolesa ulo?

²² Chakufupiwa mashimbu eswe kusa tachi hanga mutu apemese cheka zuwo. Alioze, nyi wasa tachi nawa walinga chihanda che muuwahilila hakunyingika ngwe unakaula shimbi ja Mbimbilia jinambe ngwo: “Ha ulemu, eswe akaliange kuulweza kuli mukwo.” (A-Roma 12:10; Samu 147:11) Nawa tachi jenu ja kulemesa ulo mujinukwasa kununga mu zango lia Zambi.