1, 2. Yika yakutukwata ku mbunge hanga tuzange Yehova Zambi?

SHINA yena wakuzanga Zambi? Nyi hiunalihana kuli Yehova Zambi, pundu muhasa kutayiza ngwe, ewa, nawa chinalite kukumbulula chocho! Chili chipema kuzanga Yehova. Kwamba pundu, twakuzanga Zambi mumu iye mwe waliangile kutuzanga. Mbimbiliya yinambe ngwo: “Yetu twakuzanga, mumu iye [Yehova] waliangile kutuzanga.”​—1 Yoano 4:19.

² Yehova mwe waliangile kutuzanga. Yatwaha hano hashi hapema twatwama. Kakutufunga ni kutwaha yize yakufupiwa mu mwono wetu. (Mateu 5:43-48) Kakutwaha nawa yuma yize tunafupu hanga tupwe ni usepa upema ni iye. Hanatwehe Liji lienyi, Mbimbiliya. Kakutulweka nawa hanga tulembe kuli iye ni kufuliela ngwetu, matwivwa ni kutwaha spiritu yenyi yisandu hanga yitukwase. (Samu 65:2; Luka 11:13) Kuhiana yeswe ai, iye yatuma Mwanenyi yoze azanga chinji ngwe chitapo cha ukuule hanga atulamwine ku shili ni kufwa. Ali lili zango linene lize Yehova akwete hali yetu!​—Tanga Yoano 3:16; A-Roma 5:8.

3. (a) Yika twatamba kulinga mba tununge mu zango lia Zambi? (b) Chihula chika chilemu twatamba kulihula, mba kulihi mutuwana kumbululo?

 ³ Yehova kanazange hanga tuyuke ku zango lienyi ku miaka yeswe. Alioze, chili kuli mutu ni mutu nyi mazanga kuyuka ku zango lienyi nyi ka. Mbimbiliya yinatukolweza ngwo: “Lifungenu mu zango lia Zambi . . . ndo ku mwono wa mutolo.” (Yundase 21) Liji “lifungenu” linasolola ngwo, twatamba kulinga yimwe, mba tununge mu zango lia Zambi. Twatamba kulinga yuma yize muyisolola ngwo ni yetu twamuzanga. Kashika, chihula chilemu chize mutu ni mutu mahasa kulihula chili chino, ‘Kuchi  munguhasa kusolola ngwami nakuzanga Zambi?’ Kumbululo lili ha maliji a postolo Yoano, akwamba ngwo: “Lino lie zango lia Zambi ngwo, Tukafunge shimbi jenyi. Shimbi jenyi hi jikalu ko.” (1 Yoano 5:3) Twatamba kuhengwola kanawa ulumbunwiso wa maliji wano, hanga tuhase kusolola zango lietu kuli Zambi.

4, 5. (a) Yika maliji akwamba ngwo “zango lia Zambi” analumbunuka? (b) Lumbununa chize waputukile kuzanga chinji Yehova.

⁴ Yika postolo Yoano te ananyongo hakwamba ngwenyi, “Zango lia Zambi”? Maliji wano, keshi kwamba ha zango lize Zambi alinalio hali yetu, alioze ha zango lize yetu tuli nalio hali iye. Shina muhasa kwiwuluka mashimbu waze waputukile kuzanga chinji Yehova?

⁵ Achinyonga ha mashimbu waze waputukile kulilongesa hakutwala kuli Yehova ni upale wenyi ni kumufuliela. Yiunyingika ngwe, chipwe tuhu uli mukwa-shili nawa walihandununa ni Zambi, nihindu Yehova yazulula jila kupalikila muli Kristu hanga upwe ni mwono ungunu uze Alama atokesele nawa hanga ukapwe ni mwono wa mutolo. (Mateu 20:28; A-Roma 5:12, 18) Yiuputuka kunyingika nawa ulemu wa chitapo chize Yehova alingile hakutuma Mwanenyi hanga atufwile. Zango liacho yilikukwata ku mbunge, ha chino yiuputuka kuzanga Zambi yoze wasolwele zango liacho hali yena.​—Tanga 1 Yoano 4:9, 10.

6. Kuchi zango liamwenemwene akulisolola, nawa yika walingile ha mukunda wa zango lie hali Zambi?

⁶ Zango liacho liapwile wika uputukilo wa zango lingunu hali Yehova. Zango hi nyonga wika ko. Zango liamwenemwene hali Zambi linalumbunuka yuma yinji hi kwamba ko wika mukanwa ngwo, “Ami nakuzanga Yehova.” Ngwe chizechene wapwa ufulielo, zango  liamwenemwene nelio liakusoloka ha yitanga yize twakulingila atu. (Tiangu 2:26) Zango kakulisolola ni yitanga yize muyivwisa kuwaha mutu yoze anasolwela zango liacho. Kashika, muze waputukile kuzanga Yehova ni mbunge yeswe, yiuputuka kulinga yuma yize yakuvwisa kuwaha Tata yetu wa mu malilu. Shina yena hanakupapachisa? Nyi chenacho, zango liacho ni ushishiko we ye yakulingishile hanga ukwate chiyulo chino chilemu ku mwono we. Walihanyine kuli Yehova hanga ulinge upale wenyi, ni kusolola kulihana che hakukupapachisa. (Tanga A-Roma 14:7, 8.) Twatamba nawa kukaula yuma yikwo yize postolo Yoano ambile, mba tutwame kulita ni chilakenyo chino chilemu twalingile kuli Yehova.

7. Shimbi jimwe ja Zambi jika, nawa yika chinalumbunuka kujifunga?

⁷ Yoano kanatulweze ngwenyi zango lia Zambi linalumbunuka kufunga “shimbi jenyi.” Shimbi ja Zambi jika? Yehova kanatwehe shimbi jinji kupalikila mu Liji lienyi, Mbimbiliya. Chakutalilaho, iye kakukanjisa yitanga ngwe uzengi, utanji, kukombelela mahamba, wiji ni mahuza. (1 A-Korindu 5:11; 6:18; 10:14; A-Efwesu 4:28; A-Kolosu 3:9) Kufunga shimbi ja Zambi chinalumbunuka kutwama kulita ni yize Mbimbiliya yakulongesa.

8, 9. Kuchi mutuhasa kunyingika yize yakuvwisa Yehova kuwaha chipwe ha yuma yize kuyishi shimbi ja mu Mbimbiliya? Hana chilweza.

⁸ Twatamba kulinga yuma yinji hi wika ko kukaula shimbi ja Yehova, mba tumwivwise kuwaha. Yehova keshi kukalisa mwono wetu hakutwaha shimbi jize jatamba kutusongwela mu mwono wetu. Kashika, mutuhasa kulitakana ni yuma yinji ha tangwa ni tangwa yize kuyishi ni shimbi mu Mbimbiliya. Ha chino, kuchi mutuhasa kunyingika  yize muyipemena Yehova? Mbimbiliya yinasolola ndusu chize Zambi akunyonga. Muze mutununga ni kulilongesa Mbimbiliya, mutunyingika yize Yehova akuzanga ni yize keshi kuzanga. (Tanga Samu 97:10; Yishima 6:16-19) Twakunyingika manyonga ni yitanga yize akuzanga. Nyi twalilongesa chinji ha utu wa Yehova ni chize akunyonga, muchipwa chashi kwecha hanga manyonga jenyi asongwele yiyulo ni yitanga yetu. Ha chino, chipwe ha yuma yize kuyishi shimbi ya mu Mbimbiliya, mutuhasa kunyingika “upale wa mwene.”​—A-Efwesu 5:17.

⁹ Chakutalilaho, Mbimbiliya kuyishi ni shimbi yakwamba ngwo kanda nutala yinema hanji TV yize yinasolola utoji chipwe utanji. Shina chamwenemwene twatamba kupwa ni shimbi yize yinakanjisa yitanga yacho nyi? Ka, mumu tunanyingika chize Yehova akwivwa ha yitanga yacho. Liji lienyi linatulweze ndusu ngwo: “[Yehova] kakuvwila kole waze akuzanga upupilo.” (Samu 11:5) Linambe nawa ngwo: “Yitanji Zambi kumakaapatwila.” (A-Hepreu 13:4) Nyi mutunyonga ha maliji wano, mutuhasa kunyingika kanawa upale wa Yehova. Kashika, kutuchi kusakula kutala yiheho yize yinasolola yitanga yize Zambi keshi kuzanga. Tunanyingika ngwetu, Yehova kakwivwa kuwaha nyi mutwehuka yitanga yipi yize akusolola mu chifuchi ngwe yili yipema. *

10, 11. Mumu liaka twakuzanga kwononokena Yehova, nawa kuchi twakumwononokena?

¹⁰ Chitela chitangu chika chatamba kutulingisa hanga tukaule shimbi ja Zambi? Mumu liaka twatamba kutwama kulita ni manyonga ja Zambi matangwa eswe? Kutushi kulinga chino hanga tuchine upatwilo hanji kapinda yoze akumona waze akwehuka upale wa Zambi.  (A-Ngalashia 6:7) Alioze, kwononokena Yehova chili jila yipema yakusolwelamo zango lietu kuli iye. Ngwe chizechene mwana akuzanga kupwa ni utayizo wa tato, ni yetu tunazange hanga atutayize kuli Yehova. (Samu 5:12) Iye kali Tata yetu, nawa twamuzanga. ‘Kuwana vumbi kuli Yehova’ che chuma chakutunehena chiseke chinji ku mwono wetu.​—Yishima 12:2.

¹¹ Kashika, kukushi niumwe yoze wakutushinjila kwononokena Zambi nawa kutushi kusakula shimbi jize twatamba kwononokena. * Kutushi kusakula kwononokena wika shimbi jize jinatutela hanji jize jili jashi kukaula. Alioze, ‘twakwononoka mu mbunge.’ (A-Roma 6:17) Twakwivwa ngwe chize mukwa-kwimba masamu evwile ha kusoneka ngwenyi: “Munguwahilila mu shimbi je jize nazanga.” (Samu 119:47) Chochene, twakuzanga kwononokena Yehova. Twanyingika ngwetu iye kafupa hanga tumwononokene ni mbunge yeswe. (Shimbi Yamuchiali 12:32) Tunafupu hanga Yehova ambe hali yetu ngwe chize ambile hali Noa. Hakutwala kuli yono kalamba washishika, yoze wazangile Zambi ni kumwononokena ha miaka yinji, Mbimbiliya yinambe ngwo: “Mba Noa yalinga nikulita ni yeswe yize Zambi amutumine, chocho yalinga.”​—Uputukilo 6:22.

12. Kuchi twatamba kwononokena Yehova mba tumuvwise kuwaha?

¹² Kuchi Yehova akwivwa muze twakumwononokena ni mbunge yeswe? Liji lienyi linambe ngwo, ‘twakuwahisa mbunge yenyi.’ (Yishima 27:11) Shina Mwene wetu kakwivwa lume kuwaha ku mbunge muze twakumwononokena? Ewa, nawa ha mukunda wa chitela chipema. Yehova  katutangile ni uhashi wakusakula yize tunazange. Chekwamba ngwo, mutuhasa kulinga yeswayo tunafupu yetwene; kwononokena Zambi, hanji ka. (Shimbi Yamuchiali 30:15, 16, 19, 20) Nyi mutwononokena Yehova ni mbunge yetu yeswe hamukunda wa zango lize tuli nalio ku mbunge yetu, mutuvwisa Tata yetu wa mu malilu kuwaha chinji. (Yishima 11:20) Ni yetu nawa mutupwa ni mwono upema.

13, 14. Mumu liaka mutuhasa kwamba ngwetu, ‘shimbi ja Zambi hi jikalu ko,’ nawa kuchi mutuhasa kulumbununa chikuma chacho?

¹³ Postolo Yoano kanatulweza maliji apema hakutwala ku shimbi ja Yehova ngwenyi: “Shimbi jenyi hi jikalu ko.” Liji lia Ngregu alumbununa ngwo “jikalu” ha mukanda 1 Yoano 5:3, linalumbunuka chuma chize “chilemu.” * Ulumbunwiso ukwo wa Mbimbiliya unambe ngwo, “shimbi jenyi hi jikalu ko kujononokena” Shimbi ja Yehova hi jikalu ko nawa kujishi kutupinjisa. Shimbi jacho chipwe yihenge mahasa kujononokena.

¹⁴ Tutalenu chize mutuhasa kulumbununa chikuma chacho. Achinyonga umwe sepa lie makwita hanga umukwase kututa yimwe yikwata hanga ayitwale ku zuwo lienyi. Kali ni mishete yinji. Jimwe mahasa kujimbata kuli mutu umuwika, jikwo jili jilemu chinji ndo kujimbata atu aali. Sepa lie masakula kasha jize yena mumbata. Shina makwita hanga umbate kasha jize jilemu chinji? Ka. Iye kechi kuzanga hanga umakuke nyima hakumbata kasha jacho ukawe. Chizechene nawa, Zambi yetu wa zango,  keshi kutwita hanga tufunge shimbi jize jikalu chinji. (Shimbi Yamuchiali 30:11-14) Kechi keza katwita kukaula shimbi jize jikalu chinji. Yehova kanayingika ulelu wetu mumu ‘kananyingika mijimba yetu; kanewuluka ngwenyi, yetu tuli fufuta.’​—Samu 103:14.

15. Mumu liaka mutuhasa kufuliela ngwetu shimbi ja Yehova mujitukwasa mu mwono wetu weswe?

¹⁵ Shimbi ja Yehova hi jikalu ko, alioze jakutukwasa chinji mu mwono wetu. (Tanga Izaia 48:17.) Mose kalwezele A-Izalele ngwenyi: “Yehova yatwamba tulinge yiyulo yino yeswe, tuvwile woma Yehova Zambi yetu, chikapwe chipema chetu matangwa eswe, iye atufunge ni mwono, ngwe chinapu musono.” (Shimbi Yamuchiali 6:24) Ni yetu twatamba kufuliela ngwetu shimbi akutwaha Yehova ha zango lienyi mujitukwasa mu mwono wetu weswe. Kashika, Zambi kechi kuhasa kutwita hanga tulinge yuma yize muyitumwesa lamba. Yehova kali Zambi yoze ukwete mana anji. (A-Roma 11:33) Iye kananyingika yize muyitunehena chiseke. Yehova nawa mwe chilweza chinene cha zango. (1 Yoano 4:8) Zango, lili ha yuma yeswe yize iye akulinga ni kwamba. Ha zango he ha kukatuka shimbi jeswe jize iye akuhana kuli tuvumbi twenyi.

16. Mumu liaka mutuhasa kwononokena Yehova chipwe ngwe twakupinda ni yitanga yipi ya hano hashi ni uhenge wetu?

¹⁶ Kutwambile ngwetu, kwononokena Zambi chili chashi, ka. Twatamba kusa tachi mba twehuke yitanga ya hano hashi hapi, hanapombo “mu chiyulo cha mwe chingulungulu.” (1 Yoano 5:19) Twatamba nawa kupinda ni uhenge wetu, uze wakutupinjisa ha kukaula shimbi ja Zambi. (A-Roma 7:21-25) Alioze zango lietu hali Zambi mulihasa kutukwasa. Yehova kakukwasa waze akusolola zango lio ha kumwononokena. Kakuhana spiritu yenyi yisandu “kuli waze akumwononokena.” (Yilinga 5:32) Spiritu yacho ye yakutukwasa hanga tupwe ni yitanga yipema  yize muyihasa kutukwasa kupwa ni mbunge ya kwononoka.—A-Ngalashia 5:22, 23.

17, 18. (a) Yika mutulilongesa mu mukanda uno, nawa yika twatamba kwiwuluka muze mutulilongesa mukanda uno? (b) Yika mutulilongesa mu kapitulu yoze masulaho?

¹⁷ Mu mukanda uno, mutulilongesa shimbi ja Yehova ni chize twatamba kutwama mu mwono wetu ni yuma yikwo hakutwala ku upale wenyi. Muze mutulilongesa shimbi ja Zambi twatamba kwiwuluka ha yuma yinji yilemu. Twiwulukenu ngwetu, Yehova keshi kutushinjila kwononokena shimbi jenyi. Iye kakuzanga hanga tumwononokene ni mbunge yetu yeswe. Kanda tuvulama ngwetu, Yehova kanafupu hanga tupwe ni mwono upema uze muutunehena yiwape yinji ni kututwala ku mwono wa mutolo. Kashika, twatamba kumona ngwetu, kwononokena Yehova yili jila yipema yakusolwelamo zango lietu hali iye.

¹⁸ Yehova hanatwehe mbunge yize muyitukwasa kunyingika yipi ni yipema. Alioze twatamba kulongesa mbunge yetu mba yitusongwele, ngwe chize mutulilongesa mu kapitulu masulaho.