1-3. (a) Chikuma chika chilemu Mbimbiliya yakwamba? (b) Kuchi mutuhasa kusakula masepa waze matufumba yitanga yipema?

NGWE chize mbolo jakushisa meya, ni atu che apwa. Chakupwa chashi kuli ayo kwimbulula yitanga, mianda ni ndako ja atu waze atwama no.

² Mbimbiliya yinambe chimwe chikuma chilemu ngwo: “Nyi muwenda ni akwa mana nyi yena nawa muopwa ni mana; alioze mweswe malikata ni yihepuke kumakevwa kusasaminya.” (Yishama 13:20) Maliji wano keshi kwamba wika ha kulitakana kamuwika cha mutu ni mutu. Liji ‘kwenda’ linalumbunuka kupwa ni usepa. * Umwe mukanda wakulumbununa Mbimbiliya unakamba hakutwala ku versu yino ngwo: “Kwenda ni mutu chinalumbunuka kumuzanga ni kulikwachilila ni mutu wacho.” Kashika twakwimbulula atu waze twakuzanga. Ha chino, nyi twalikwachilila chinji ni atu waze twazanga, ayo mahasa kutufumba ndako jipema hanji jipi.

³ Mba tununge mu zango lia Zambi, chili chilemu kulikata ni atu waze matufumba yitanga yipema. Kuchi mutuhasa kuchilinga? Kwamba umwenemwene, mutuhasa kuchilinga ha kuzanga waze Zambi akuzanga, ni kwaapwisa masepa jetu. Achinyonga kama. Shina mutuhasa kupwa ni masepa apema kuhiana waze ali ni yitanga yize  Yehova akufupa kuli masepa jenyi? Tutalenu yitanga ya atu waze Zambi akuzanga. Nyi twapwa ni nyonga lia Yehova, mutuhasa kusakula kanawa masepa jetu.

4. Mumu liaka Yehova kali ni chitela cha kusela ushindakenyo ha kusakula masepa jenyi, nawa mumu liaka avulukile Apalahama ngwenyi “kasendo” kami?

⁴ Yehova kakusa chinji ushindakenyo ha kusakula masepa jenyi. Shina iye keshi ni chitela cha kuchilinga? Iye kali Mwata wa hashi ni malilu. Kupwa sepa lienyi chili chiwape chinene. Aya mba iye akusakula hanga apwe masepa jenyi? Yehova kakukundama kuli waze akujikijila muli iye ni kumufuliela. Tutalenu chilweza cha kalamba Apalahama, lunga yoze wapwile ni ufulielo unji. Chili chikalu kunyonga cheseko chikwo chinene cha ufulielo chize umwe tata mapalika chahiana ngwe cheseko cha kuhana mwanenyi ngwe chitapo. * Chipwe chocho Apalahama ‘kalambwile Izake,’ ni kupwa ni ufulielo unji ngwenyi, “Zambi mahasa kumuhindwisa, chipwe ha kachi ka afu.” (A-Hepreu 11:17-19) Yehova kasanyikine Apalahama ngwenyi “kasendo” kenyi mumu te Apalahama kakumufuliela ni kumwononokena.​—Izaia 41:8; Tiangu 2:21-23.

5. Kuchi Yehova akwivwa hali waze akumwononokena ni ushishiko weswe?

⁵ Yehova kakulemesa chinji akwa kumwononokena ni ushishiko weswe. Kakuzanga waze akumushishikila chinji kuhiana yuma yeswayo. (Tanga 2 Samuele 22:26.) Ngwe chize twamona ha Kapitulu 1 wa mukanda uno,  Yehova kakuzanga chinji waze akusakula kumwononokena ni zango. Yishima 3:32 unambe ngwo: “kakulikata ni mukwa ululi.” Atu waze akushishika ni kulinga upale wa Zambi, kakwaatambika kuli iye hanga apwe ngeji jenyi mu “mbalaka” yenyi hanga amuwayile ni kukundama kuli iye mu yilemba.​—Samu 15:1-5.

6. Kuchi mutuhasa kusolola ngwetu, twakuzanga Yesu, nawa kuchi Yehova akwivwa hali waze akuzanga Mwanenyi?

⁶ Yehova kakuzanga waze akuzanga Yesu, Mwanenyi wa wika. Yesu kambile ngwenyi: “Nyi kachi umwe manguzanga, mafunga liji liami. Mwe Tata makamuzanga, kumutukeza kuli iye, mutukatenga muma mwetu mwa kutwama hamwe nenyi.” (Yoano 14:23) Kuchi mutuhasa kusolola zango lietu hali Yesu? Mutuhasa kusolola ngwetu twakuzanga Yesu ha kwononokena shimbi jenyi ni kwambujola sango lipema ni kutayisa tumbaji. (Mateu 28:19, 20; Yoano 14:15, 21) Nawa mutusolola ngwetu twakuzanga Yesu ha kukaula kanawa “ngano jenyi,” ni kumwimbulula ku maliji ni ku yitanga kulita ni uhashi wetu. (1 Petulu 2:21) Yehova kakuzanga chinji ha kumona tachi jize atu akusa ha mukunda wa zango hanga embulule Mwanenyi.

7. Mumu liaka chili chipema kulinga usepa ni atu waze ali masepa ja Yehova?

⁷ Ufulielo, ushishiko, kwononoka ni zango hali Yesu ni ha yitanga yenyi yili yuma yize Yehova akufupa kuli masepa jenyi. Muhasa kulihula ngwe: ‘Shina masepa jami ni no kali ni yitanga yacho? Shina masepa ja Yehova no kali masepa jami?’ Chili chipema kuchilinga. Atu waze akufupa kupwa ni ndako jipema ni kwambujola sango lipema lia Wanangana ni zango lieswe, mahasa kupwa masepa apema, ni kutukolweza kununga ni kuwayila Zambi.—Tala kasha “ Yika Yakupwisa Mutu Sepa Mupema?” ha lifwo 29.

8. Yika yakukomwesa hakutwala ku usepa wa (a) Rute ni Noemi? (b) akweze atatu A-Hepreu? (c) Paulu ni Timoteu?

⁸ Mu yisoneko muli yilweza ya atu waze ayukile chinji ha kusakula masepa apema. Mutuhasa kutanga hakutwala ha usepa wa Rute ni Noemi, akweze atatu A-Hepreu mu Babilonia nawa ni usepa wa Paulu ni Timoteu. (Rute 1:16; Daniele 3:17, 18; 1 A-Korindu 4:17; A-Fwilipu 2:20-22) Haliapwila, tutalenu chilweza chipema cha Ndawichi ni Jonata. 

9, 10. Hali wakatukile usepa wa Jonata ni Ndawichi?

⁹ Mbimbiliya yinambe ngwo, muze Ndawichi ashihile Ngoliate, “mbunge ya Jonata yiyilinunga ni mbunge ya Ndawichi. Jonata yamuzanga ngwe mbunge yenyi mwene.” (1 Samuele 18:1) Ha chino yapwa masepa apema, chipwe ngwe hapwile kalisa munene ku miaka yo, usepa wacho wanungine ndo muze Jonata afwile mu jita. * (2 Samuele 1:26) Yika yakolesele usendo wa wano masepa aali?

¹⁰ Ndawichi ni Jonata te kalikata chinji mumu te kakuzanga Zambi nawa te kakuzanga kununga ni kumushishikila. Chino chakolesele chinji ufulielo wo. Hita mutu te kali ni ndako jize te jinafupiwa kuli mukwo. Jonata kakomokene chinji ha hamu ni zango lize Ndawichi apwile nalio ha kukalila jina lia Yehova. Ndawichi te kakuvumbika chinji mukulwana Jonata yoze te wakukwasa ni ushishiko weswe ululikiso wa Yehova ni mbunge yeswe, nawa te kakusa manyonga a Ndawichi kulutwe kuhiana  manyonga jenyi. Chakutalilaho, tala yize yalingiwile muze Ndawichi apalikile mu yipikalo yinji ku mwono wenyi, muze ayile ni kutwama mu puya hanga achine ku kwoko lia Mwanangana Saulu, tato ya Jonata. Jonata kasolwele ushishiko wenyi ha kuya kuli Ndawichi mu puya ni kumutakamisa ngwenyi, ‘Mwene Zambi akufunge.’ (1 Samuele 23:16) Achinyonga kama chize Ndawichi  evwile muze sepa lienyi wa zango amukwashile ni kumutakamisa! *

11. Yika walilongesa hakutwala ku chilweza cha Ndawichi ni Jonata?

¹¹ Yika twalilongesa ha chilweza cha Ndawichi ni Jonata? Twalilongesa ngwetu, chuma chilemu chize masepa jetu atamba kupwa nacho chili kutakama mu ufulielo. Twatamba kulikata ni atu waze ali ni ufulielo ngwe wa yetu, nawa ali ni yitanga ngwe yize ni yetu tukwete, ashishika  kuli Zambi. Mutuhasa kushimutwina ni masepa jacho manyonga jetu ni milimo yetu ni maliji waze mahasa kutakamisa ni kukolesa ufulielo wetu. (Tanga A-Roma 1:11, 12.) Twakuwana atu ali ni ufulielo wa mutapu au mukachi ka mandumbu jetu. Shina chino chinalumbunuka ngwo atu eswe waze akwiza ku kukunguluka kali masepa apema? Ka, hi chochoko.

12, 13. (a) Mumu liaka twatamba kukeya ha kusakula masepa mu chikungulwila? (b) Kapinda muka wapwile mu yikungulwila ya ku sekulu yitangu nawa utowezo uka Paulu ahanyine?

¹² Chipwe mu chikungulwila, nyi tunazange kupwa ni masepa waze matutakamisa mu ufulielo, twatamba kusakula kanawa waze mutulikata no. Shina twatamba kukomoka? Ka. Akwa-Kristu amwe mu chikungulwila mahasa kumbata mashimbu anji mba akole mu ufulielo, ngwe chize yimwe mihuko ku mutondo kuyishi kuchila hamuwika. Kashika, mu yikungulwila yeswe muli akwa-Kristu waze alisa mu ufulielo. (A-Hepreu 5:12–6:3) Alioze, twatamba kusolola uhomboloji ni zango kuli waze achili aha nawa ni kuli waze kanda achikola mu ufulielo, nyi tunazange kwakwasa hanga akole ku spiritu.—A-Roma 14:1; 15:1.

¹³ Ha mashimbu amwe mu chikungulwila mu muhasa kupwa yuma yize twatamba kukanyama nayo ha kusakula masepa. Amwe hanji kasolo kwenda kanawa. Akwo hanji kali ni chikulikuli ku mbunge ni manyonga a kuyenga-yenga akwo. Yikungulwila ya ku sekulu yitangu K.M. ni neyo yapwile ni kapinda wacho. Chipwe ngwe anji te kakufuliela, nihindu amwe te kakulinga yuma yize kuyishi kulita. Amwe te kakulongesa yuma ya mahuza, kashika postolo Paulu watowezele ngwenyi: “Kanda nulionga, usepa upi kuwakupihisa ndako jipema.” (1 A-Korindu 15:12, 33)  Paulu katowezele Timoteu ngwenyi, chipwe mukachi ka akwa-Kristu, te mu muhasa kupwa waze kechi kulinga yuma yalita. Timoteu kamutowezele hanga apwe kusuku ni atu jacho, ahone kupwa masepa jenyi.—Tanga 2 Timoteu 2:20-22.

14. Yika twalilongesa ha utowezo wa Paulu?

¹⁴ Yika twalilongesa ha utowezo wa Paulu? Unatulongesa kwehuka kulinga usendo ni mweswawo mu chikungulwila hanji haze lia chikungulwila, yoze mahasa kupihisa ndako jetu. (2 A-Tesalonika 3:6, 7, 14) Twatamba kufunga ufulielo wetu. Iwuluka ngwe, chizechene ngwe mbolo ni yetu twakwimbulula yitanga ni ndako ja masepa jetu. Kutuchi kuhasa kusa mbolo mu vinyu ni kushimbwila ngwo muyishisa meya. Chizechene nawa, kutwatambile kulinga usepa ni atu ali ni yitanga yipi ni kushimbwila kupwa ni yitanga yipema.—1 A-Korindu 5:6.

15. Yika muhasa kulinga hanga uwane masepa apema mu chikungulwila?

¹⁵ Kwamba umwenemwene, chili chashi kuwana masepa apema mukachi ka mandumbu jetu. (Samu 133:1) Kuchi muhasa kuwana sepa yoze uli ni ufulielo upema mu chikungulwila? Nyi wafupa kupwa ni yitanga ni ndako jipema, kwamba pundu atu waze no akusa tachi hanga apwe ni yitanga yipema, mahasa kuzanga kupwa masepa je. Ha chino ena watamba kusa tachi hanga upwe ni masepa aha. (Tala kasha “ Kuchi Mutuhasa Kupwa ni Masepa Apema,” ha lifwo 30.) Fupa masepa waze ali ni yitanga yipema yize unazange kupwa nayo. Kaula usongwelo wa Mbimbiliya ha ‘kwazulula mbunge ye,’ ni kulinga usepa ni mandumbu chakuhona kumona ku chikowa, chifuchi hanji munyiachi. (2 A-Korindu 6:13; tanga 1 Petulu 2:17.) Kanda usakula wika masepa waze ali ni miaka ngwe ya yena. Iwuluka ngwe, Jonata te mukulwana chinji kuhiana Ndawichi. Nyi wapwa ni masepa a makulwana  mahasa kukukwasa kupwa ni mana nawa ni yitanga yipema.

16, 17. Nyi umwe ndumbu matulinga chimwe chuma, mumu liaka kutwatambile kuhichika chikungulwila?

¹⁶ Ha mashimbu amwe mukuhasa kusoloka kapinda ha mukunda wa yitanga ni kupwa cha atu mu chikungulwila. Umwe ndumbu mahasa kwamba hanji kutulinga chimwe chuma chize muchitulemeka ku mbunge. (Yishima 12:18) Ha mashimbu amwe kapinda kakusoloka ha mukunda wa yitanga yalisa, yuma yize twevwile kanawa hanji kuhona kulivwashana. Shina mututalinga ha yuma yino ni kuhichika chikungulwila? Ka, nyi twapwa ni zango liamwenemwene muli Yehova ni kuli waze iye akuzanga kutuchi kulinga chocho.

¹⁷ Yehova katela zango lietu ni uwayilo wetu wa  mbunge yeswe, mumu kali Sakatanga nawa Mukwa-Kuhana mwono. (Usolwelo 4:11) Chikwo nawa chikungulwila chize chakumulingila chatela ukwaso wetu. (A-Hepreu 13:17) Kashika nyi umwe ndumbu matulinga chimwe chuma, kanda tuzachisa upi wacho hanga tuhichike chikungulwila. Twatambile kulinga chuma cha mutapu au! Mumu hi Yehova ko watulinga upi. Twakuzanga chinji Yehova kashika kutuchi kumwomba nyima chipwe kuhichika atu jenyi!—Tanga Samu 119:165.

18. (a) Yika mutuhasa kulinga hanga tupwe ni sambukila mu chikungulwila? (b) Yiwape yika mutupwa nayo nyi twakonekena mandumbu jetu?

¹⁸ Kuzanga mandumbu jetu chakutukwasa kupwa ni sambukila mu chikungulwila. Yehova keshi kushimbwila ungunu kuli waze iye akuzanga, ni yetwe che twatamba kulinga. Zango liakutukwasa kulengulula tupalia akehe-akehe ni kwiwuluka ngwetu yetweswe tuli akwa-shili nawa twakulinga upi. (Yishima 17:9; 1 Petulu 4:8) Zango liakutukwasa kununga “nikulikonekena umwe ni mukwo.” (A-Kolosu 3:13) Hi chashi ko ha mashimbu amwe kukaula shimbi yino. Alioze, nyi twecha hanga manyonga api apwe mu mbunge yetu, muchipwa chashi kuli yetu kupwa ni chikulikuli ku mbunge, ni kunyonga ngwe kwivwa uli muchivwisa lamba yoze watulinga upi. Alioze, kutulika toto ku mbunge, chakupinjisa mwono wetu. Nyi muchilita chili chipema kukonekena, mumu chino chakuneha yiwape yinji. (Luka 17:3, 4) Chakutwaha sambukila ku mbunge, kunyongonona mu chikungulwila ni kufunga usepa wetu ni Yehova.—Mateu 6:14, 15; A-Roma 14:19.

19. Yuma yika yize muyihasa kutukinda kulikata ni umwe mutu?

¹⁹ Mashimbu amwe chakufupiwa kwecha kulikata ni mutu yoze keshi nawa ndumbu mu chikungulwila. Chino chakulingiwa muze mutu mavulumuna shimbi ja Zambi  chakuhona kulikonekena mba hi mamusosolola, hanji muze malituna ufulielo ni kulongesa malongeso a mahuza chipwe hanji kulisosolola mwene mu chikungulwila. Liji lia Zambi linambe ndusu kuli yetu ngwo, “kanda nuliendela ni” atu a mutapu au. * (Tanga 1 A-Korindu 5:11-13; 2 Yoano 9-11) Muchihasa kupwa chikalu kwecha usepa wacho chipi-chipi nyi mutu wacho kali sepa hanji usoko wetu. Shina mutusolola ufulielo ni kwononoka ni kusolola ngwetu ushishiko wetu kuli Yehova uli chuma chitangu ku mwono wetu kuhiana yuma yeswayo? Iwuluka ngwe Yehova kakulemesa ushishiko ni kwononoka chetu.

20, 21. (a) Mumu liaka kusosolola mutu chili kusolola zango kuli mutu wacho? (b) Mumu liaka chili chilemu kusakula kanawa masepa?

²⁰ Kusosolola mutu chili chimwe chitanga cha zango lia Yehova. Kuchi chenacho? Kuhuma chivulumunyi chakusolola zango ku jina lisandu lia Yehova ni ku yuma yeswe yize jina liacho linalumbunuka. (1 Petulu 1:15, 16) Nawa kusosolola mutu chakufunga chikungulwila. Chakufunga mandumbu ashishika ku yitanga yipi ya waze akulinga shili ku tachi, ni kwakwasa kunyingika ngwo chikungulwila muchihasa kwafunga ku yuma yipi ya hano hashi. (1 A-Korindu 5:7; A-Hepreu 12:15, 16) Kufumba chili kusolola zango hali yoze walinga shili. Hanji mutu yoze wavuluma kanafupiwa fumbo hanga alikonekene ni kufuna kuli Yehova.—A-Hepreu 12:11.

²¹ Kutuchi kuhasa kuhamika ngwetu masepa jetu mahasa kutufumba yuma yipema hanji yipi. Kashika chili chilemu kusakula kanawa masepa jetu. Nyi twapwisa masepa ja Yehova masepa jetu, ni kuzanga waze Zambi akuzanga, mutupwa ni masepa apema chinji. Yitanga yo muyitukwasa kununga ni kuvwisa Yehova kuwaha.