Tuli ha matangwa a kusula. Kashika, kutushi kukomoka muze twakwivwa hakutwala ku “jita ni sango ja jita.” (Mateu 24:6) Alioze, muze mandumbu jetu akupalika mu kapinda mumu lia jita, ayo kakutambula ukwaso uze akufupa. Twatambula utakamiso ha kutala Sango Jaha Kukatuka ku Chizavu cha Tusongo ja 2022 #3! Twanyingika mulimo uze analingi mandumbu mu Europa Oriental hanga akwase mandumbu waze atokesa yuma mu Ucrânia mumu lia jita. Kuchi mulimo wacho unalingiwa chipwe ngwe kuli jita? Kuchi unayukisa mandumbu jetu mu Ucrânia?

 Ha 24 Fevereiro, 2022, tangwa lize jita yaputukile mu Ucrânia, Komite ya Coordenador yiyitesa mbongo jize mazachisa hanga akwase mandumbu mu Ucrânia. Mandumbu ku Mbetele ya Ucrânia, yaputuka kulanda yuma ni kuyihana kuli mandumbu kupalikila mu yizavu 27 ya akwa-kukwasa yize aluliekele.

 Mba aweze ha ukwaso wa mandumbu a ku Mbetele ya Ucrânia, mandumbu a ku chishina chinene cha Yela ja Yehova, kawashi-washi yaputuka kunyonga ha ukwaso uze mahana. Komite ya Coordenador ni ya Editora ya Chizavu cha Tusongo, yiyita hanga Chipatulo chize cha kulanda yuma Hashi Heswe chikalakale ni tusongo a ku Mbetele ya Ucrânia ni Polônia hanga akwase ku yize mafupa ni kutala yize mahasa kulinga. Mandumbu a mu Chipatulo cha kulanda yuma, a ku Chipatulo chize chakutuma yuma ku yihela yikwo ni a ku Jurídico ya ma Mbetele, ndumbu umuwika wa mu Komite ya Mutango mu Ucrânia, ni mandumbu a mu Chipatulo cha kulanda yuma, yaputuka kukunguluka tangwa ha tangwa hanga alulieke ukwaso wacho.

 Jay Swinney wa mu Chipatulo cha kulanda yuma, yamba ngwenyi: “Chitangu te twatamba kunyingika yize yinahono. Te tunazange kuhana kulia ni yikwata yize muyikwasa mandumbu kulinanga, yize mandumbu te hanejilila nayo. Alioze, kunyingika yize te anafupu kapwile kapinda mukwo yoze twapwile nenyi. Twafupile nawa kunyingika chize te mututuma yuma yacho ku Ucrânia hanga yihete kanawa ni kawashi mukachi ka jita.”

 Ha 9 Março, 2022, mandumbu te hanyingika yize yinahonako. Te matumako mishete muze muli yuma ya kulia, ngwe yifwo, yishi, loso, makunde ni yikwata yikwo yize te muyakwasa kulinanga ku mujimba. Ha mashimbu jacho, katesele ngwo, kulanda yuma yino ha poso jiwana te muyihasa kufwika dolar 65 hali hita mutu. Amu mandumbu anji te mafupa yuma yacho, Komite ya Coordenador yiyitayiza mbongo jikwo jize mandumbu mazachisa. Mba kuchi yuma yino te muyipwa kuhana chakuhona kusa mwono wa mandumbu jetu mu ponde?

 Ha 13 Março, mandumbu aali a ku Polônia yalinga chimwe kweseka hanga amone nyi te muchipwa chashi kuchiza yuma ku Mbetele ya Polônia ni kuyitwala ndo ku loja lize liapwile hakamwihi ni Lviv, mu Ucrânia. Shimbu te kanda achilinga wenyi, mandumbu ku Mbetele ya ku Polônia ni ya ku Ucrânia, yaakwasa hanga alulieke wenyi. Mbetele yaluliekele mikanda yeswe yize yafupiwile hanga mandumbu ahete ku fronteira, ni kusela shindakenyo ngwo mashinyi jo maanyingika ni kusolola ngwo ayo kali wika ku chihela chacho mumu lia kutwala ukwaso. Chikwo nawa, Mbetele yiyikalakala ni mandumbu a mu Ucrânia hanga amone jila yashi yize mandumbu mazachisa muze maheta ku fronteira. Kulilulieka chino chipema ni ukwaso wa Yehova, ukwaso uze mandumbu atumine yiuheta ku Lviv ha maola 24, mba mandumbu jacho yahasa kufuna kanawa ku Polônia.

 Kweseka chitangu chize alingile, chendele kanawa, alioze ha chisuho chacho mandumbu kahashile wika kuhana yuma yikehe. Mumu yuma yize atesele kuhana te yatamba kuhiana matonelada 200! Mba kuchi te matuta yuma yacho ni kuyihana kuli mandumbu ni kwashi?

 Hanyima lia kutanga sango ha jw.org ja chize mandumbu jetu te anamono lamba mumu lia yize te yinalingiwa mu Ucrânia, atu a hashi heswe yazanga kukwasa. Atu anji waze atwama kusuku yahana milambu ya kukwasa mulimo wa Yela ja Yehova hashi heswe ni shindakenyo ngwo, mbongo jacho majizachisa kanawa. Akwo, waze atwama mu yifuchi yize yasulangana ni Ucrânia, yazachisa mashimbu, tachi ni yikumba yo hanga akwase. Talenu yilweza yimwe.

 Mu Polônia, akwa-kulihana anji kaluliekele yuma yinji ya kukwasa nayo, kuchingako ni yizulie yipema yize twanuke afunjekele. Bartosz Kościelniak, umwe ndumbu wa mu chipatulo cha kulanda yuma ku Mbetele mu Polônia, yamba ngwenyi: “Hingunatange Samu 110:3 ha yisuho yinji, haze hakwamba ngwo, ‘Atu je malihana mulambu.’ Alioze, nahasa kumona ni meso jami ukwaso uze mandumbu ahana. Namona tununu twa akwa-kulihana waze asoloka ha shimbu hanga akalakale. Yino yeswe yangukwasa kumona umwenemwene wa maliji a Samu yino.”

 Umwe ndumbu mwenya-empresa ya logística internacional, yakwasa ni minyau jenyi hamwe ni maji aze te mutufupiwa. Ndumbu wacho yamba ngwenyi: “Kuli yami, uno wapwa uhashi wa kusolola zango liami kuli mandumbu ni kuli Yehova. Nawahilila chinji ha kuhana ukwaso uno.” Nyi twalula maji a mashinyi waze mandumbu azachishile, maheta ha unji wa milondo 7,700, nawa mandumbu kendesele kilometro 48,000 ha kuzachisa mashimbu jo ni tachi hanga atwale ukwaso!

 Mandumbu jetu a malunga ni a mapwo kakalakalile ni zango ni kulihana cho cheswe. Mumu lia chino, ha 28 Março muze te hikwapalika matangwa 15 chize haze atwalile ukwaso utangu, mandumbu yahasa kutwala ku Ucrânia tonelada 100 ya yuma ya kulia, ya kulinanga nayo ni yitumbo! Ukwaso uze mandumbu ni akwa-kutulanjisa yuma ahanyine, watepulwile unji wa mbongo jize te mutuzachisa hanga tululieke yuma ya kukwasa nayo. Ndo ha shimbu lino, Yela ja Yehova hatuma mu Ucrânia matonelada a yuma kuhiana 190. Kuchi yuma yino yakwasa mandumbu?

 Muze yuma yahetele ku Lviv, akwa-kukwasa mu Ucrânia yaputuka kuyipangila kuli waze te anayifupu. Ukwaso wacho kanakautuma nawa mu mbonge jikwo, mbonge jacho jimwe te jatwama ha kilometro 1,300 kukatuka ku Lviv. Mulimo wacho kaulingile kanawa, chipwe chocho, wambachile mashimbu. a

 Markus Reinhardt, ndumbu wa mu Komite ya Mutango wa mu Ucrânia, yamba ngwenyi: “Ha mashimbu wano akalu, mandumbu anji kanamono ni meso jo chize Yehova akutuzanga ni chize chakupwa chipema kwononokena usongwelo wa mu ululikiso wenyi chipwe muze kanda kuchilingiwa umwe luyinda. Chakutalilaho, yetu eswe kakutukolweza mashimbu eswe hanga tupwe ni yuma ya kulia yize muyiheta kama ha poso yimuwika. Umwe mukulwana wa mu chikungulwila yoze te unakalakala ku Kyiv, yamba hakutwala ku usongwelo uze atambwile ngwenyi: ‘Ululikiso wa Yehova wakutululieka hanga tupalike mu yuma yikalu, twakusakwilila chinji ha yuma yino. Kupwa ni kulia, meya ni chisaji chakuvwila sango, yatukwasa kulamwina mwono wetu.’ Chapema kumona chize mandumbu jetu alemesa usongwelo uno, mumu chino chakwasa Mbetele kupwa ni mashimbu a kululieka yuma ya kukwasa nayo mandumbu.”

 Kuchi mandumbu alivwile muze atambwile ukwaso uno? Mykola ni Zinaida waze te atwama ku Kharkiv, kasolwele zango lio ha kwamba ngwo: “Kulihulumba cha mandumbu hali yetu chatulilisa. Tunasakwila chinji ha kulia ni ha yitumbo yize nwatwaha! Twahasa kumona kwoko lia Yehova ha yuma yeswayi.” Valentyna yoze watwama mu mbonge yizeyene, yamba ngwenyi: “Chize haze jita yaputukile, ku yihela kuze twakulanjila yuma kwakupwa milongo yisuku-yisuku. Kutushi kuhasa kulanda yuma yeswe yize tunafupu. Alioze, Yehova kamwene yize tunapalika. Iye kasongwela mandumbu hanga atunehene ukwaso ku mazuwo jetu, mba mu ukwaso wacho mwapwile yuma yize te tunafupu lume! Ha mashimbu waze kutushi kumona uchinyino, henaho twakumwena ufunge wa Yehova ni wa ululikiso wenyi mu yimwe jila yalipwila. Chakupema chinji kupwa ni ukwaso wa Yehova ha shimbu lialita.

 Yevhen, Iryna, ni Mykyta waze achinyine mu Mariupol, yamba ngwo: “Tunasakwila chinji ha ukwaso uze ahana kuli asoko jetu. Tunatayiza ngwetu, nwaheta ha shimbu lialita. Muze twamwene makasha, yitunyonga ngwetu muli wika yuma ya ukwaso, alioze muze twazulwilemo yitumona nawa zango lienu!”

 Kwamba pundu yena wakuhasa kumona chize spiritu ya Yehova yinasongwela atu hanga ahane ukwaso wa zango muze kunalingiwa “jita ni sango ja jita” Ukwaso uze wakuhana hanga akwase mulimo uze unalingiwa hashi eswe, anji kanaulingila ha site donate.pr418.com, neyo yakwasa chinji hanga yuma yino yilingiwe. Tunasakwila chinji ha zango lienu.

Kuhana Ukwaso Kawashi-Washi mu Mutapu Walita

1. Ha 24 Fevereiro, 2022: Komite ya Coordenador yiyitayiza mbongo jize mazachisa mu Ucrânia, yino yazulula jila hanga Mbetele yiputuke kuhana ukwaso.

2. Ha 24 Fevereiro–8 Março, 2022: Mbetele ya mu Ucrânia yiyiputuka kulanda yuma ni kuyihana kupalikila mu makomite ya akwa-kukwasa. Mutango nawa yiulilulieka hanga utambule ni kuhana kuli mandumbu yuma yize yakatukile ku Polônia.

3. Ha 9 Março, 2022: Komite ya Coordenador yiyitayiza kutuma ukwaso ku Ucrânia.

4. Ha 10–12 Março, 2022: Yalinga chimwe kweseka chize te muchisolola nyi ngwe muchipwa chashi kutuma yuma mu Lviv, ku Ucrânia kukatuka ku Polônia.

5. Ha 13 Março, 2022: Yatuma yuma ngwe kweseka chitangu mu Lviv, mu Ucrânia kukatuka ku Polônia.

6. Ha 14–16 Março, 2022: Mu limwe Zuwo lia kukunguluka cha mbonge mu Poznan hakamwihi ni Polônia, akwa-kutunga Mazuwo a Wanangana, yaasanyika hanga alongeze makasha a ukwaso muze te muli kulia ni yuma yikwo.

7. Ha 17 Março, 2022: Ha kupalika cha matangwa awana muze te halinga kweseka chize chendele kanawa, yaputuka kututa tonelada 13 a yuma ya kukwasa nayo ku fronteira ya Ucrânia.

8. Ha 21–27 Março, 2022: Ha kukaula majila waze-ene yuma yikwo yize yasalile yayilongezela mu Polônia ni kuyituma ku Ucrânia, mba yayihana ku yihela kuze te kunafupiwa ukwaso hakupalika cha maola 24.

9. Ha 28 Março, 2022: Mukachi ka matangwa 20 muze te hitwapwa ni utayizo, yitutuma mu Ucrânia 100 tonelada ya yuma ya kulia, ya kulinanga nayo ni yitumbo.

 Ndo ha shimbu lino, Yela ja Yehova hatuma matonelada a ukwaso mu Ucrânia kuhiana 190.