Manguvulu anji ha hashi kanakanjisa atu kupwa hamuwika nawa kanakanjisa kukunguluka ha mbunga. Yela ja Yehova kakwononokena shimbi jacho, alioze keshi kwecha kulikungulula mu mutapu walita hanga eswe alifunge. Kashika yikungulwila yinazachisa Zoom, yimwe aplicativo ya videoconferência hanga alinge kukunguluka.

 Mba mandumbu ahase kukunguluka hita poso, Chizavu cha Tusongo chatayijile kuzachisa milambu hanga alande Zoom. Chino chinakwase yikungulwila yinji, mumu yikungulwila yacho kuyishi ni mbongo ja kulanda Zoom, yize yakufwika unji wa mbongo 15-20 dolar hanji kuhiana. Chitangu yikungulwila yino te yakuzachisa aplicativo yino yawana. Alioze kuzachisa aplicativo yino yawana atu eswe te kechi kuhasa kunjila ha kukunguluka nawa muchihasa kuneha ponde. Yikungulwila yize yinazachisa Zoom yize ululikiso walanda kanayizange chinji. Kanayizange mumu yili yashi kuzachisa nawa atu anji mahasa kunjila hanga akaule kukunguluka. Ndo haliapwila, yikungulwila kuhiana 65,000 ya mu yifuchi kuhiana 170 yinazachisa Zoom yacho.

 Tala yize yalingiwile ku Chikungulwila cha Kairagi, mu Manado, Sulawesi ku Norte ya Indonésia. Chikungulwila chino checha kuzachisa Zoom yawana, haliapwila chinazachisa Zoom yize ululikiso walanda. Ndumbu Hadi Santoso yamba ngwenyi: “Haliapwila chipwe mandumbu waze kanyingikine kuzachisa kanawa tecnologia kanahase kupwa ha kukunguluka ni kuyuka ha kulia cha spiritu. Chino chakulingiwa mumu, keshi kufupiwa kunjila yisuho yinji ha kukunguluka chimuwika.”

 Lester Jijón, Jr., mukulwana wa mu Chikungulwila cha Oeste Guayacanes, mu mbonge ya Guayaquil, Equador yamba ngwenyi: “Amu mandumbu anji keshi ni mbongo te muchipwa chikalu chinji yikungulwila yimwe kulanda Zoom. Ni ukwaso wa ululikiso, haliapwila chinapu chashi mandumbu eswe kupwa ha kukunguluka chimuwika. Mandumbu mahasa kusanyika unji wa atu eswawo ene mazanga chakuhona kulipikala ngwo mumuzala.”

 Johnson Mwanza, mukulwana wa mu Chikungulwila cha Norte Ngwerere, ku Lusaka, mu chifuchi cha Zâmbia, yasoneka ngwenyi: “Mandumbu anji keshi kuhonga kuhanjika ha ‘chize chikwata chino chinakwase kupwa hakamwihi ni mandumbu jo.’ Ene kanambe ngwo, kanamono zango ni ufunge wa Yehova.’”

 Milambu yize twakuhana hanga tukwase mulimo wa kwambujola hashi heswe, ye yakwasa ululikiso kulanda Zoom. Ha chikuma chino, kazachisa milambu yize te akukwasa nayo atu waze anafupiwa ukwaso. Milambu yino kanji-kanji kakuyihana kupalikila ha chikuma milambu donate.pr418.com. Tunasakwilila chinji ha milambu yize nwakuhana ni mbunge yeswe, yize tunazachisa hanga tukwase atu waze anafupiwa ukwaso a hashi heswe.—2 A-Korindu 8:14.