Yehova kakuzanga kulongesa atu jenyi. Chino, chakukwasa hanga ululikiso wenyi upwe ni mashikola anji a kufumbila alongi hanga ahase kulinga kanwa yiteli yo. Yimwe ya ku shikola yacho yili Shikola ya Akwa-Kwambujola Wanangana. (SKE). Ha miaka yino, ululikilo wa Zambi walihulikilile wika ha mapetisau alioze, unalihulikila nawa ha mazuwo muze malingila mashikola wano malongesela. Kulinga chino , muchikwasa mulimo wa alongishi ni alongi no malilongesa kanawa. Kuchi milambu yize wakuhana yinakwase ku milimo yino?

 Ha miaka yinji mashikola a wanangana anji kapwa kulingila mu Mazuwo a Wanangana ni mu Mazuwo a Kukunguluka Chinene. Mba mumu liaka twokesa kutunga mazuwo waze mapwa wika kuzachisa hanga alingilemo mashikola a wanangana? Tutalenu yikuma yitatu.

 Yize tunafupiwa. Christopher Mavor, Chikwashi wa mu Komite ya Serviço ya Chizavu cha Tusongo, yamba ngwenyi: “Kunafupiwa mandumbu ni mapangi anji mu milimo ya kwambujola. Chakutalilaho, ha mwaka wa 2019 mutango wa Brazil wafupiwanga 7,600 unji wa akwa-kwambujola waze malinga shikola ya wanangana hanga akwase milimo mu njiza yo.” Mutango wa mu Estados Unidos, yamba ngwo kunafupiwa mapionelu ajama waze mahasa kufumba akwo hanga alinge kwambujola ha mbunge, ku utulilo wa tulela ni ndeke, kwambujola cha susumuku ni kwambujola mu mazuwo a ususu. Tunanafupiwa nawa mandumbu waze makwasa mulimo wa Kutunga ni waze makwasa mu Komite ya Akwa-kutala Yuma ya Shipitali. Waze malinga shikola ya SKE mahasa kukwasa ku milimo yino.

 Kwoka cha alongi. Ku mitango yinji, katambula mapetisau ja alongi anji waze alisonekesa ha mashimbu wano. Mu Brazil, mutango watambula unji wa mapatisau 2,500 SKE ha mwaka umuwika. Alioze, mumu lia kukeha cha mazuwo akulingila mashikola mutangu wa mu Brazil, watambulanga wika alongi 950.

 Yihela yipema ya kutwama. Muze mashikola akwalingila mu Zuwo lia Wanangana, hanji muze twakulingila kukunguluka cha Mbonge, kanji-kanji alongi kakutulila ku mazuwo ja mandumbu. Yino yakulingiwa ku yihela kuze akulinga mashikola akehe ha mwaka. Alioze kuze akulinga mashikola anji, kanji-kanji mandumbu keshi kufupiwa kutambula alongi anji ku mazuwo jo. Kashika chinafupiwa kutunga mashikola waze yipatulo ya kulilongesela muyipwa hakamwihi ni alongi ni kutunga mazuwo jacho ha kunyonga ha yize alongi mafupiwa.

 Kulita ni chihela hanji yuma yikwo nawa, limwe zuwo muze mumupwa chipatulo cha kulilongesela, yipatulo ya alongeshi ni ya alongi kuhiana 30 kuchinga ni yihela yikwo ya kutwama, kuhehela ni ya kukalakalila muyihasa kufwika tununu a tununu twa mbongo ja dólares.

 Kanji-kanji mashikola kakwatungila ku yihela kuze kukwatwamine zungo linji kusuku ni mbonge yinene, alioze kuze kwakuheta mashinyi akwendela mbunga. Chikwo nawa twakutala ku yihela kuze kuli akwa kwambujola anji waze mahasa kukwasa ku milimo ya kululieka zuwo liacho ni yuma yikwo nawa.

 Mashikola kali ni biblioteca, yihela ya kulilongesela, macomputadore, impressora, ni yuma yikwo. Kanji-kanji kali nawa ni yipatulo ya kulila muze alongi ni alongeshi mahasa kulila hamuwika. Mashikola kali nawa ni yihela kuze alongi mahasa kunanyina mujimba ni kuhwima.

 Kakupemesa kanawa chipatulo muze akulilongesela. Troy, yoze wakukalakala mu milimo ya kutunga ya hashi heswe, mu Warwick, Nova York, yamba ngwenyi: “Mba tutunge yipatulo ya kulilongesela yize muyipwa yipema kuli alongi, yetu twechile ukwaso ku Chipatulo cha Shikola ya Milimo ya Zambi. Ayo katuhele usongwelo hakutwala ku utohwe wa chipatulo cha kulongesela, kuchi mutuchilulieka, chize mumutemuka, ni yikwata yika ya áudio ni vídeo te mutufupiwa.” Zoltán, umwe longeshi wa mu Shikola ya Akwa-Kwabujola Wananagana mu Hungria hakutwala ku yikwata ya áudio ni vídeo yamba ngweyi: Ku uputukilo, yetu kutwakapwile ni microfones achino, te twakwita kuli alongi hanga ahanjike ni liji mwilu. Haliapwila amu hita mesa yili ni microfones, kapinda wacho kahwa.

 Yika alongi ni alongeshi akwamba ha mashikola wano aha? Angela yoze walinga Shikola ya Akwambujola Wanangana, mu Palm Coast, Flórida, Estados Unidos, yamba ngwenyi: “Chapwa chihela chipema chize kukushi zungo. Yuma yeswe kuchingako chihela cha kulilongesela ni yipatulo ya kupomba yapwa kululieka kanawa hanga tulihulikile ha kulilongesa.” Csaba umwe longeshi wa Shikola ya Akwa-Kwabujola Wananagana mu Hungria kazanga chinji kulila hamwe ni alongi. Iye yamba ngwenyi: “Ha mashimbu jacho alongi kakuhanjika hakutwala ku yuma ya ku mwono wo ni yize alitakanyine nayo. Hachino, twakuhasa kwanyingika kanawa ni kwalumuna malongeso jetu kulita ni yize ayo anafupiwa.”

 Alongi ni alongeshi kanamo mazuwo wano aha ngwe chawana cha “Longeshi yetu Munene,” Yehova. (Izaia 30:20, 21) Umwe pangi ku Filipinas yoze walinga Shikola ya Akwa-Kwabujola Wanangana mu limwe zuwo liaha lize aluliekele hanga lipwe shikola yamba ngweny: “Kulihola cha chihela chacho chatwiwulula ngwetu, hi tuli alongi ko wika alioze tuli atu alipwila waze a Yehova asanyika. Iye kanazange hanga tuwahilile muze tunalingi shikola yino ni kulilongesa Liji lienyi kanawa.”

 Mashikola wano mahasa wika kwatunga kwatungulula ni kununga ni kupema mumu lia milambu yenu yize kanji-kanji nwakulingila kupalikila ha site donate.pr418.com. Tunanusakwilila chinji ha kupwa yihanyi!