Ha kuputuka cha mwaka 2023, tulieswe tunashimbwila yuma yipema hali yetu ene ni hali asoko jetu. Mumu liaka twatamba kupwa ni nyonga lialita ni chimwe kutalatala?

 Mbimbiliya yakusolola sango jipema ngwo lamba lize tunapalika haliapwila lili lia mashimbu akehe, nawa ngwo kwasala hakehe lieswe mulihwa. Kwamba umwenemwene, Mbimbiliya ‘yasonewene mukutufumba yetu, hanga ku kulembejeka cha Yisoneko Yisandu tupwe ni kutalatala.’—A-Roma 15:4.

•   Wana sango jikwo ja uprofeto wa mu Mbimbiliya, ha kutanga chikuma “Muhasa Kupwa ni Nyonga Lialita Hakutwala Kulutwe lia Matangwa.”

 Kutalatala cha mu Mbimbiliya muchihasa kupwa ngwe “ankora” ya mwono wetu. (A-Hepreu 6:19) Muchihasa kutuhwimisa mbunge ni kutukwasa tumane ngu. Muchihasa nawa kutukwasa kukumba lamba lize tunamono haliapwila, kupwa ni nyonga lialita ni kupwa ni uwahililo uze muununga ndo ku miaka yeswe. Chakutalilaho:

•   Tala chize kutalatala cha mu Mbimbiliya chakwashile umwe lunga kukumba uzengi. Tala chinema ‘Yitanga Yami Chayizangile Nawa.’

•   Tala chize kutalatala cha mu Mbimbiliya muchihasa kutukwasa muze mutufwisa mutu yoze twazanga. Tala chinema, Kutakamisa Waze Afwisa.

 Atu anji kanashimbwila yuma yipema, alioze ayo kechi kuhasa kupwa ni shindakenyo nyi yuma yize anashimbwila muyilingiwa lume. Yino yinalise ni yize Mbimbiliya ya kulakenya. Mumu liaka? Mumu yilakenyo ya mu Mbimbiliya yinakatuka kuli Yehova a mwene, “yoze keshi mahuza.” (Titu 1:2) Yehova wika mwe uli ni ndundo jakumanununa yilakenyo yenyi yeswe; iye mahasa kulinga ‘chuma cheswacho mazanga kulinga.’—Samu 135:5, 6.

 Tunakwite hanga ulilongese kutalatala chingunu chize chili mu Mbimbiliya. Muhasa kukolesa kutalatala chacho ha “kuhengwola kanawa Yisoneko.” (Yilinga 17:11) Fupa kukolesa kutalatala chacho ha kulilongesa Mbimbiliya ni yetu chawana. Putuka mwaka wa 2023 ni nyonga lialita!