Ha 9 Outubro 2024, ulukiso uze watala ha yitangiwa (World Wildlife Fund) unakatuhwisa umwe lusango wasolwele chize yitanga ya atu yinakwate ha mwono wa tushitu a mu yambu. Lusango wacho kasolwele ngwo, “ha miaka 50 yapalika (1970-2020), tushitu a mu yambu katepuluka chinji 73%.” Lusango yatoweza ngwo: “Kutwahianyishine yuma ha kwamba ngwetu, yize muyilingiwa ha miaka yitano yize muyizaho muyisolola nyi hashi muhanunga lume ni mwono nyi ka.”

 Atu anji kakunenganyana chinji muze akwivwa sango jino. Twakulivwa chocho, mumu twakuzanga hashi, nawa kutushi kuzanga kumona tushitu mamona lamba. Yino yakulingiwa, mumu Zambi katutangile hanga tufunge tushitu.—Uputukilo 1:27, 28; Yishima 12:10.

 Shina mutuhasa lume kufunga tushitu a mu yambu anunge ni mwono? Yika mbimbiliya yakulongesa?’

 Chipwe ngwe twakusa tachi hanga tufunge tushitu, nihindu kufunga hashi ni yuma yize yiliho kuchatalile hali yetu, alioze hali Zambi. Kulita ni Usolwelo 11:18, Mbimbiliya yaliangile kulu kwamba ngwo, Zambi ‘makonwona waze akwonwona hashi.’ Versu yino yinatulongesa yuma yaali:

1.  1. Zambi kechi kwecha hanga atu anongese hashi liakulu.

2.  2. Kwasala hakehe Zambi malulieka yuma. Kuchi tunachinyingika? Chize haze mwono waputukile, kanda kuchipwa kama amwe mashimbu waze atu ashiha tushitu anji ngwe musono.

 Yika Zambi makalinga hanga ahwise kapinda wacho? Iye makayula hashi heswe, kupalikila mu unguvulu wenyi wa mu malilu, hanji ngwetu, Wanangana wenyi. (Mateu 6:10) Unguvulu wacho muukafumba atu waze makafunga tushitu.—Izaia 11:9.