Ngwe chize chinalingiwa ku jila yize yili mu Ucrânia, mangana anji a mayingeleja waze akuliamba ngwo Akwa-Kristu kanakolweza jita yacho. Tala maliji ja amwe a kuli mangana jacho waze anakwase jita yino:

•   “Maswalale jetu eswe waze anakalila chifuchi cho, Ucrânia ha kulimika ni akwa-kole jetu, twatamba kwachichimieka ni kwasakwilila . . . Mbunge jetu ni yilemba yetu ya ku mbunge ni ukwaso wetu yeswe yili hali yenu.”—Metropolita Epifânio I de Kiev, ngwe chize anayisolola ha mukanda The Jerusalem Post, ya 16 Março, 2022.

•   “Ngana munene wa yingeleja ya Ortodoxa Russa kalikungulwile ni maswalale amu Rússia Liayenga hanga aalembele. Iye yaeta hanga akalile chifuchi cho ‘chuma chize Akwa-Rússia wika e mahasa kuchilinga,’ muze Moscovo ananungu ni kwasa jita ni Ucrânia.”—Reuters, 3 Abril, 2022.

 Shina Akwa-Kristu katamba kulinjisa mu jita? Yika Mbimbiliya yakulongesa?

 Mbimbiliya yakusolola ngwo tumbaji amwenemwene a Kristu keshi kulinjisa mu yuma ya jita.

•   “Funyisa njangu ye mu chindalo, mumu eswe waze manda njangu, makafwa ku njangu.”—Mateu 26:52.

   Shina mutu yoze wakutayiza jita hanji kulinjisa mu jita, acho kanakaula lume maliji wano a Yesu?

•   “Ngunanwehe shimbi yaha ngwami, lizangenu umwe ni mukwo, ngwe chizechene yami hingunanuzange, ni yenu nawa lizangenu umwe ni mukwo. Nyi munulizanga, atu eswe makanyingika ngwo yenu nuli tumbaji twami.”—Yoano 13:34, 35.

   Shina mutu yoze unakwase jita kanasolola lume zango lize Yesu ambile ngwenyi, mulinyingikisa tumbaji twenyi?

 Mba unyingike sango jikwo, tanga chikuma, “A Guerra é Compatível com o Cristianismo?”

 Shina chinalite Akwa-Kristu kuhona kulinjisa mu jita jize jinalingiwa musono? Ewa, chinalite. Mbimbiliya yambile kulu ngwo, ha matangwa wano tuli avuluka ngwo “matangwa a kusula,” te mukupwa atu mu yifuchi yeswe waze makaula malongeso ja Yesu, hachino kechi ‘kulilongesa nawa kwasa jita.’—Izaia 2:2, 4.

•   Mba unyingike nawa sango jikwo, tanga chikuma, “Kuchi Zambi Akunyonga Hakutwala ku Jita?” ha Kaposhi wa Kutalila.

 Kwasala hakehe Yehova, a “Zambi ya sambukila,” mazachisa Wanangana hanji unguvulu wenyi hanga atusule atu ku “yihungumiona ni uswi.”—A-Fwilipu 4:9; Samu 72:14.

•   Mba unyingike chize yuma yino muyikalingiwa, tala chinema, “Wanangana wa Zambi Yika?”