KANYAMENU!
Atu Kanalingi Yuma ya Upupilo hanga Alumune Mutapu wa Kuyula—Yika Mbimbiliya Yakulongesa?
Hashi hanalingiwa upupilo unji kuli akwa-mafwefwe, yino yinatwale atu hanga asakalale.
Ku México, ha mashimbu a kusakula nguvulu ha 2023-2024, kwalingiwa yuma yinji ya upupilo kuli akwa-mafwefwe, kuchingako kushiha cha miata ja akwa-mafwefwe 39, kwalula chize chahiana cheswe ndo ni haliapwila.
Mashimbu wano ene, mu Europa mwalingiwa yuma yinji ya upupilo wa akwa-mafwefwe, ngwe chilweza ha 15 ya Maio 2024, kesekele kushiha primeiro-ministro wa ku Eslováquia.
Atu mu Estados Unidos kasakalalile chinji muze Donald Trump yoze wapwile nguvulu, esekele kumushiha ha 13 ya Julho ya 2024.
Mumu liaka kuli upupilo unji wa akwa-mafwefwe? Shina upupilo muukeza kahwa limwe tangwa? Yika Mbimbiliya yakulongesa?
Mbimbiliya yaliangile kulu kuhanjika ha kulihandununa cha akwa-mafwefwe
Mbimbiliya yaliangile kulu kwamba ngwo, ha mashimbu jetu, waze avuluka ngwo “matangwa a kusula”, atu anji te masolola yitanga ya upupilo ni kuhona kulivwashana.
“Ha matangwa akusula, mukukapwa mashimbu akalu chinji. Mumu atu makapwa . . . keshi kusakwilila, keshi kushishika . . . kechi katayiza kulivwashana ni akwo, . . . asasu,. . . akwa-kukunjika akwo, akwa-pami, akwa-kulizata chinji.”—2 Timoteu 3:1-4.
Mbimbiliya nawa yaliangile kwamba ngwo, zungo, sango ja jita, ni atu yihulia waze te malimika ni nguvulu, ni vunda lia akwa-mafwefwe te muyilinga chihanda cha matangwa wano tuli. (Luka 21:9) Alioze, upupilo wa akwa-mafwefwe ni kulihandununa kuyichi kanunga ku miaka yeswe.
Kuhwa cha upupilo wa akwa-mafwefwe
Mbimbiliya yakwamba ngwo, Zambi makasalakanyisa unguvulu wa atu ni unguvulu wenyi, uze uli mu malilu.
”Zambi ya mwilu makakolesa umwe wanangana uze. . . muukafwenya mawanangana ano akwo ni kuasulisa, alioze wene muukakola wa mutolo.”—Daniele 2:44.
Wanangana wa Zambi muukanunga atu ni kuneha sambukila hashi eswe.
Mwanangana Yesu Kristu, kakumuvuluka ngwo, “Mwanangana wa Sambukila,” iye nawa makasa shindakenyo ngwo ‘sambukila yacho kuyichi kahwa.’—Izaia 9:6, 7.
Chipwe haliapwila tumbaji twenyi kanalilongesa kutwama mu sambukila. Hakutwala ku chikuma chino, Mbimbiliya yakwamba ngwo: “O makalumuna tutana two akapwe yikungo ya kulima nayo, makalumuna makunga jo akapwe poko ja kululika mitondo ya mihuko. Akwa vungu limwe kechi kasa jita ya katana ni akwa vungu likwo; kechi kalilongesa nawa kwasa jita.”—Izaia 2:3, 4.
Nyi muzanga kunyingika sango jikwo, tanga chikuma “Yika Wanangana wa Zambi Muukalinga?” tala nawa chinema Wanangana wa Zambi Yika?