Ha mwaka 2024, mukulingiwa yiwanyino yinji yakusakula manguvulu hashi heswe kuhiana ha miaka yize yapalika. Alioze atu anji keshi kujikijila nawa muli akwa-mafwefwe.

•   Kulita ni chimwe kuhengwola, atu anji mu America kakwamba ngwo, “akwa-mafwefwe anji kakwete kuzo,” ayo keshi kulinga yuma ni nyonga lia kukwasa atu. a—Pew Research Center, 19 Setembro, 2023.

 Chizechene nawa, akweze anji keshi kujikijila muli akwa-mafwefwe.

•   “Kanji-kanji, akweze anji kakulihulumba ha kapinda yoze unasoloka hano hashi, alioze kakwamba ngwo akwa-mafwefwe keshi kulihulumba ha kapinda wacho.”—The New York Times, 29 Janeiro, 2024.

•   “Kuhengwola chimwe chasolola ngwo, akweze kakujikijila chinji hali atu waze akusa yinema ha internet ni waze ali ni tumbaji anji ha internet kuhiana kujikijila muli akwa-mafwefwe.”—The Korea Times, 22 Janeiro, 2024.

 Shina mutuhasa kushimbwila ngwetu, akwa-mafwefwe malulieka yuma kulutwe lia matangwa? Nyi shina kuli mutu mukwo yoze mutuhasa kujikijila?

 Chili chilemu kunyingika kanawa mutu yoze watamba kujikijila. Mbimbiliya yakwamba ngwo: “Chizuzuke kakufuliela maliji eswe; alioze chikanyame kakutala kanawa ku kwenda chenyi.”—Yishima 14:15.

•   Mba unyingike nyi sango jimwe jili jamwenemwene nyi ka, tanga chikuma “Como se proteger de informações falsas.”

 Chikwo nawa, chipwe manguvulu waze akwete mbunge yipema, nihindu kechi kuhasa kulinga yeswe yize atu akuzanga. Kashika, Mbimbiliya yakuhana utowezo uno ngwo:

•   “Kanda ujikijila muli manguvulu ja ana ja atu, mumu kukushi mutu niumwe yoze mahasa kukulamwina.”—Samu 146:3, Good News Translation.

 Mbimbiliya yakusolola ngwo Zambi hanasakula umwe nguvulu wajama yoze mutuhasa kujikijila: Yesu Kristu. (Luka 1:32, 33) Yesu kali Mwanangana wa mu Wanangana wa Zambi, umwe unguvulu uze watwama mu malilu.—Mateu 6:10.

•   Tala mumu liaka muhasa kujikijila muli Yesu ni yize makalinga hanga ahwise lamba lize twakumona. Tanga yikuma, “Iya Mwanangana mu Wanangana wa Zambi?” ni “Yika Wanangana wa Zambi Muukalinga?”