Ha 19 ya Maio 2022, chizavu cha Nações Unidas kevwile umwe lusango kuli akwa-kuyula a ndundo 75 ngwo: “Kuhona kulia hashi heswe chize chejile mumu lia COVID-19 ni ku kwalumuka cha tungonde, haliapwila chinaliwezela mumu lia jita yili mu Ucrânia.” Hanyima lia yino, mukanda The Economist yiwamba ngwo, “mumu lia jita, hashi haze hali milonga yinji, muhazala nawa too ni atu waze mahona yuma ya kulia.” Mbimbiliya hiyinambe ngwo, kuhona yuma ya kulia te muchilingiwa ha matangwa jetu, alioze yinatulweze nawa chize mutuhasa kukumba kapinda wacho.

•    Yesu kambile ngwenyi: “Akwa vungu limwe makakatukila akwa vungu likwo, ni akwa wanangana umwe makakatukila akwa wanangana ukwo; kumukukapwa tupunga.”—Mateu 24:7.

•    Mbimbiliya, mu mukanda wa Usolwelo yinalumbununa akwa-kwendesa tuvwalu awana. Umwe wa kuli akwa-kwendesa tuvwalu kanalumbunuka jita. Mukwo kanalumbunuka zala, yize te muyisoloka ha mashimbu waze yuma ya kulia muyikala nawa mayilanjisa ndando yinji. “Namwene kavwalu mulaa. Yoze watwamineho kali ni mbalasa mu kwoko lienyi. Nevwile liji . . . ngwo, Njongo ya tiliku ha lumbongo umuwika, ni Njongo jitatu ja sevada ha lumbongo umuwika.”—Usolwelo 6:5, 6.

 Uprofeto wa Mbimbiliya hakutwala ku kuhona kulia unamanunuka musono, ha mashimbu waze Mbimbiliya yakuvuluka ngwo, “matangwa a kusula.” (2 Timoteu 3:1) Mba tunyingike nawa hakutwala ku “matangwa a kusula” ni akwa-kwendesa tuvwalu awana waze anatongola mu mukanda wa Usolwelo, tala chinema, O Mundo Mudou Desde 1914 ni kutanga chikuma, “Akwa-Tuvwalu Awana—Yika Analumbunuka?”

•    Mu Mbimbiliya muli yiyulo yipema yize muyihasa kutukwasa muze tunapalika mu yuma yikalu, kuchingako kwoka cha ndando ha yuma ya kulia hanji kuhona kulia. Yiyulo yacho yimwe yili ha chikuma, “Como Viver com Menos Dinheiro?”

•    Mbimbiliya nawa yakutwaha kutalatala ngwo yuma muyikapema. Yinatulakenya ngwo, “kumukukapwa kulumbama cha mbuto mu mavu,” chekwamba, mutukapwa ni kulia chinji chize muchikakumbana kuli atu eswe. (Samu 72:16) Mba tunyingike yuma yinji ha kutalatala cha kulutwe lia matangwa chize chili mu Mbimbiliya ni chize mutuhasa kujikijila ha yize Mbimbiliya yakwamba, tanga chikuma, “Você Pode Acreditar Num Futuro Melhor.”