Kuli atu anji hano hashi, kuwana mbongo jize malikwasa najo chinakale chinji.

•   Kulita ni umwe lusango mwaha wa hashi heswe, a “mbongo jize akufweta atu ku milimo jikehe chinji.” Lusango wacho yatoweza ngwo, nyi kukwalingiwile nichimwe “mukupwa kalisa munene hakachi ka pichi ni yiswale,” chikwo nawa, “asoko anji mamona lamba linji kuhiana lize hanamono kunyima.”

 Shina manguvulu mahasa kuhwisa kapinda wa mbongo hanji kumutepulula?

 Mbimbiliya yinambe ngwo kuli umwe unguvulu uze muuhasa kuhwisa kapinda wa mbongo, kuchingako kalisa watwama hakachi ka pichi ni yiswale. Yinambe nawa ngwo: “Zambi ya mwilu makakolesa umwe wanangana,” hanji ngwetu, unguvulu uze muukalulieka yuma yeswe hashi. (Daniele 2:44) Mu unguvulu wacho, mutu niumwe kechi kamuvulama hanji kumusa kutenga. (Samu 9:18) Waze eswe makapwa mu chiyulo cha Wanangana wa Zambi, makapwa ni yeswe yize mafupiwa hanga awahilile ku mwono. Eswe makayuka ha milimo ya kuhondangana cho.—Izaia 65:21, 22.