Hashi heswe hali unji wa tunaye 70 milhões waze akuhanjika malimi a tunaye kuhiana 200. Chaluyinda, tunaye kanji-kanji kakwamwesa lamba kuli akwo ngwe chize mutumona:

•   “Mu yifuchi yeswe ulite wa tunaye kashi kuulemesa.”—Associação Nacional de Surdos (EUA).

•   “Mu yifuchi muze muli uswale unji, tunaye nihindu kali yiswale hakachi ka atu akwo, kakupwa ni uhashi ukehe wa kulilongesa, kuwana milimo, ni yuma yikwo nawa.”—Federação Mundial de Surdos.

 Kuchi Zambi akwivwa hakutwala hali tunaye? Yika Mbimbiliya yakwamba hali tunaye? Kuchi Yela ja Yehova anakwase tunaye musono?

Chize Zambi Akumona Tunaye

 Mbimbiliya yakusolola ngwo Yehova a kakulihulumba hali tunaye. Iye kanazange hanga aasolwele ululi ni kuyuka ha malongeso waze iye akuhana.

 Mbimbiliya yakwamba ngwo: “Kanda nutuka kafwa-matwi.”—Ulevi 19:14.

 Mbimbiliya yakwamba ngwo: “Zambi keshi katonde.”—Yilinga 10:34.

 Mbimbiliya yakwamba ngwo: “Yesu yaya mu mambonge . . . , ni kwambujola sango jipema ja Wanangana.”—Mateu 9:35.

 Mbimbiliya yakwamba ngwo: Yesu “kakuvwisa chipwe afwa-matwi, kakuhanjikisa tumama.”—Marku 7:37.

 Mbimbiliya yakwamba ngwo: “Matwi ja afwa-matwi majikuka.”—Izaia 35:5.

 Ulumbunwiso: Yehova hanambe ngwenyi, tufwa-matwi makevwa.—Izaia 29:18.

Chize Yela ja Yehova Akukwasa Tuneye Musono

 Yela ja Yehova kakulianyina sango ja kutalatala ni tunaye hashi heswe. Yika yinatukwase kulichinga? Twakufwambwisa Mbimbiliya, yinema ya malongeso a Mbimbiliya mu malimi a tunaye kuhiana 100. Chikwo nawa, twakulongesa Mbimbiliya ni kulinga kukunguluka mu malimi a tunaye. Twakulinga yuma yino yeswe yawana kuli waze anafupu ukwaso wa Zambi. Mumu liaka twakuchilinga? Mumu Yesu kambile ngwenyi: “Kanwahayo yawana, ni yenu yihanenu yawana.”—Mateu 10:8.

 Muhasa kuwana sango jino ha internet hanji kujichiza ni kujisa mu telefone ye kupalikila mu majila wano:

 JW.ORG. Pola ha chikuma limi helu lia lifwo hanga usakule limi lia tunaye lize muzanga.

 Aplicativo JW Library Sign Language. Sako aplicativo yino mu telefone ye hanji mu tablet hanga uhase kuchiza hanji kutala yinema mu limi lia tunaye.

Yikwata Yika Twakufwambwisa ya Kulongesa nayo Mbimbiliya?

 Mbimbiliya mu limi lia tunaye. Mu yifuchi yeswe, Mbimbiliya yitangu ya muundu mu limi lia tunaye yili Mbimbiliya ya Yisoneko Yisandu ya Chifuchi Chaha mu limi lia tunaye Americana. Haliapwila hita mwaka, Mbimbiliya ya Yisoneko Yisandu ya Chifuchi Chaha, kanayifwambwisa ya muundu hanji yihanda mu malimi anji a tunaye. (Mba uwane katalilo wa malimi, hanji kutala Mbimbiliya ha site, tala mushete, “ Tradução do Novo Mundo em Línguas de Sinais.”)

•   Tala chinema cha Mbimbiliya ya Chifuchi Chaha ya muundu mu limi ASL hanga unyingike mulimo uze wakupwako mba afwambwise Mbimbiliya mu limi lia tunaye.

•   Mba upwe ni chako cha kutanga Mbimbiliya, chiza aplicativo JW Library Sign Language. Aplicativo yacho muyihasa kukukwasa usakule versu jize unazange mu Mbimbiliya ya limi lia tunaye.

•   Dmytro ni Vita kali tunaye, alioze ano kakwivwa. Tala chize usoko wo wakuyuka ha kutala Mbimbiliya mu limi lia tunaye.

 Yinema ya malongeso a Mbimbiliya. Yela ja Yehova kakufambwisa yinema mu limi lia tunaye yize yakukwasa atu kunyingika ni kukaula yiyulo yipema ya mu Mbimbiliya hakutwala kuli . . .

•   Waze alimbata ni asoko

•   Twanuke ni akweze

•   Ana

 Longeso lia Mbimbiliya. Lilongese Mbimbiliya mu limi lia tunaye ni ukwaso wa umwe Chela cha Yehova ha shimbu lize muzanga. Eta longeso liacho liawana.

 Tala chize longeso lia Mbimbiliya liamukwashile, Jeson Senajonon, yoze watwama ku Filipinas, kupwa ni usepa upema ni Zambi.

 Mario Antúnez, kapwile ngana wa yingeleja ku Honduras. Tala chize awanyine makumbululo a yihula yize apwile nayo ya mu Mbimbiliya ngwe chize mwene analumbununa ha sango jenyi ja ku mwono ngwenyi, “Napwile ni yihula yinji te chishi kuwana makumbululo.”

 Kukunguluka ni yiwanyino. Hashi eswe tuli ni yikungulwila ni yizavu mu malimi a tunaye muze tunaye akulikungulwila poso jeswe hanga alilongese ni kuwayila Zambi. Chikwo nawa, hita mwaka twakululieka yiwanyino yinene-yinene ya kulongesa atu Mbimbiliya mu malimi a tunaye. Ha kukunguluka ni ha yiwanyino yetu, twakulumbunwina tufwa-matwi ni tupuputa kupalikila mu yilayi ya ku moko. Chikwo nawa, twakuhana mikanda yawana mu braille.

•   Wana chikungulwila chili hakamwihi ni kuze watwama.

•   Nyingika nawa hakutwala ku kukunguluka chetu cha mambonge ni cha mbonge.

•   Yako ha Chiwanyino cha Kwiwuluka Kufwa cha Yesu, kukunguluka chetu chilemu ha mwaka.

 José Luis Ayala yoze atwama ku México. Iye kasemukine kanaye mba kulutwe yapwa kapuputa. Nyingika chize amukwashile kupwa longeshi mupema wa Mbimbiliya.