“Organização Mundial da Saúde (OMS) kambile ngwo, kumwesa lamba mapwo uli umwe musongo wa hashi heswe. Chikuma chino chinafupiwa ukwaso ni kawashi-washi. Kulita ni kwalula chize OMS alingile chasolwele ngwe, “(30%) ya mapwo waze apwile ni umwe usendo hanalambe kama, hanji kwasumbakenya ku tachi.” Chikwo nawa, sango ja Organização das Nações Unidas (ONU) jinasolola ngwo, hita tangwa unji wa mapwo 137 kakwashiha kuli mutu wa mu usoko wo. a

 Kwalula chize akulinga muchihasa kusolola ponde yize yakwiza ku lamba lize akumwesa mapwo, alioze kwalula chacho chishi kusolola yikola yeswe yize mapwo akwivwa ku mujimba ni ku manyonga.

 Shina yena uli umwe wa kuli atu waze anapalika mu kapinda wacho? Shina unanyingika umwe yoze unapalika mu kapinda yono? Kashika, tala chize Mbimbiliya muyihasa kukwasa waze anapalika mu kapinda wacho.

  Mulonga hi wa yena ko

  Fupa ukwaso

  Yena kushi ukawe

  Lamba ku mazuwo mulikahwa

  Chize muhasa kukwasa mapwo waze akwamwesa ku mazuwo jo

 Yize Mbimbiliya yakulongesa: “Mutu ni mutu kumakalumbununa hakutwala kuli iye mwene kuli Zambi.”—A-Roma 14:12.

 Iwuluka ngwe: Mulonga uli wa mutu yoze unakumwesa lamba.

 Nyi ngwe lunga yoze watwama nenyi makulamikiza ha lamba lize akukumwesa, mulonga hi wa yena ko, alioze uli wa iye unakumwesa lamba. Mapwo katela kwazanga, hi kwalamba ko.—A-Kolosu 3:19.

 Ha yisuho yimwe, chitoji kakumwesa lamba pwo mumu lia utu wenyi wa ukalu, chize amulelele, hanji mumu lia kunwa walwa. Chipwe chocho iye makakumbulula kuli Zambi mumu lia lamba lize akukumwesa. Iye katamba kusa tachi hanga alumune mwono wenyi ni kulitwamula kukulamba.

 Yize Mbimbiliya yakulongesa: Kuze kuli akwa-yiyulo anji yuma yakwenda kanawa.—Yishima 15:22.

 Iwuluka ngwe: Ni mulivwa ngwe uli mu ponde hanji kuwanyingikiene yize watamba kulinga, atu akwo mahasa kukukwasa.

 Mumu liaka twakufupa ukwaso wa akwetu? Muhasa kunyonga yuma yinji. Alioze, nyi unazange kunyingika yize watamba kulinga mba ukumbe kapinda yono, hanji muhasa nawa kunyonga ha yikuma ngwe yino:

•   Chize mulifunga yena mwene

•   Chuma chize muchikwasa ana je

•   Nyi uli ni mbongo ja kulikwasa najo

•   Nyi wakuzanga lunga lie

•   Nyi ngwe iye matayiza kwalumuna yitanga yenyi, muhasa kulinga yimwe hanga nupemese ulo wenu.

 Hi chipiko kuyambashina hanji kulivwa ngwe kuchi kuhasa kukumba kapinda wacho. Alioze kuli iya muhasa kwita ukwaso?

 Kuli umwe sepa hanji usoko yoze wakujikijila iye mahasa kukukwasa ha yize mufupiwa. Ha mashimbu amwe kuhanjika wika ni umwe mutu muchihasa kukukwasa hanga alivwe kanawa.

 Ku yihela kuze akutambula atu waze akwamwesa lamba ku mazuwo jo mahasa kuhana ukwaso ha shimbu lizeliene. Atu waze akukalakala ku yihela yacho mahasa kukukwasa hanga umone chize muhasa kulifunga. Nyi ngwe lunga lie manyingika ngweyi kukulamba chili chipi ni kuzanga kwalumuka, yihela yino ya ukwaso muyihasa nawa kuhana ukwaso kuli lunga lie hanga alitwamine ku kulamba.

 Kuze akuhana ukwaso wa kafuji-fuji mahasa kukukwasa ha mashimbu akulu kuli mbuki hanji kuli atu waze akufumba hanga alinge mulimo wacho.

 Yize Mbimbiliya yakulongesa: “Yehova b katwama hehi ni waze amakuka mbunge. Kakulamwina waze ali ni spiritu ya kupihilila.”—Samu 34:18.

 Iwuluka ngwe: Zambi kanalakenya kukukwasa.

 Yehova kalulihulumba chinji hali yena. (1 Petulu 5:7) Iye kananyingika manyonga je ni chize wakwivwa. Mahasa kukutakamisa kupalikila mu Liji lienyi, Mbimbiliya. Yehova Kanazange hanga ulembe kuli iye. Muze mulemba, muhasa kwita mana ni tachi jize unafupiwa hanga ukumbe kapinda yoze unapalika.—Izaia 41:10.

 Yize Mbimbiliya yakulongesa: “Mutu mweswe matwama mushi lia mutondo wenyi wa uva hanji mushi lia mutondo wenyi wa makuyu; niumwe maavwisa woma.”—Mika 4:4.

 Iwuluka ngwe: Mbimbiliya yakulakenya ngwo, kulutwe lia matangwa atu eswe makapwa ni chihela chize makatwama ni sambukila.

 Yehova mwe wika mahasa kuhwisa yuma yeswe yize yakutunehena lamba. Mbimbiliya yinalakenya ngwo: “Iye makakusumuna masoji eswe ku meso jo, kufwa kuchichi kapwako nawa, kukuchi kapwa nawa kunenganyana, chipwe miteto, chipwe yikola.” (Usolwelo 21:4) Ha shimbu liacho, kutuchi kewuluka nawa yuma yipi yize twapalikile ku mwono. (Izaia 65:17) Yino ye Mbimbiliya yinalakenya.