KANYAMENU!
Mumu liaka Kuli Kole Yipwahaha?—Yika Mbimbiliya Yakulongesa?
Atu anji musono kakusolola kole mu yihanjika yo hanji kulinga akwo yuma yipi mumu lia katonde chipwe lume kulimika ni akwo mumu lia kulisa cha minyachi.
“Musono, kupalikila ha internet atu anji kanasolola kole yinji mu kuhanjika cho mumu lia jita yize yinalingiwa ku Israel ni ku Gaza, nawa mumu lia atu waze ananehe mbwanja.”—The New York Times, 15 Novembro, 2023.
“Kukatuka ha 7 ya Outubro, atu kanasolola kole yinji mu kuhanjika ni mbwanja yize yinakatuka ku katonde kuhiana ku mashimbu akunyima.”—Dennis Francis, presidente wa Assembleia Geral ya Nações Unidas, ha 3 Novembro, 2023.
Kole yize atu anasolola mu yihanjika, vunda ni jita hi yuma yaha ko. Mbimbiliya yakusolola amwe waze apwile ni kuhanjika “maliji asasu ngwe kutondekeza mivu” ni kulinga yuma hanga anehe jita ni vunda. (Samu 64:3; 120:7; 140:1) Ewa, Mbimbiliya yinalumbununa ngwo, kole yize tunamono musono yili ni umwe ulumbunwiso ulemu.
Kole yili chimwe chilayi cha ha matangwa jetu
Mbimbiliya yinasolola majila aali a mumu liaka kuli kole jinji musono.
1. Mbimbiliya yaprofetezele mashimbu waze te “zango lia atu anji mulikakekema.” (Mateu 24:12) Kashika, shimbu asolole zango, atu te malinga yuma yize muyaatwala alivwile kole umwe ni mukwo.—2 Timoteu 3:1-5.
2. Kole yize yinasoloka hano hashi musono, yinakatuka kuli Satana Ndiapu. Mbimbiliya yakwamba ngwo, “hashi heswe kakuyulaho kuli mwe mupi.”—1 Yoano 5:19; Usolwelo 12:9, 12.
Alioze Mbimbiliya yakusolola nawa ngwo, kwasala hakehe Zambi mahwisa yuma yeswe yize yakuneha kole. Chikwo nawa, iye kamahwisa lamba lieswe lize liakwiza ku kole. Mbimbiliya yinalakenya ngwo:
Zambi “makakusumuna masoji eswe ku meso jo, kufwa kuchichi kapwako nawa, kukuchi kapwa nawa kunenganyana, chipwe miteto, chipwe yikola, mumu yuma yitangu hiyapalika.”—Usolwelo 21:4.