Hashi heswe, chifuchi yinji yinalihandununa mu yuma ya mafwefwe. Kulita ni chimwe kuhengwola chize alingile, “makulwana 65% mu yifuchi 19 kambile ngwo, yuma ya mafwefwe ye yinanehe kulihandununa chinene mukachi ka atu musono.”

 Shina hiwamona ngwe atu kuze watwama kanalihandununa chinji mumu lia yuma ya mafwefwe? Mumu liaka akuchilinga? Yika muyihasa kuhwisa kapinda wacho? Tala yize Mbimbiliya yakwamba.

 Mbimbiliya yambile kulu ngwo ha mashimbu jetu, waze anatale ha “matangwa a kusula,” atu anji te mapwa ni yitanga yize muyihandununa atu.

•   “Ha matangwa a kusula kumukukapwa miaka yikalu. Mumu atu kumakapwa akwa kulifwila ene, . . . keshi kuhutuka.”—2 Timoteu 3:1-3.

 Chipwe ngwe atu anji kakusa tachi hanga akwase manguvulu kulinga kanawa yuma, nihindu yino kuyishi kulingiwa. Atu waze akwete manyonga alisa; chakwakalila kulivwashana hanji kukalakala hamuwika ni akwo hanga ahwise milonga. Yuma yinalingiwako yizeyene Mbimbiliya yaliangile kulu kwamba.

•   “Mutu [nyi] mapwa ni chiyulo helu lia mukwo kakumupinjisa wika.”—Chilumbununyi 8:9.

 Alioze, Mbimbiliya yinatwehe kutalatala ngwo, wanangana uze anasongwela kuli Yesu muukahwisa lamba lieswe lize atu anamono musono.

 Mbimbiliya yinasolola mwanangana umuwika yoze uli ni uhashi wa kuhwisa lamba lieswe: Yesu Kristu. Yesu kali ni ndundo, wata ni zango lia kuheha kulinunga ni sambukila mukachi ka atu.

•   “Ha matangwa jenyi akwa ululi kumakawaha ni kulumbama cha sambukila.”—Samu 72:7.

•   “Mavungu eswe kumakamulingila.”—Samu 72:11.

 Yesu kali mwanangana mupema mumu kakulihulumba hali atu ni kwazanga, chipi-chipi waze akupalika mu yuma yipi.

•   “Kumakapulula mukwa kuhona muze mateta; ni chiswale yoze keshi chikwashi. Chiswale ni mukwa kuhona kumakaavwila keke. Kumakalamwina mwono wa waze anahono. Kumakakuula mwono wo ku yihungumiona ni uswi.”—Samu 72:12-14.

 Nyingika sango jikwo hakutwala ku Mwanangana wa Zambi, unguvulu uze Yesu anasongwela. Fupa kunyingika chize muyuka ha wanangana uno ni kuukwasa.

•   Tala chinema, Wanangana wa Zambi Yika?

•   Tanga chikuma “Wanangana wa Zambi—Chiyulo Chize Kuchishi Kalimbalimba.”