Chinasoloka ngwe atu tununu atano a tununu hashi heswe matala konda ya FIFA ya Mundial yize yaputukile ha 20 ya Novembro ni kuheta ha 18 ya Dezembro. Anji kanashimbwila ngwo, yiheho yacho muyilinga yuma yinji hi wika ko kukunga atu hamuwika muze anayitale.

•   “Yiheho ya konda yili ni ndundo ja kwalumuna yuma hano hashi. Yili ni ndundo ja kutwala atu alinge yimwe. Yili ni ndundo ja kununga atu mu yimwe jila yalipwila.”—Nelson Mandela yoze wapwile mwata wa chifuchi cha África do Sul.

•   “Konda ya futebol . . . yakununga atu mumu ayo kakupwa ni kutalatala chimuwika, uwahililo, kulifwila chinji, kulizanga umwe ni mukwo, nawa ayo eswe kakupwa ni chimwe chalifwa.”—Gianni Infantino, tetekeli wa chizavu cha FIFA. a

 Shina Mundial ya Futebol hanji yiheho yikwo yeswayo muyihasa lume kupemesa yuma mu mwono wa atu? Shina kuli chimwe kutalatala hakutwala ku sambukila ni kulinunga cha atu?

 Mundial ya Futebol ya mwaka uno kuyinatale ha yuma yinji hi wika ko kuheha konda. Yavumbula yikuma yikwo nawa ngwe, kutwama cha atu, yuma ya mafwefwe, ulite mukachi ka atu, katonde wa chikowa ni kalisa wa upite.

 Atu anji kakuzanga chinji kutala yiheho ya yifuchi yinji ngwe ya Mundial ya Futebol. Alioze, chipwe ngwe atu kakuzanga yiheho yacho, nihindu yino kuyichi kuhasa kuneha kulinunga cha mashimbu eswe. Shimbu yinunge atu, kanji-kanji yakusolola manyonga ni yitanga ya kulihandununa yize Mbimbiliya yakwamba ngwo te muyisoloka “ha matangwa a kusula.”—2 Timoteu 3:1-5.

 Mu Mbimbiliya muli kutalatala chamwenemwene hakutwaka ku kulinunga cha atu hashi heswe. Yinalakenya ngwo, atu eswe hano hashi makalinunga mu chiyulo cha unguvulu wa mu malilu uze avuluka ngwo, “Wanangana wa Zambi.”—Luka 4:43; Mateu 6:10.

 Yesu Kristu, Mwanangana mu Wanangana wacho makasa shindakenyo hanga hashi heswe hakapwe sambukila ni kulinunga. Mbimbiliya yinambe:

•   “Akwa-ululi kumakawaha ni kulumbama cha sambukila.”—Samu 72:7.

•   “Kumakapulula mukwa-kuhona muze mateta . . . Kumakakuula mwono wo ku yihungumiona ni uswi.”—Samu 72:12, 14.

 Chipwe musono, malongeso a Yesu kananungu tununu a tununu twa atu mu yifuchi 239. Yize ayo akulilongesa, yakwakwasa kwehuka kuvwila akwo kole. Mba unyingike sango jikwo, tanga chikuma chinambe ngwo “Mutuhasa Kukumba Kole.”