Yika Mbimbiliya Yambile Hakutwala ku Kuhona Yuma ya Kulia ha Matangwa Jetu?
“Kuhwa cha zala.” Lino lie nyonga lia manguvulu anji a hano hashi. Ayo kanazange kuhwisa kapinda munene yoze atu akwete ha kwaha kulia hashi eswe. a Alioze, shina zala muyiza kahwa lume? Yika Mbimbiliya yakulongesa?
Mbimbiliya yaliangile kwamba ngwo kumukukapwa zala
Mbimbiliya yaliangile kwamba ngwo, kumukukapwa zala ha “matangwa a kusula,” hanji ngwetu, matangwa wano tuli. (2 Timoteu 3:1) Umwenemwene uli ngwo hi Zambi ko wakutunehena zala, alioze iye katutowezele hakutwala ku zala yacho. (Tiangu 1:13) Tala uprofeto waali mu Mbimbiliya.
“Kumukukapwa zala . . . kweka ni kweka.” (Mateu 24:7) Uprofeto uno unambe ngwo, kumukukapwa zala ku yihela yinji ya hashi. Jimwe sango jaha jinakatuka kuli akwa-kutala ha yuma ya kulima ni kulanjisa kulia jinambe ngwo: “Tachi jize akwa-hashi anase hanga ahwise zala ni kuhana kulia chipema kuli atu jinakokoloka.” b Tununu a tununu twa atu hano hashi keshi ni kulia chize anafupu. Mumu lia chino, anji kakufwa.
“Namwene kavwalu mulaa, yoze watwamineho wapwile ni mbalansa ku kwoko.” (Usolwelo 6:5) Ha uprofeto uno, kavwalu yono ni yoze unatwamaho kanalumbunuka zala ya ha matangwa a kusula. c Mbalansa yize anakwate yinasolola kulia chikehe chize atu te mapwa nacho. Muze mukwa-kwendesa kavwalu mapalika, limwe liji mulikololoka ngwenyi ndando ya kulia muyoka atu katamba kutulika kulia chize ali nacho. (Usolwelo 6:6) Uprofeto uno unashindakenya kuhona cha kulia hashi heswe chize tunamono musono, chize atu anji keshi nacho nawa keshi kuhasa chipwe kuchilanda.
Chize zala muyikahwa
Akwa-kuhengwola kakwamba ngwo kulia chize akulima te muchihasa kukumbana kuli atu eswe hano hashi. Mba mumu liaka tunahono yuma ya kulia? Yika Mbimbiliya yakwamba hakutwala ku yize Yehova, d makalinga hanga ahwise kapinda yono?
Kapinda: Manguvulu a hashi keshi kuhasa kuhwisa uswale ni kalisa yoze watwama hali pichi ni yiswale, yoze wakutwala atu anji ahone kuwana kulia.
Kuhwa cha kapinda: Manguvulu a hano hashi no kali yihenge, kashika makaasalakana ku umwe unguvulu ungunu—Wanangana wa Zambi. (Daniele 2:44; Mateu 6:10) Musono, atu waze yiswale keshi kuhana kulanda kulia. Alioze muze Wanangana wa Zambi muuputuka kuyula hano hashi, kapinda yono makahwa. Mbimbiliya yinambe chino hakutwala kuli Yesu Kristu, Mwanangana wa mu Wanangana wa Zambi ngwo: “Kumakapulula mukwa kuhona muze mateta. . . . Kumukukapwa kulumbama cha mbuto mu mavu helu lia milundu. Mihuko yaho kumuyikanyika ngwe Lebano.”—Samu 72:12, 16.
Kapinda: Jita yakupihisa yuma yinji ni kuneha kapinda wa mbongo, chino chakukwika kulia chihone kuheta kuli atu anji.
Kuhwa cha kapinda: Zambi makanongesa mata eswe akwasa no jita ni waze akuyasa. Mbimbiliya yinambe ngwo: “[Yehova] hamanununa jita ndo ku songo lia hashi; kakumakuna uta; kakupatula kunga hakachi; kakwocha ni kahia matemba a jita.” (Samu 46:9) Muze yuma yino muyikalingiwa, atu makahasa kupwa ni kulia chipema nawa ha shimbu lialita. Mbimbiliya yinalakenya ngwo: “Akwa ululi kumakawaha kulumbama cha sambukila.”—Samu 72:7.
Kapinda: Kupiha cha tungonde ni luyinda wa chisemewa yakupihisa mbuto ni kushiha tushitu anji.
Kuhwa cha kapinda: Zambi makahasa kukwika tachi ja chisemewa. Hachino, mutukahasa kulima kanawa yuma ya kulia. Mbimbiliya yinambe ngwo: “[Yehova] kakuholesa kangonga kulu, hanga mikanya yamo yimane chizechene. . . . Kakwalumuna puya yikapwe chitende cha meya. Chifuchi chize chumu kakuchalumuna ngwe mafuji a meya. Kwenako matungisa . . . Akakuwe mu mande, akatumbe minda ya uva, akazuke kwoka cha mihuko.”—Samu 107:29, 35-37.
Kapinda: Akwa-kuzo ni akwa-kalimba-limba kakukinda kulia hanga chihone kuheta kuli waze anachifupu, chikwo nawa kakutuhwisa kulia chize chakunehena atu lamba.
Kuhwa cha kapinda: Wanangana wa Zambi muukanongesa atu eswe waze akuzanga kalimba-limba. (Samu 37:10, 11; Izaia 61:8) Mbimbiliya yinahanjika hali Yehova ngwe, “Yoze wakupatwila akwa luyinda. Yoze wakuhana kulia kuli akwa zala.”—Samu 146:7.
Kapinda: Miaka ni miaka, kulia chinji hashi heswe kakuchimbila.
Kuhwa cha kapinda: Muze Wanangana wa Zambi muuputuka kuyuka hashi, kulia chize atu makalima makachizachisa mu jila yalita. Muze Yesu apwile hano hashi te kakusa shindakenyo hanga ahone kukisa kulia. Ngwe chilweza, tangwa limwe Yesu kalingile chikomokeso hanga alise atu tununu 5. Hanyima lia chino, iye yalweza tumbaji twenyi ngwenyi: “Kungenu yihanda yize yasalaho hanga tuhone kukisa nichimwe.”—Yoano 6:5-13.
Wanangana wa Zambi muukahwisa kapinda yoze wakuneha zala. Hachino, atu eswe makapwa ni kulia chipema chize muchikakwasa ku mwono. (Izaia 25:6) Mba tunyingike ha shimbu lize Wanangana wa Zambi muukalinga yuma yino, tala chikuma, “Shimbu Lika Wanangana wa Zambi Mukayula Hano Hashi?”
a Kulita ni katalilo wa 2030 wa kwoka cha kulia yoze atuhwishile ku yifuchi yeswe yize ya kulinga chihanda ku Nações Unidas ha 2015.
b Lusango umwe yoze asonekanga hamuwika mu chizavu cha Organização das Nações Unidas unatale ha kulima ni kulia, ha mbongo ja hashi heswe jize mazachisa hanga okese yuma ya kulia, mbongo ja Nações Unidas jize mazachisa kuli twanuke, katalilo wa hashi heswe wa yuma ya kulia ya Nações Unidas ni ululikiso wa hashi unatale ha yuma ya uwukiso.
c Mba unyingike nawa hakutwala kuli akwa-kwendesa tuvwalu awana waze anatongola ha Usolwelo tala chikuma, “Akwa-Tuvwalu Awana—Yika Analumbunuka?”
d Yehova lie jina Zambi. (Samu 83:18) Tala chikuma, “Yehova Iya?”
Kota Muzanga Chinji Yuma Yize Mumona
ESSENTIAL BIBLE TEACHINGS
Wanangana wa Zambi Yika?
Muze Yesu akalakalile mulimo wenyi, te kakulongesa atu hakutwala ku Wanangana wa Zambi kuhiana chuma cheswacho. Ha miaka yinji, atu te kulemba hanga Wanangana wize.
