Hashi heswe, atu kanapalika mu chimwe kusasaminya chikolo ni kwalumuka cha tungonde. Tala chize sango jimwe jinasolola:

•   “Hikwapalika cha miaka 174 hashi hasasaminya chinji kuhiana ha kakweji wa Junho.— Agência Nacional de Oceanos e Atmosfera, Departamento de Comércio dos EUA, 13 Julho, 2023.”

•   “Mu chifuchi cha Itália, Espanha, França, Alemanha ni Polônia munasasaminya chinji, yikwata yize yakusolola kusasaminya yinahete ndo ha 48°C ku tungu lia Sicília ni lia Sardenha — chino muchihasa kupwa kusasaminya chinene chize chalingiwa mu Europa yeswe.”—Agência Espacial Europeia, 13 Julho, 2023.

•   “Muze hano hashi hanayi ni kusasaminya, chino chinanokesa vula munji, yoze unanoko ha mashimbu eswe ni kuneha masanga anji a meya.”—Stefan Uhlenbrook, diretor wa hidrologia, água ni criosfera mu Organização Meteorológica Mundial, 17 Julho, 2023.

 Shina wakulipikala muze wakwivwa sango hakutwala ku kusasaminya chize chinasoloka hano hashi? Tala yize Mbimbiliya yakwamba ha chikuma chino chilemu.

 Ewa. Kusasaminya ni yuma yikwo yinalingiwa mu kwalumuka cha tungonde hashi heswe yinatale ha yize Mbimbiliya yambile ngwo, muyilingiwa ku matangwa a kusula. Chakutalilaho, Yesu ambile ngwenyi te mutumona “yuma yakwivwisa woma” hanji “yuma yakuvwisa mwongo.” (Luka 21:11) Kusasaminya chize chinalingiwa hashi heswe chinatwale amwe kunyonga ngwo, atu manongesa hano hashi.

 Ka. Zambi katangile hashi hanga tutwameho. Kashika, kechi kwecha hanga atu anongeseho. (Samu 115:16; Chilumbununyi 1:4) Kwamba umwenemwene, iye kanalakenya “konwona waze akwonwona hashi.”—Usolwelo 11:18.

 Mbimbiliya yakwamba ngwo, Zambi kechi kwecha hanga yuma yize yakupihisa tungonde yonwone hashi.

•   “[Zambi] kakuholesa kangonga kuluu, hanga mikanya yamo yikamane chizechene.” (Samu 107:29) Zambi kali ni ndundo ja kusongwela tachi ja chisemewa. Iye kali nawa ni ndundo jakululieka yuma yize yinasasamisa hano hashi ni kumwesa atu lamba.

•   “Wakufunga hashi; wakuwahisaho chikolo ni mihuko.” (Samu 65:9) Ni ukwaso wa Zambi hamwe ni yiwape yenyi, hashi heswe muhakapwa paraisu.

 Mbimbiliya yakwamba ngwo, tungonde waze anapihi yeswe kumakapema. Mba uwane sango jikwo ha chikuma chino, tanga mutwe: “Quem Vai Salvar a Terra?”