Ha lusango umwe yoze watuhukile ha Junho 2022, kasongo wa Banco Mundial kambile ngwenyi: “Economia ya hashi heswe yili mu ponde. Ha mashimbu wano, ndando ya yuma yinoke chinji, alioze atu keshi nawa ni mbongo.”

 Ululikiso wa Fundo Monetário Internacional yiwamba ngwo: “Ndando ya maji a mitoli ni yuma ya kulia yoka ni kawashi, ni kukwata chinji hali atu waze keshi uhashi wa kulanda yuma.”

 Mbimbiliya yakutukwasa kunyingika mumu liaka tunapalika mu kapinda mupwahaha wa kuhona mbongo, kuchi mutuhasa kumukumba ni kusolola yize mutulinga ha kapinda wacho.

•   Mbimbiliya ya kuvuluka mashimbu wano tuli ngwo “matangwa a kusula.”—2 Timoteu 3:1.

•   JYesu kambile ngwenyi, “yuma ya kuvwisa woma” hanji ya kukomwesa te muyilingiwa ku matangwa a kusula. (Luka 21:11) Kwoka cha ndando ya yuma chakuvwisa chinji atu woma. Atu kakulihulumba hakutwala ku matangwa a kulutwe nyi makahasa nawa kulia asoko jo.

•   Mukanda wa Usolwelo waprofetezele ngwo ku matangwa a kusula yuma te muyikola ndando. Unambe ngwo: “Nevwile ngwe liji . . . ngwo, Njongo ya tiliku ha lumbongo umuwika, ni njongo jitatu ja sevada ha lumbongo umuwika.”—Usolwelo 6:6, Mukanda Usandu wa Zambi.

 Mba unyingike nawa yuma yinji hakutwala ku “matangwa a kusula” ni uprofeto wa Usolwelo, tala chinema chinambe ngwo, Chize ha Mwaka 1914 Hashi Halumuka Chinji ni kutanga chikuma, “Akwa-Tuvwalu Awana—Yika Analumbunuka?”

•   “Kumakatunga mazuwo ni kutwamamo; kumakatumba minda ya uva ni kulia ye mihuko yamo. Kechi katunga hanga akwo akatwamemo, kechi katumba hanga akwo akalieko.”—Izaia 65:21, 22.

•   “Kumukukapwa kulumbama cha mbuto mu mavu helu lia milundu.”—Samu 72:16.

•   “Yehova kanambe ngwenyi, Mumu ha lamba lia mukwa luyinda, ha mikuma ya chiswale mungukatuka haliapwila.”—Samu 12:5. a

 Kwasala kakehe Yehova mahwisa uhenge ni yuma yeswe yize yakuneha kapinda wa mbongo, hi mu chifuchi chimuwika ko, alioze hashi heswe. Mba unyingike kanawa chikuma chacho, tanga chikuma, “Shina Chili Chashi Kuhwisa Kalisa wa Mbongo Yoze Atu Akwete?”

 Alioze kukatuka haliapwila Mbimbiliya muyihasa kukukwasa kumona chize mukunda kapinda wa kwoka cha ndando ya yuma. Mu mutapu uka? Yakuhana yiyulo yipema hakutwala ku chize mutu mazachisa mbongo. (Yishima 23:4, 5; Chilumbununyi 7:12) Mba unyingike nawa sango jikwo, tanga yikuma, “Zachisa Kanawa Mbongo Je” ni “Chize Muhasa Kutwama ni Mbongo Jikehe.”