Ha tangwa 24 ya Fevereiro 2022 ha mandemba, maswalale a mu Rússia yaputuka kulukukila chifuchi cha Ucrânia. Chipwe ngwe manguvulu a mu yifuchi yinji kasa tachi hanga akinde yuma yacho, nihindu kaahona. Kuchi jita yino muyihasa kukwata ha yifuchi yeswe ya hashi? Ha matangwa akehe apalika, secretário-geral wa Nações Unidas avuluka ngwo, António Guterres kanakamba ngwenyi: “Jita yino muyenyeka yuma yinji ni kukoka lamba linji mu yifuchi ya mu Europa ni yifuchi yikwo ya hashi heswe.”

•   Yesu Kristu kaprofetezele hakutwala ku mashimbu amwe waze te ‘akwa vungu limwe makatukila akwa vungu likwo, ni akwa wanangana umwe makatukila akwa wanangana ukwo.’ (Mateu 24:7) Tanga chikuma chakwamba ngwo: “O que é o sinal dos ‘últimos dias’ ou ‘fim dos tempos’?” hanga umone chize Mbimbiliya yakusolola ngwo jita ya musono yinamanununa uprofeto wa Yesu.

•   Mukanda wa Usolwelo wakusolola jita ngwe kavwalu muchila, yoze “ahanyine kuli yoze watwamineho kuchiza sambukila hashi.” (Usolwelo 6:4) Tanga chikuma chakwamba ngwo: “Akwa-Tuvwalu Awana—Yika Analumbunuka?” hanga umone chize uprofeto wacho unakwata ha jita ya musono.

•   Mukanda wa Daniele waliangile kuhanjika hakutwala ku kulimika hakachi ka “mwanangana wa ku norte” ni “mwanangana wa ku sule.” (Daniele 11:25-45) Tala chinema chakwamba ngwo, Uprofeto Uze Hiunamanunuka—Daniele Kapitulu 11 hanga umone chize Rússia ni waze akumukwasa anasolola ngwo kali mwanangana wa ku norte. a

•   Mukanda wa Usolwelo unahanjika nawa hakutwala ku “jita ya tangwa linene lia Zambi Mukwa-Ndundo-Jeswe.” (Usolwelo 16:14, 16) Alioze yino kuyichi kapwa jita ya mavungu, ngwe yize tunamono musono. Tanga chikuma chakwamba ngwo: “O que é a batalha do Armagedom?” hanga uwane sango jikwo hakutwala ku jita yacho.

•   Mbimbiliya yakwamba ngwo, Zambi makahwisa ‘jita hashi heswe’ (Samu 46:9) Tanga chikuma chakwamba ngwo: “Você pode acreditar num futuro melhor” hanga unyingike nawa hakutwala ku yuma yize Zambi alakenya kulutwe lia matangwa.

•   Yesu kalongesele tumbaji twenyi apwe ni kulemba hanga Wanangana wa Zambi wize. (Mateu 6:9, 10) Wanangana wacho uli umwe unguvulu uze watwama mu malilu, uze muukamanununa upale wa Zambi hano hashi. Ku yuma yize Wanangana muukalinga, chuma chimwe chili kuneha sambukila hashi heswe. Nyi unazange kulilongesa hakutwala ku yize Wanangana wacho muukalinga hali yena, tala chinema chinambe ngwo, Wanangana wa Zambi Yika?

 Mu chifuchi cha Ucrânia muli unji wa Yela ja Yehova kuhiana 129,000. Chizechene ngwe Yela ja Yehova mu yifuchi yikwo, mandumbu jetu mu Ucrânia kanembulula Yesu ha kwehuka kulinjisa mu yuma ya mafwefwe ni kuya ku jita. (Yoano 18:36) Hashi heswe, Yela ja Yehova kananungu ni “kwambujola sango ja Wanangana” ni kulweza atu ngwo, Wanangana wa Zambi we wika muukahwisa yuma yeswe yipi, hamwe ni jita. (Matthew 24:14) Tunakwichi ufupe umwehela cha Yehova hanga ulilongese sango jikwo hakutwala ku kutalatala cha mu Mbimbiliya.