Kalimbalimba wa atu waze akukalakala ku nguvulu kakulingiwa ku yihela yeswe, chikwo nawa kakuneha kapinda munji. a Chakutalilaho, ha mashimbu wanoene a musongo wa COVID-19, akwa kukalakala a mu yifuchi yimwe kaasumanga mulonga wa kusweka mbonge jize ahananga hanga akwase atu ha mashimbu a musongo wacho. Mumu lia chino, atu anji yamona lamba ni kufwa mumu katambwile uukiso walita.

 Kalimbalimba wa manguvulu kakumwesa atu lamba linji. Lunga avuluka ngwo David Cameron yoze wapwile ni kutumina mu chifuchi cha Reino Unido kambile ngwenyi: “Kalimbalimba kali ngwe wandajili unene uze uli mu yifuchi yeswe.”

 Chipwe chocho mutuhasa kupwa ni ushindakenyo ngwetu, kwasala hakehe hanga kalimbalimba mweswe wa manguvulu ahwe, mumu liaka tunambe chocho? Tutalenu yize Mbimbiliya yinambe.

 Mbimbiliya yinambe hakutwala kuli Zambi ngwo: “Yami Yehova nakuzanga upatwilo wa ululi, nakuvwila kupiha wiji ni uhenge.” b (Izaia 61:8) Zambi kakumona muze atu akumona lamba mumu lia kalimbalimba. (Yishima 14:31) Kashika kanalakenya ngwenyi: “Mumu ha lamba lia mukwa luyinda, . . . mungukatuka haliapwila.”—Samu 12:5.

 Yuma yika yize Zambi makalinga? Zambi makasalakana mawanangana eswe a hano hashi ni Wanangana wenyi wa mu malilu, uze avuluka ngwo, “Wanangana wa Zambi.” (Marku 1:14, 15; Mateu 6:10) Mbimbiliya yinambe ngwo: “Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.” (Daniele 2:44) Chenachize Zambi makahwisa kalimbalimba mweswe yoze twakumona musono.

 Kuchi tunanyingika ngwetu Wanangana wa Zambi kuchi kaneha kalimbalimba? Tutalenu yikuma yimwe yize yinatwehe shindakenyo yacho.

1.  1. Ndundo. Wanangana wa Zambi ukwete ndundo ja Mukwa-Ndundo-Jeswe.—Usolwelo 11:15.

    Mumu liaka kunyingika chino chili chilemu? Manguvulu a hano hashi kakuhasa kakukalakala mumu lia mbongo jize akushimbwila kuli atu waze ali mushi lia chiyulo cho. Kashika, chino chakutwala atu anji hanga alinjise mu kalimbalimba, wiji ni yuma yikwo nawa. Alioze, Wanangana wa Zambi kakuukwasa kuli Mukwa-Ndundo-Jeswe, kashika muukahasa kuhwisa lamba lieswe lize atu akumona.—Samu 145:16.

2.  2. Mwanangana. Zambi mwe watongwele Yesu apwe mwanangana wa Wanangana wa Zambi.—Daniele 7:13, 14.

    Mumu liaka kunyingika chino chili chilemu? Chipwe mianangana waze twakujikijila chinji mahasa kwapiangula alinge yuma yize muyimwesa atu lamba. (Chilumbununyi 7:20) Alioze, Yesu kalisa chinji ni mianangana jacho. (Mateu 4:8-11) Chikwo nawa, iye kakufupa kulingila atu yuma yipema mumu lia zango ni kulihulumba hali ayo.—Samu 72:12-14.

3.  3. Shimbi. Shimbi ja Wanangana wa Zambi japwa jingunu, chikwo nawa jakuneha uwahililo kuli waze akujikaula.—Samu 19:7, 8.

    Mumu liaka kunyingika chino chili chilemu? Shimbi ja atu japwa jikalu, jakupinjisa, chikwo nawa jakukwasa atu amwe kulinga kalimbalimba. Alioze, shimbi ja Zambi jakuyukisa. (Izaia 48:17, 18) Shimbi ja Zambi kujishi kusolola wika yize mutu atamba kulinga, alioze jakusolola nawa mumu liaka atamba kuyilinga. (Mateu 22:37, 39) Yehova kakuhengwola mbunge jetu, kashika twatamba kupwa ni shindakenyo ngwetu, iye kakutusela shimbi jenyi mumu lia zango.—Jeremia 17:10.

 Tunakwichi hanga ulilongese nawa yize Mbimbiliya yakwamba hakutwala ku chize atu makatwana hano hashi chakuhona kalimbalimba.

•   Tanga mutwe unambe ngwo “Wanangana wa Zambi—Chiyulo Chize Kuchishi Kalimbalimba” hanga umone yikuma yitatu yize yinasolola ngwo, Wanangana wa Zambi kuuchi kaneha kalimbalimba.

•   Tala chinema chakwamba ngwo, Wanangana wa Zambi Yika? hanga unyingike yuma yikwo hakutwala ku Wanangana wacho ni yize muukalinga hano hashi.

•   Tayiza longeso lia Mbimbiliya hanga umone chize muhasa kuyuka ni yilakenyo ya mu Mbimbiliya.