KANYAMENU!
Lamba Lize Akumona atu Waze Akuchina Jita—Atu anji Kanahichika Chifuchi cha Ucrânia
Ha tangwa 24 ya Fevereiro 2022, maswalale a mu Rússia kanakalukukila chifuchi cha Ucrânia. Mumu lia chino, atu anji yaputuka kuhichika chifuchi chacho ni kuchinyina ku yihela yeka. a
“Woma unji twevile muze mata a mbomba aputukile kulozeka. Muze twanyingikine ngwetu kuli tulela waze matukwasa kuchina, chocho yitukwata chiyulo cha kuhichika chifuchi. Twambachile wika mikanda, yitumbo, meya ni yimwe ya kulia. Twahichikile upite weswe kunyima chocho yituchinyina ku utulilo wa kalela.”—Natalia, wa ku Kharkiv, Ucrânia.
“Te kanda tunyonga kama ngwetu, mu chifuchi chetu mumulingiwa jita. Nevwile zungo lia mambomba anji malozeka ku yihela yimwe ya mbonge ni tupenda a mazuwo machikima. Ha mukunda wa chino hingukwata chiyulo cha kuhichika mbonge yacho ni kumbata wika yuma yize te muyingukwasa. Nakatukile kuzuwo ha maola nake hanga ngukwate kalela wa kuya ku Lviv, mba hanyima yingukwata mashinyi akwo ndo mu chifuchi cha Polônia.”—Nadija wa ku Kharkiv, Ucrânia.
Ha mutwe uno mutukumbulula yihula yino:
Yuma yika yize yakutwala atu kuchinyina mu yifuchi yeka?
Mu chifuchi cha Ucrânia lamba lioka chinji mumu kachilukukila kuli maswalale a mu Rússia. Alioze Mbimbiliya yinasolola kuze kunakatuka kapinda mweswe au:
Manguvulu a hano hashi keshi kuhasa kuhwisa kapinda mweswe yoze atu akupalika. Atu waze akwete poko ya kuyula kakuzachisa ndundo jo hanga amwese atu lamba.— Chilumbununyi 4:1; 8:9.
Satana Ndiapu, mwata wa hano hashi kakupiangula atu anji. Kashika Mbimbiliya yinambe ngwo: “Hashi heswe lukombo kuhakupomba mu chiyulo cha mwe chingulungulu.”— Yoano 14:30; 1 Yoano 5:19.
Kuchizako kapinda mweswe yoze atu akupalika, tuli ha mashimbu waze Mbimbiliya yakwamba ngwo: “ha matangwa a kusula kumukukapwa miaka yikalu.” (2 Timoteu 3:1) Chikwo nawa Mbimbiliya yakwamba ngwo, ha mashimbu jacho te mukulingiwa jita, minyiko, tupunga ni yilungo. Ayi yili yuma yize yakutwala atu anji kuchinyina ku yihela yeka.—Luka 21:10, 11.
Shina atu waze anachina jita mahasa kupwa ni kutalatala?
Mbimbiliya yakusolola ngwo, Yehova b Sakatanga wetu, kakuvwila keke ni kusolwela zango atu waze akuchina jita ni kuhichika mazuwo jo. (Shimbi Yamuchiali 10:18) Yehova kanalakenya kuhwisa kapinda mweswe wa atu waze anachina jita. Kashika, iye makazachisa Wanangana wenyi wa mu malilu uze akuvuluka ngwo, Wanangana wa Zambi, hanga asalakane mawanangana eswe a hano hashi. (Daniele 2:44; Mateu 6:10) Kupalikila mu Wanangana wacho, Yehova makanongesa Satana Ndiapu. (A-Roma 16:20) Wanangana wa Zambi mukayula hashi heswe ni kuhwisa katonde yoze watwama hakachi ka yifuchi. Atu eswe makapwa usoko umuwika, kukuchi kapwa nawa niumwe yoze makahichika zuwo lienyi, mumu Zambi kanalakenya ngwenyi: “Mutu mweswe matwama mushi lia mutondo wenyi wa uva hanji mushi lia mutondo wenyi wa makuyu; niumwe maavwisa woma mumu kanwa lia Yehova-wa-Tujita hilinahanjika.”—Mika 4:4.
Wanangana wa Zambi, we wika muukahwisa lamba lia atu waze anachina jita. Yehova makazachisa Wanangana wenyi hanga akahwise kapinda yoze wakutwala atu anji musono kuhichika yifuchi yo. Tutalenu yilweza yimwe:
Jita. Yehova ‘makamanununa jita.’ (Samu 46:9) Nyi unazange kunyingika chize Yehova makahwisa jita, tala chikuma chakwamba ngwo “Como haverá paz na Terra?”
Yihungumiona ni ungulungulu. “[Yehova] kumakakuula mwono wo ku yihungumiona ni uswi.” (Samu 72:14) Nyi unazange kunyingika chize atu mahasa kupwa ni utu upema, tala chikuma chakwamba ngwo “Chize Muhasa Kukumba Kole.”
Uswale. Nyi unazange kunyingika chize Yehova makahwisa uswale, tala chikuma chakwamba ngwo “Será que é possível acabar com a desigualdade econômica?”
Zala. “Kumukukapwa kulumbama cha mbuto mu mavu.” (Samu 72:16) Nyi unazange kunyingika chize Yehova makahwisa zala, tala chikuma chakwamba ngwo “Um mundo sem fome.”
Shina Mbimbiliya muyihasa kukwasa musono atu waze anachina jita?
Ewa, muyihasa kukwasa. Mbimbiliya kuyishi kuhana wika kutala tala cha mwono upema kulutwe lia matwangwa kuli waze anachina jita, alioze muyihasa kwakwasa nawa kukumba kapinda yoze anapalika haliapwila.
Shimbi ya mu Mbimbiliya: “Chizuzuke kakufuliela maliji eswe; alioze chikanyame kakutala kanawa ku kwenda chenyi.”—Yishima 14:15.
Ulumbunwiso: Esekenu kumona ponde yize munuhasa kupalika ni chize munuhasa kulifunga. Kanyamenu ni atu waze akuzanga kulinga upi kuli waze anahichika yifuchi yo ni kuchinyina ku yihela yize kanyingikine.
Shimbi ya mu Mbimbiliya: “Alioze nyi tuli ni ya kulia ni ya kuzala, chatutamba kuyuka nayo.”—1 Timoteu 6:8.
Ulumbunwiso: Kanda nunyonga chinji ha yikumba. Nyi munuyuka ni yuma yize nuli nayo, munuwahilila chinji.
Shimbi ya mu Mbimbiliya: “Yuma yeswe kashika nunazange atu alinge hali yenu, lingenu chizechene hali ayo.”—Mateu 7:12.
Ulumbunwiso: Sololenu upeme ni uhomboloji. Yitanga yino muyinukwasa hanga atu anuvumbike ni kunutayiza ku yihela kuze munuchinyina.
Shimbi ya mu Mbimbiliya: “Kanda nufwetesa niumwe yipi ha yipi. Lemesenu yuma yize yinapeme kumeso ja atu eswe.”—A-Roma 12:17.
Ulumbunwiso: Nyi makulinga upi, kanda ufwetesa yipi ha yipi mumu chino muchihasa kwokesa kapinda we.
Shimbi ya mu Mbimbiliya: “Kunahasa kulinga yuma yeswe muli yoze wakunguhashisa.”—A-Fwilipu 4:13.
Ulumbunwiso: Sako Yehova ha chihela chitangu ku mwono we ni kulemba kuli iye. Yehova mahasa kukukwasa kukumba kapinda we.
Shimbi ya mu Mbimbiliya: “Kanda nukalipikala ha chuma nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.”—A-Fwilipu 4:6, 7.
Ulumbunwiso: Etenu kuli Zambi hanga anukwase kupwa ni sambukila mu mbunge chipwe ngwe nunapalika mu kapinda mweswawo. Talenu chikuma chinambe ngwo: “Filipenses 4:6, 7—‘Não estejais inquietos por coisa alguma.’”
a Muze te jita hiyalinga tangwa limuwika, sango jasolwele ngwo, mu Ucrânia kapinda munji wapwilemo. Ha kupalika cha matangwa 12 atu anji kuhiana 2 milhões kahichikile chifuchi cha Ucrânia ni kuya ku yifuchi yize yili hakamwihi. Chikwo nawa, atu 1 milhão kanakachinyina ku yihela yeka-ni-yeka mu chifuchi cha Ucrânia.
b Yehova lili jina lia Zambi. (Samu 83:18) Tala chikuma chinambe ngwo: “Yehova Iya”
Kota Muzanga Chinji Yuma Yize Mumona
Maswalale a mu Rússia Kalukukila Chifuchi cha Ucrânia—Shina Uprofeto wa mu Mbimbiliya Unamanunuka?
Lilongese ulumbunwiso wa yino yuma yeswe.
ESSENTIAL BIBLE TEACHINGS
Wanangana wa Zambi Yika?
Muze Yesu akalakalile mulimo wenyi, te kakulongesa atu hakutwala ku Wanangana wa Zambi kuhiana chuma cheswacho. Ha miaka yinji, atu te kulemba hanga Wanangana wize.
KUMBULULO LIA YIHULA YA MU MBIMBILIYA
Shina Hashi Makanongesaho?
Yuma yize Mbimbiliya yakwamba, muyihasa kukukomwesa.
