Tala sango jimwe jize jinakatuka kuli akwa-Nações Unidas:

•   Kukatuka ha 7 ya Outubro ndo ha 23 ya Outubro, 2023, jita yize yili ku Gaza ni Israel hiyashiha atu kuhiana 6,400, nawa atu 15,200 kalemana, anji a kuli atu jacho hi maswalale ko. Chikwo nawa, tununu a tununu twa atu kachina ni kuhichika mazuwo jo.

•   Ndo ha 24 ya setembro, 2023, jita ya Rússia ni Ucrânia neyo yaneha lamba linji mukachi ka atu waze hi maswalale ko. Jita yize yili mu Ucrânia yashiha atu 9,701, nawa atu 17,748 kalemanyine.

 Kutalatala chika Mbimbiliya yinahane kuli atu waze anamono lamba mumu lia jita?

 Mbimbiliya yakwamba ngwo Zambi makahwisa “jita ndo ku songo lia hashi.” (Samu 46:9) Iye makachiza manguvulu ja atu hano hashi ni kusalakanyisaho unguvulu wenyi uze uli mu malilu. (Daniele 2:44) Wanangana wa Zambi muukahwisa lamba lieswe lia atu ni kuneha sambukila.

 Tala yize makalinga Yesu Kristu, Mwanangana mu Wanangana wa Zambi:

•   “Kumakapulula mukwa kuhona muze mateta; ni chiswale yoze keshi chikwashi. Chiswale ni mukwa kuhona kumakaavwila keke. Kumakalamwina mwono wa waze anahono. Kumakakuula mwono wo ku yihungumiona ni uswi.”—Samu 72:12-14.

 Kupalikila mu Wanangana wenyi, Zambi makahwisa yikola ni kunenganyana chize chakwiza mumu lia jita ni vunda. Yuma yino kuyichi kamwesa nawa atu lamba.

•   “Iye makakusumuna masoji eswe ku meso jo, kufwa kuchichi kapwako nawa, kukuchi kapwa nawa kunenganyana, chipwe miteto, chipwe yikola, mumu yuma yitangu hiyapalika.”—Usolwelo 21:4.

 Kwasala hakehe, Wanangana wa Zambi muuputuka kuyula hashi heswe. Mbimbiliya yaliangile kulu kuhanjika ha “jita ni sango ja jita” yize tunamono musono. (Mateu 24:6) Yuma yino ni yikwo yize yinalingiwako yinasolola ngwo, tuli ha “matangwa akusula” cha manguvulu a hano hashi.—2 Timoteu 3:1.