Hita mwaka, hashi heswe Yela ja Yehova ni tununu twa atu akwo waze akusanyika, kakukunguluka hanga Ewuluke Kufwa cha Yesu, ngwe chize mwene ambile. (Luka 22:19) Chiwanyino chino chakutukwasa kunyingika ulumbunwiso wa yize Yesu alingile muze ahanyine mwono wenyi hanga akuule atu. Chakusolola nawa yize chitapo chino muchihasa kulumbunuka kuli yetu eswe kukatuka haliapwila ndo kulutwe lia matangwa.—Yoano 3:16.

 Chipwe ngwe muupwa ha Chiwanyino cha Kufwa cha Yesu cha mwaka uno hanji ka, mba kuchi muhasa kuyuka ha chitapo cha ukuule wa Yesu? Yesu kalongesele ngwenyi, twatamba kulinga yuma yaali yilemu:

1.  1. Kulilongesa hakutwala kuli Zambi ni kuli Yesu. Muze alembele kuli Tato mu malilu, Yesu yamba ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.”—Yoano 17:3.

2.  2. Kukaula yize unalilongesa. Yesu kambile ngwenyi, twatamba kukaula malongeso jenyi ku mwono wetu. Chakutalilaho, iye kahwishile Longeso lienyi lia ha Mulundu ha kuchichimieka waze eswe “mevwa maliji [jenyi] ni kwakaula.” (Luka 6:46-48) Ha shimbu likwo, iye yamba ngwenyi: “Nyi nunanyingika yuma yino, munuwahilila nyi munuyilinga.”—Yoano 13:17.

 Shina unazange kunyingika kanawa Zambi ni Yesu? Kutala unazange kuwana yiyulo yalita ya chize mukaula yize unalilongesa? Tala yikuma yimwe yize muyihasa kukukwasa.

 Malongeso jetu a Mbimbiliya awana kakukwasa atu anji kulilongesa Mbimbiliya ni kukaula ku mwono wo yize analilongesa.

•   Yako ha chikuma Ukwaso wa Longeso lia Mbimbiliya hanga unyingike yuma yikwo hakutwala ku longeso liacho.

•   Tala chinema Tunakutambwisa ha Longeso lie Lia Mbimbiliya hanga unyingike chize mulinga longeso lia Mbimbiliya ni Yela ja Yehova.

 Yela ja Yehova kakukunguluka kaali ha poso mu yihela yize avuluka ngwo, Zuwo lia Wanangana. Ha kukunguluka chacho, twakulilongesaho Mbimbiliya ni chize mutukaula ku mwono wetu yize twakulilongesa.

 Ha kukunguluka chacho muhahasa kuya mutu mweswawo mazanga; kuwafupiwile kupwa Chela cha Yehova mba uyeko. Kulita ni uhashi uze uli nawo, muhasa kusakula kuya ku Zuwo lia Wanangana hanji kutala kukunguluka ha videoconferência.

•   Tala chinema, Yika Yakupwa mu Zuwo lia Wanangana? hanga unyingike yize yakulingiwa ha kukunguluka chetu.

•   Fupa chihela hakamwihi kuze mukungulukila ha chikuma, Kukunguluka cha Yela ja Yehova cha ha Chikungulwila.

 Yikuma ni yinema yinji yize yili ha site yino muyihasa kukukwasa kunyingika malongeso a Yesu ni ulemu wa kufwa chenyi.

 Chakutalilaho, mba unyingike chize kufwa cha mutu umuwika muchihasa kuyukisa atu anji, tanga yikuma “Kuchi Yesu Akulamwina?” ni “Mumu Liaka Yesu Amwene Lamba ni Kufwa?” hanji kutala chinema, Mumu Liaka Yesu Afwile?