KANYAMENU!
Mwaka 2023 Wasakalalisa Chinji Atu—Yika Mbimbiliya Yakulongesa?
Yuma yize yalingiwa ha mwaka 2023, yasolola pundu ngwo, tuli ha mashimbu waze Mbimbiliya yakuvuluka ngwo, “matangwa akusula.” (2 Timoteu 3:1) Tala chize yuma yize yinalingiwa kuze twatwama yinalite ni yize Mbimbiliya yaliangile kwamba ngwo, muyikalingiwa ha matangwa akusula.
Yuma yize yinalingiwa hashi heswe ni yize Mbimbiliya yakwamba
“Zungo lia jita ni sango ja jita.”—Mateu 24:6.
“Mbwanja ni vunda yinoko chinji hashi heswe.” a
Tala yikuma “Iya Makalamwina Atu Waze hi Maswalale ko?” ni “Ukwaso wa Hashi Heswe Uze Akuhana Kuli Maswalale Hiwahiana 2 Trilhões ya Mbongo ja Dolar.”
“Kumukukapwa minyiko ku yihela yeka ni yeka.” —Marku 13:8.
“Chize ku uputukilo wa mwaka 2023, hashi heswe halingiwa minyiko 13 ya tachi jinji kuhiana ha kwalula 7. Nyi mutwalula chize haze minyiko yaputukile minyiko yino yili yinji chinji kuhiana.” b
Tala chikuma “Umwe Munyiko Upi Walingiwa ku Turquia ni Síria.”
“Yuma yakwivwisa woma.”—Luka 21:11.
“Kusasaminya cha tungonde hashi heswe chahwa; haliapwila twaheta ha mashimbu akuwema.”—António Guterres, Secretário-Geral wa ONU. c
Tala chikuma “Ha Mwaka wa 2023 Hashi Heswe Hanasasaminya Chinji.”
“Kumukukapwa zala.”—Mateu 24:7.
“2023: Uli mwaka ukwo uze muupinjisa chinji atu waze anase tachi hanga awane yuma yakulisa nayo asoko jo.” d
“Mashimbu akalu chinji.”—2 Timoteu 3:1.
“Nyi twalula hakachi ka atu nake, umwe wa kuli ayo kali ni misongo yize yakupihisa manyonga.” e
Tala chikuma “Musongo wa Manyonga Kuli Akweze Unoko Chinji.”
Yika mutuhasa kushimbwila ha mwaka 2024?
Kukushi niumwe yoze mamba ni umwenemwene weswe yize muyilingiwa ha mwaka 2024. Alioze, yuma yize yinalingiwa hashi heswe yinasolola ngwo, Wanangana wa Zambi, unguvulu uze uli mu malilu, kwasala hakehe muusalakana manguvulu eswe a atu ni kuhwisa lamba lieswe lize o aneha hamwe ni kusakalala.—Daniele 2:44; Usolwelo 21:4.
Amu mashimbu jacho kanda achiheta, muze mutusakalala mutuhasa kufupa ukwaso wa Zambi. Mbimbiliya yinambe ngwo:
“Muze mungwivwa woma mungukufuliela yena.”—Samu 56:3.
Kuchi mutuhasa kusolola ngwetu, tunafuliela muli Zambi? Tunakwite hanga ulilongese chilakenyo cha mu Mbimbiliya chinambe ngwo, lamba lieswe mulikahwa. Muhasa kuchilinga ha longeso lietu lia Mbimbiliya liawana. Nyi wachilinga, mumona chize yilakenyo ya mu Mbimbiliya muyihasa kukukwasa hamwe ni asoko je.
a Foreign Affairs, “A World at War: What Is Behind the Global Explosion of Violent Conflict?” by Emma Beals and Peter Salisbury, October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.
Kota Muzanga Chinji Yuma Yize Mumona
ESSENTIAL BIBLE TEACHINGS
Wanangana wa Zambi Yika?
Muze Yesu akalakalile mulimo wenyi, te kakulongesa atu hakutwala ku Wanangana wa Zambi kuhiana chuma cheswacho. Ha miaka yinji, atu te kulemba hanga Wanangana wize.
LAULENU!
Chize Muhasa Kukumba Kusakalala
Hengwola yimwe yisoneko yize muyikukwasa kukumba hanji kutepulula kusakalala.
SANGO JA YETU
Eta Umwe Eze ni Kukumeneka
Kushimutwina chimwe chihula cha mu Mbimbiliya, kunyingika yuma yinji hakutwala kuli Yela ja Yehova.
