Chizavu cha Tusongo chili chimwe chizavu chikehe cha Akwa-Kristu ajama ku ufulielo waze akusongwela milimo ya Yela ja Yehova hashi heswe. Milimo yacho yinachingi yuma yaali:

•   Kakusongwela kululieka cha malongeso a mu Mbimbiliya waze akwiza mu mikanda yetu, kukunguluka ni mashikola ja Yela ja Yehova.—Luka 12:42.

•   Kakusongwela milimo ya Yela ja Yehova hashi heswe, yize yinachingi mulimo wa kwambujola ni chize mazachisa kanawa milambu.

 Mandumbu wa mu Chizavu cha Tusongo kakukaula chilweza chipema chize ahichikile “apostolo ni makulwana” mu Yerusaleme a ku sekulu yitangu, waze akwachile yiyulo yilemu ni kumanyinako chikungulwila cha Akwa-Kristu. (Yilinga 15:2) Chizechene ngwe malunga wano ashishika, mandumbu a mu Chizavu cha Tusongo hi miata ko a mu ululikiso wetu. Ayo kakufupa usongwelo wa mu Mbimbiliya ni kutayiza ngwo, Yehova Zambi katongwele Yesu Kristu ngwe mutwe wa chikungulwila.—1 A-Korindu 11:3; A-Efwesu 5:23.

 Mandumbu waze analingi chihanda mu Chizavu cha Tusongo kali wano: Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane ni Jeffrey Winder. Mandumbu wano kakukalakalila ku chishina chinene cha Yela ja Yehova ku Warwick, Nova York, mu Estados Unidos.

 Chizavu cha Tusongo chili ni makomite asambano waze akusongwela yikuma yimwe ya mulimo wetu, hita ndumbu wa mu Chizavu cha Tusongo kakupwa mu komite yimuwika hanji jinji.

•   Komite ya Coordenador: Yakusongwela yuma yize yinatale ha ulite wa Yela ja Yehova ni kukwasa muze kwakulingiwa luyinda, yihungumiona ni yuma yikwo yize yinatale hali Yela ja Yehova.

•   Komite ya Pessoal: Yakusongwela yuma yeswe yize yinatale hali asoko eswe a ku Mbetele.

•   Komite ya Editora: Yakusongwela mulimo wakufwambwisa ni kuhana mikanda, kutunga Mazuwo a Wanangana, mazuwo akulumbunwina mikanda, Mambetele ni yihela yikwo nawa.

•   Komite ya Serviço: Yakusongwela mulimo wa kwambujola “sango jipema ja Wanangana.”—Mateu 24:14.

•   Komite ya Ensino: Yakusongwela mulimo wa kululieka fumbu lia ku spiritu lize twakutambula ha kukunguluka, ku mashikola a wanangana, yinema ni maliji akugravala.

•   Komite ya Redação: Yakululieka kulia cha ku spiritu chize twakuwana ha mikanda, mu site yetu ni kusongwela mulimo wa kulumbununa mikanda.

 Kuchizako milimo yize akulinga mu ma komite wano, mandumbu a mu Chizavu cha Tusongo kakulikungulula ha poso jeswe hanga ahengwole yize yinafupiwa mu ululikiso wetu. Ha kukunguluka chacho, mandumbu wano kakukaula yize Mbimbiliya yakuhanjika ni usongwelo wa spiritu yisandu ya Zambi hanga akwate yiyulo yalita.—Yilinga 15:25.

 Mandumbu waze akukwasa mu ma komite a Chizavu cha Tusongo kashishika nawa a ujikijilo. (1 A-Korindu 4:2) Ayo kali ni utotombo nawa kanyingika kanawa mulimo uze akulinga mu komite yize akwasa hanga akalakale. Chikwo nawa, kakupwa ha kukunguluka cha ha poso chize hita komite yakulinga. Mandumbu wano, keshi kukwata yiyulo, alioze kakuhana manyonga jo ni kufupa sango jize mujikwasa makomite kukwata yiyulo yipema. Hanyima lia yino, ayo kakuhengwola amone chize yiyulo ya makomite jacho yinakwase mandumbu. Ayo mahasa kwatongola kuli Chizavu cha Tusongo hanga aye ni kumeneka mandumbu jetu mu yifuchi yimwe ni kuhanjika pande ha kukunguluka cha ha mwaka hanji ku shikola ya Ngiliate.