Unji wa Yela ja Yehova 35.000 waze te atwama mu Alemanha ni mu yifuchi muze apwile ni kuyula kuli A-Nazista kafwile, 1,500 kafwile ha mashimbu ja Holocausto. Kutwanyingikine chitela chize chaashihile. Alioze amu atu machinunga ni kuhengwola, unji wa waze afwile yikuma yikwo nawa muyihasa kusoloka.

•  Kuchi ayo afwile?

•  Mumu liaka aahungumionene?

•  Kulihi anakafwila?

•  Amwe waze ashihile

•   Kushiha: Unji wa Yela ja Yehova 400 kaashihile mu Alemanha ni muze yifuchi yikwo muze te akuyula kuli A-Nazista. Anji a kuli waze ashihile kaasopesele ni kwapatwila kufwa. Akwo kaalozele hanji kwasukika chakuhona kwasopesa.

•   Mwono ukalu mu mazuwo a ususu ni mu yilombo ya funge: Yela ja Yehova kuhiana 1,000 kafwilile mu yilombo ya funge ya A-Nazista ni mu mazuwo a ususu. Ayo kapwile ni kwashinjila hanga alinge milimo yize te yakwatwala ndo ku kufwa, hanji kufwa ha kwamwesa lamba, zala, chishika ni misongo hanji kuhona kwatwala kuli mandotolo. Mumu lia lamba lize apwile ni kwamwesa, amwe yafwa ha mashimbu akehe wika muze te haatusula kusongo lia Jita Yamuchiali ya Hashi Heswe.

•   Yitela yikwo: Yela ja Yehova amwe kaashihilile mu yihela muze akutulikila gás, kapwile ni kwazachisa hanga mandotolo eseke yitumbo yo mu mijimba yo hanji kwatuwa ndongo jize mujaashiha hakehe-hakehe.

 Yela ja Yehova te kakwahungumiona mumu lia kukaula yize Mbimbiliya yakulongesa. Muze nguvulu wa Nazista apwile ni kweta hanga alinge yize Mbimbiliya yakukanjisa, ayo te keshi kuyilinga. Ayo te kakwamba ngwo: “Twatamba kwononokena Zambi ngwe nguvulu wetu hi atu ko.” (Yilinga 5:29) Tala majila wano aali umone chize apwile ni kuchilinga.

1.   Mumu lia kuhona kulinjisa mu yuma ya mafwefwe. Ngwe chizechene akulinga Yela ja Yehova ha hashi heswe musono, waze atwamine mu unguvulu wa Nazista te keshi kulinjisa mu yuma ya mafwefwe. (Yoano 18:36) Kashika, ayo alitunyine

   •   Kulinga mulimo wa uswalale hanji mulimo weswawo unatale ha yuma ya jita.—Izaia 2:4; Mateu 26:52.

   •   Kusakula nguvulu hanji kunjila mu chimwe chizavu cha A-Nazista.—Yoano 17:16.

   •   Kumeneka suástica hanji kwamba ngwo, “Heil Hitler!”—Mateu 23:10; 1 A-Korindu 10:14.

2.   Mumu lia kununga ni kulinga milimo yo ya ku ufulielo. Chipwe ngwe kapwile ni kwakanjisa kulinga yuma ya ku ufulielo, nihindu Yela ja Yehova kanungine ni

   •   Kukunguluka hanga alembe ni kuwayila Zambi.—A-Hepreu 10:24, 25.

   •   Kwambujola sango jipema ni kutuhwisa mikanda.—Mateu 28:19, 20.

   •   Kuvwila keke enyembo jo kuchingako ni A-Yunda.—Marku 12:31.

   •   Kukakaminya ufulielo wo ni kulituna kusa chilayi ha mukanda chize muchisolola ngwo kalikala ufulielo wo.—Marku 12:30.

 Longeshi Robert Gerwarth wa ku shikola yinene, yamba ngwenyi: “Yela ja Yehova che chizavu chimuwika chize ahungumionene mumu lia ufulielo wo.” a Atu akwo waze no apwile mu yilombo ya funge, kakomokene chinji Yela ja Yehova mumu lia chiyulo cho chakununga ni kushishika. Umwe funge wa mu Áustria yamba ngwenyi: “Ayo keshi kuya mu jita. Nyi maeta hanga ashihe mutu, kuli ayo, muchilita ayo afwe ko.”

•  Yilombo ya funge: Yela ja Yehova anji kafwilile mu yilombo ya funge. Kaatwalile ngwe funge mu yilombo ya Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück ni Sachsenhausen. Mu Sachsenhausen wika mwafwile Yela ja Yehova 200.

•   Mazuwo a ususu: Yela ja Yehova amwe kaamwesene lamba ndo ku kufwa. Eka kafwile mumu lia upi uze te akwalinga muze anaasopesa.

•   Yihela ya kushihila atu: Yela ja Yehova kanji-kanji te kakwashihila mu mazuwo a ususu, mu Berlin-Plötzensee, Brandemburgo ni Halle/Saale. Chikwo nawa, kuhengola chasolwele yihela yikwo 70 kuze ashihilile Yela ja Yehova.

•  Jina: Helene Gotthold

   Ku chihela kuze amushihilile: Plötzensee (Berlin)

   Helene, yoze te hanambata nawa naye ya ana aali, kamusele mu zuwo lia ususu ha yisuho yinji. Ha mwaka 1937, kapwile kafumba muze amumwesene lamba ha shimbu lize te anamusopesa, chocho ufumba uze apwile nawo yiutuhuka. Ha 8 Dezembro, 1944 yamushihila mu guilhotina mu zuwo lia ususu lize liapwile mu Plötzensee, Berlim.

•  Jina: Gerhard Liebold

   Ku chihela kuze amushihilile: Brandenburg

   Ha 6 Maio, 1943, muze te ali mi miaka 20, Gerhard yamusa mu zuwo lia ususu. Yino yalingiwile ha kupalika cha miaka yaali wika muze ashihile tato mu lioliene zuwo lia ususu. Ha mukanda a kushika uze Gerhard asonekenene asoko ni kasendo kenyi, iye yamba ngwenyi: “Nyi ngwe kukushi ndundo ja Mwene kachi chahashile kunyongonona.”

•  Jina: Rudolf Auschner

   Ku chihela kuze amushihilile: Halle/Saale

   Rudolf kamushihile muze te ali wika ni miaka 17, ha 22 Setembro, 1944. Ha mukanda wa kushika naye, iye yasoneka ngwenyi: “Mandumbu anji kanyongonona, kashika ni yami mungunyongonona.”