•  Kuchi Yela ja Yehova akunyingika nyi katamba kulinga chimwe chiwanyino cha matangwa a kunanga nyi ka?

•  Shina kwehuka yiwanyino ya matangwa akunanga chakusolola ngwo Yela ja Yehova keshi kuzanga asoko jo?

•  Shina Yela ja Yehova kakushinjila akwo hanga no eche kulinga yiwanyino ya matangwa a kunanga?

 Muze kanda achikwata chiyulo cha kulinga hanji kuya ha chimwe chiwanyino cha matangwa a kunanga, Yela ja Yehova kakuhengwola shimbi ja mu Mbimbiliya jinatale ha chikuma chacho. Muze akumona ngwo, yiwanyino yimwe hanji matangwa akunanga kanalimiki ni shimbi ja mu Mbimbiliya, Yela ja Yehova keshi kulinga yiwanyino yacho. Hakutwala ku yiwanyino yimwe hanji matangwa a kunanga, Chela cha Yehova mweswe kakukwata chiyulo chenyi mwene ni kusa tachi ‘hanga apwe ni mbunge yitoma, kuyishi chitalingiso kumeso ja Zambi ni atu.’—Yilinga 24:16.

 Muze anambe kukwata chiyulo cha kuya ku chimwe chiwanyino hanji ka, Yela ja Yehova kakunyonga ha yihula yino. a

•   Shina chiwanyino chino chinalite ni malongeso a mu Mbimbiliya?

   Shimbi ya mu Mbimbiliya: “Tuhukenu mukachi ko, lihandununenu no, chocho anambe Mwene. Kanda nukwata ku chuma cha luchisa.”—2 A-Korindu 6:15-17.

   Mba alihandunune ni malongeso a luchisa waze akulimika ni Mbimbiliya, Yela ja Yehova kakwehuka kulinga yiwanyino ya matangwa a kunanga yili ni yuma yize mututongola mushi.

   Yiwanyino yize yinakatuka ha uwayilo wa mahuza. Yesu kambile ngwenyi: “Wayila Yehova Zambi ye, iye wika watamba kulingila.” (Mateu 4:10) Ha kukaula shimbi yino, Yela ja Yehova keshi kulinga yiwanyino ngwe, chiwanyino cha kusemuka cha Yesu (Natale), Chizomboka ni tangwa litangu lia Maio (1 de Maio), mumu yiwanyino yino kuyishi kuhalisa Yehova, alioze yakuhalisa tuzambi a mahuza. Ayo nawa keshi kulinga yiwanyino yize mututongola mushi.

  •  Chiwanyino cha Kwanzaa. Umwe mukanda wakwamba ngwo: “Jina kwanzaa linakatuka mu limi lia Suaíli matunda ya kwanza. Jina lino linalumbunuka ‘mihuko yitangu.’ Chino chinasolola ngwo, tangwa lino lia kunanga, linakatuka ha yiwanyino yitangu ya kucha mbuto yize anasoneka ha mukanda wa sango jikulu ja mu África.” Chipwe ngwe atu amwe kakumona chiwanyino cha Kwanzaa ngwe chili chiwanyino chize kuchishi kutala ha uwayilo wa tuzambi, alioze umwe mukanda, wakutesa chiwanyino cha Kwanzaa ni chiwanyino cha mu África chize atu akuhana mihuko yitangu kuli tuzambi hanga aasakwilile. Mukanda wacho unambe nawa ngwo: “Yitanga yize akusolola hanga asakwilile ha yiwape ya mwono yize atu akufuliela ngwo, yakukatuka kuli tulamba two, ye akusolola nawa ha chiwanyino cha Kwanzaa cha mu África.” (Encyclopedia of Black Studies).

  •  Mid-Autumn Festival (Chiwanyino cha Kakweji). Chino chili chiwanyino chize akulinga ha kakweji wa Setembro hanji Outubro. Kulita ni mukanda umwe, “chiwanyino chino chakulemesa zambi wa kakweji.” Ha chiwanyino chacho, mapwo kakuhetama kulutwe lia zambi yoze mu limi lia Chinês akuvuluka ngwo kowtow.”—Religiões do Mundo—Enciclopédia Abrangente de Crenças e Práticas.

  •  Noruz (Nowruz). “Chiwanyino chino chinakatuka mu uwayilo wa Zoroastrismo. Chikwo nawa, tangwa lia chiwanyino chino, liapwa lilemu chinji mu calendario ya Zoroastriano. Chipi-chipi, Spiritu ya Hakachi ka Tangwa, yize akuvuluka ngwo Rapithwin, akutayiza nawa ngwo kayitwalile ku tachi kushi lia mavu kuli Spiritu ya Lushiho ha tukweji a chishika, kakuyitambula cheka ni yiwanyino yize akulinga ha kachi ka tangwa—ha tangwa lia Nowruz.”—United Nations Educational, Scientific and Cultural Organization.

  •  Chiwanyino cha Shab-e Yalda. Kulita ni umwe mukanda, “chiwanyino chino cha solstício cha mashimbu a chishika, chinatale ha uwayilo wa Miltra” zambi wa pangu. Atu amwe kakutayiza ngwo, tangwa liacho linatale ha uwayilo wa tuzambi waze A-Roma ni A-Ngregu akuwayila. b

  •  Chiwanyino cha tangwa lia Ação de Graças. Chizechene ngwe chiwanyino cha Kwanzaa, chiwanyino chino chinakatuka ha yiwanyino ya kucha mbuto yize yapwile ni kulemesa tuzambi eka ni eka. Ha kupalika cha mashimbu, “chako chino cha ku shakulu yichilitanda hashi heswe mumu akwa-mayingeleja no kaputukile kuchilinga.”—Uma Grande e Divina Aventura—Os Peregrinos e a Lenda do Primeiro Dia de Ação de Graças.

   Yiwanyino yize yinakatuka ku yipanda-panda hanji munanyi. Mbimbiliya yakwamba ngwo, waze ‘akusa mesa ya kuzuka yuma kupalikila mu munanyi’ kali mukachi ka waze ‘hanehuka Yehova.’ (Izaia 65:11) Kashika, Yela ja Yehova keshi kulinga yiwanyino ngwe yino:

  •  Ivan Kupala. Umwe mukanda wakwamba ngwo: “Kulita ni yize atu anji akufuliela, ha tangwa lia [Ivan Kupala] yitangiwa yakutuhwisa ndundo jinji ja tufuta-futa jize mutu yoze uli ni hamu mahasa kutambula ndambu ya ndundo jacho.” (A a Z de Belarus) Ku uputukilo, chiwanyino chino te kakuchilinga kuli akwa-mavungu waze apwile ni kuwayila solstício de verão (tangwa lize likwete mashimbu anji ha mwaka). Alioze mukanda ukwo wakwamba ngwo: “Ha kupalika cha mashimbu, chiwanyino cha Invan Kupala yachichinga ni tangwa lia kunanga lia yingeleja, avuluka ngwo [Tangwa lisandu lia Yoano Chipapachisa].” (Enciclopédia da Cultura Russa Contemporânea).

  •  Mwaka waha wa Lunar (Mwaka waha wa akwa-China hanji akwa-Corea). Kulita ni mukanda umwe, “ha tangwa lia chiwanyino chino, chuma chilemu chinji chize asoko ni masepa akulihulikila, chili kulinga chuma cheswacho muchaanehena yuma yipema, kulemesa tuzambi ni maspiritu ni kushimbwila ngwo, mwaka waha muwanehena yuma yipema.” Mukanda ukwo wakwamba ngwo: “Mwaka Waha wa akwa-Corea unachingi uwayilo wa atu waze hanafu hanga maspiritu api achine kwalinga yuma yipi, ni kwanehena yuma yipema ha Mwaka Waha uze muwizaho, ni kutaha hanga anyingike yuma yipema yize ayo mapwa nayo ha mwaka uze muhataho.”—(Enciclopédia das Comemorações de Ano-Novo ao Redor do Mundo).

   Matangwa akunanga waze anakatuka ha malongeso akwamba ngwo alma kuyishi kufwa. Mbimbiliya yakusolola ngwo alma yakufwa. (Ezekiele 18:4) Kashika, Yela ja Yehova keshi kulinga yiwanyino yize yakuhalisa malongeso akwamba ngwo, alma kuyishi kufwa, ngwe yino:

  •  Tangwa lia afu. Kulita ni umwe mukanda, “lino lili tangwa lia kwiwuluka afu waze te ashishika.” (Nova Enciclopédia Católica) Mukanda unanungu nawa ngwo, “kukatuka ha mwaka 500 M.J., ndo 1500 M.J., atu anji te kakufuliela ngwo, ha tangwa lino, spiritu ya atu waze hanafu yakuhinduka cheka hanga yipinjise atu waze apwile ni kwalinga yuma yipi muze te achili ni mwono.

  •  Chiwanyino cha (Ch’ing Ming) ni cha Fantasmas Famintos. Umwe mukanda wakwamba ngwo, ha yiwanyino yino yaali, “kakwochaho yuma yakulia, yakunwa, ni mbongo hanga afu achine kwivwa zala, kwivwa pwila hanji kuhona mbongo.” (Celebrando os Costumes da Vida ao Redor do Mundo — De Chás de Bebê a Funerais.) Mukanda unawezela nawa ngwo, “ha mashimbu waze akulinga chiwanyino cha Fantasmas Famintos, chipi-chipi ha ufuku muze kakweji hapwa wa muwundu, [akwa-kunanga] kakufuliela ngwo kuli chimwe chuma chize chakukundamisa atu ni afu. Kashika kuli ayo, chili chilemu kulemesa afu ni kwehuka kulinga yuma yize muyivwisa tulamba two uli.”

  •  Chiwanyino cha Chuseok. Umwe mukanda wakwamba ngwo, “chiwanyino chino kakuchilinga hanga ahane kulia ni vinyu kuli alma ya waze hanafwu.” Yawana yino yakusolola ngwo “ayo kakufuliela ngwo alma yakunga ni mwono muze mutu akufwa.”

   Yiwanyino yize yinatale ha yuma ya tufuta-futa. Mbimbiliya yakwamba ngwo: “Kanda awana kuli yenu niumwe yoze masa mu kahia mwanenyi wa lunga hanji mwanenyi wa pwo, chipwe tahi, chipwe mukwa munanyi, chipwe mukwa kupanda, chipwe nganga, chipwe mukwa kujilika, chipwe mukwa mahamba, chipwe mukwa tufutafuta, chipwe mukwa kuhula afu. . . . mumu ha yitanga yino ya kuzelwokesa Yehova Zambi yenu kanahumu kumeso jenu akwa chifuchi.” (Shimbi Yamuchiali 18:10-12) Mba twehuke yuma ya yipanda-panda, kutwatambile kutaha ngombo ni kuya kuli atu waze akulilongesa tutongonoshi. Yela ja Yehova keshi kulinga chiwanyino cha Halloween ni yiwanyino yikwo ngwe:

  •  Mwaka waha wa akwa-Tamil ni Cingales. Umwe mukanda wakwamba ngwo: “Ha mashimbu a chiwanyino chino, atu kakulinga yuma yimwe ha amwe mashimbu waze akwalweza kuli akwa-kulilongesa tutongonoshi hanga azuke yuma yinji.”—Encyclopedia of Sri Lanka.

  •  Songkran (Mwaka waha wa akwa-Tailandia) Jina lia chiwanyino chino cha ku Ásia “liakukatuka ha liji sanscrita lize linalumbunuka ‘kulisunga’ hanji ‘kwalumuka.’ Chikwo nawa, chiwanyino chino kakuchilinga muze mwalwa wakupalika hakamwihi ni tutongonoshi mu zodiacal de Áries.”—Food, Feasts, and Faith—An Encyclopedia of Food Culture in World Religions.

   Yiwanyino yize yinakatuka ha Shimbi ya Mose, yize yahwile hanyima lia kufwa cha Yesu. Mbimbiliya yakwamba ngwo: “Kristu kasele songo ku Shimbi.” (A-Roma 10:4) Akwa-Kristu musono kakuyuka ni malongeso anakatuka ha Shimbi ya Mose kuli A-Izalele. Chipwe chocho, ayo keshi kulinga yiwanyino yize yakukatuka ha Shimbi yacho, chipi-chipi yiwanyino yize te yinatale ha kwiza cha Mesaya, mumu Akwa-Kristu kakufuliela ngwo, Mesaya wejile kulu. Mbimbiliya yakwamba nawa ngwo: “Yize yinapu yizulie ya yuma yize muyizaho; alioze umwenemwene wapwa wa Kristu.” (A-Kolosu 2:17) Mumu lia yino ni mumu lia yiwanyino yikwo yinachingi yuma yize yakulimika ni Mbimbiliya, Yela ja Yehova kakwehuka yiwanyino ngwe:

  •  Hanuká. Chiwanyino chino chinatale ha kwiwuluka tangwa lia kutumbikila tembele ya A-Yunda mu Yerusaleme. Chipwe chocho, Mbimbiliya yakwamba ngwo, Yesu kapwa Sasendote wa Lutwe ku “mbalaka yinene yahiana ni yingunu yahiana, kayitungile ni moko, te hi ya ku kutanga chino ko.” (A-Hepreu 9:11) Kuli Akwa-Kristu, tembele yino ya ku spiritu yasalakanyine tembele ya mu Yerusaleme.

  •  Rosh Hashaná (Mwaka waha wa A-Yunda). Lili tangwa litangu lia mwaka kuli A-Yunda. Ku shakulu, chiwanyino chino te chakuchinga kuhana yitapo yalipwila kuli Zambi. (Kwalula 29:1-6) Alioze, Yesu Kristu, mwe Mesaya ‘yasulisa yitapo ni milambu.’ Kashika musono, yitapo yino, kuyishi nawa ni ulemu kumeso ja Zambi.—Daniele 9:26, 27.

•   Shina chiwanyino chino chakuchinga mayingeleja eswe hamuwika?

   Shimbi ya Mbimbiliya: “Usepa uka uliko hakachi ka mukwa kufuliela ni yoze kafulielele? Kutayiza chika chiliko hakachi ka Tembele ya Zambi ni mahamba?”—2 A-Korindu 6:15-17.

   Yetu Yela ja Yehova, twakuzanga kutwama ni sambukila ni enyembo jetu ni kuvumbika yize mutu ni mutu akufuliela. Alioze, twakwehuka yiwanyino yize yakuchinga mayingeleja ngwe:

   Yiwanyino yize yakulemesa umwe ngana ya yingeleja hanji yize yakuchinga hamuwika mayingeleja alisa. Ku shakulu, muze Zambi atwalile A-Izalele ku chifuchi chize atu te akuwayila tuzambi akwo, iye yaalweza ngwenyi: “Kanda nukakolesa no usendo niumwe chipwe ni tuzambi two . . . Mumu nyi munulingila tuzambi two, chamwenemwene kumuchikapwa kambwila kuli yenu.” (Kutuhuka 23:32, 33) Kashika, Yela ja Yehova keshi kuya ha yiwanyino ngwe:

  •  Chiwanyino cha Loi Krathong. Ha mashimbu a chiwanyino chino cha ku Tailândia, “atu kakulinga kolokoto ya mafwo ni kusamo insensu ni kuyikonga helu lia meya. Atu kakufuliela ngwo kulinga chino, chakufunga mutu ku yuma yipi. Kwamba umwenemwene, atu waze akulinga chiwanyino chino, kakukaula mungano ja Buda.”—Enciclopédia do Budismo.

  •  Tangwa lia Kulikonyeka mu Chifuchi (Dia Nacional do Arrependimento). Kulita ni umwe tuminyi mu chifuchi cha Papua-Nova Guiné, atu waze akulinga chiwanyino chino “kakutayiza fundamentu ya ufulielo wa Akwa-Kristu.” Iye kambile nawa ngwenyi, tangwa liacho liakatukile ha yize Akwa-Kristu mu chifuchi cha akufuliela.”

  •  Chiwanyino cha Vesak. “Tangwa chino, lili lilemu chinji kuli akwa-Buda, mumu kakulinga chiwanyino cha kusemuka cha Buda ni utome wenyi ni kufwa chenyi ni tangwa lize iye ahetele ku utuswilo ha kufupa yuma ya ku spiritu.”—Dicionário de Feriados, Festivais e Celebrações do Mundo.

   Yiwanyino mayingeleja akulinga yize Mbimbiliya kuyishi kulongesa. Yesu kambile kuli mangana a A-Yunda ngwenyi: “Yenu nwakulelesa liji lia Zambi mumu lia mianda yenu. ” Iye yamba nawa ngwenyi, uwayilo wo uli wamokomoko mumu te “kakulongesa mianda ya atu ngwe shimbi ja Zambi.” (Mateu 15:6, 9) Mumu lia yize Yesu ambile, Yela ja Yehova keshi kuya ha yiwanyino ya mayingeleja ngwe:

  •  Chiwanyino cha Epifania (Timkat Tangwa lia Mianangana atatu hanji Tangwa lia Yimbanda Atatu). Mukanda umwe wakwamba ngwo: “Chiwanyino chino kakuchilinga mumu lia akwa-kuhengwola tutongonoshi waze amenekene Yesu muze asemukine ni ha tangwa lize amupapachishile. Chiwanyino chino “chapwishile yiwanyino ya mahuza ngwe ya Akwa-Kristu, yize yapwile ni kulemesa tuzambi a meya ni ngiji.” Chiwanyino chikwo chalifwa ni cha Timkat, “chinakatuka ha mianda ya atu.”—Enciclopédia da Sociedade e da Cultura do Mundo Antigo.

  •  Chiwanyino cha Festa da Assunção de Nossa Senhora. Chiwanyino chino kakuchilinga kuli atu waze akufuliela ngwo, naye ya Yesu kayile mu malilu ni mujimba wenyi wa musunya. “Akwa-Kristu atangu te kachinyingikine, chikwo nawa, Mbimbiliya kuyishi kuhanjika ha chiwanyino chino.”—Religião e Sociedade—Enciclopédia do Fundamentalismo.

  •  Chiwanyino cha Festa da Imaculada Conceição. “ Chiwanyino chino kakuchilinga kuli atu waze akufuliela ngwo, Maria naye ya Yesu kasemukine chakuhona shili, alioze longeso lino kulishi mu Mbimbiliya.”—Nova Enciclopédia Católica.

  •  Quaresma. Kulita ni umwe mukanda, mashimbu wano akulikonyeka ni kulitwamina kulia, kaputukile “mu sekulu yamuchiwana” ha kupalika cha 200 muze Mbimbiliya te yahwa kusoneka. Hakutwala ku tangwa litangu lia chiwanyino chino, mukanda wacho unambe nawa ngwo: “Ndako ya akwa-kufuliela waze akutambula uto ha tangwa Liamatatu lia Uto, te kakuyilinga mu yihela yinji chize ha Sínodo de Benevento, ha mwaka 1091.”

  •  Chiwanyino cha Meskel. Umwe mukanda wakuhanjika hakutwala ku chiwanyino chino chize chakatukile ku Etiopia, ngwo: “Chiwanyino chino Akwa-Etiopia kakuchilinga mumu “lia kuwana Kulusu Yamwenemwene (kulusu yize ahachilileho Yesu). Ha chiwanyino chino, atu kakuwika kahia ni kuhangana kusesa lia jiko liacho.” Alioze, Yela ja Yehova keshi kuzachisa kulusu mu uwayilo wo.

•   Shina tangwa lino lia kunanga liakuhalisa mutu, umwe ululikiso hanji chimwe chifuchi?

   Shimbi ya Mbimbiliya: “Yehova kanambe ngwenyi, Kashingiwa mutu yoze unafuliela mutu, kakutenga atu a musunya kwoko lienyi, mbunge yenyi yakuteuluka kuli Yehova.”—Jeremia 17:5.

   Chipwe ngwe Yela ja Yehova kakuvumbika atu, hamwe ni kwatongola mu yilemba yo, nihindu ayo keshi kuya mu yiwanyino yino:

   Chiwanyino cha tangwa lia kunanga lize lia kulemesa umwe nguvulu hanji umwe mutu mulemu. Mbimbiliya yakwamba ngwo: “Tewuluka kuli mutu yoze uli ni mwiku wenyi mu mazulu, mumu ulemu uka ali nawo?” (Izaia 2:22) Mumu lia chino, Yela ja Yehova keshi kuya ha yiwanyino ya tangwa lia kusemuka cha umwe mwanangana hanji mwazovu.

   Chiwanyino cha pandela ya chifuchi. Yela ja Yehova keshi kulinga chiwanyino cha Tangwa lia Pandela. Mumu liaka? Mbimbiliya yakwamba ngwo: “Lifungenu ku mahamba.” (1 Yoano 5:21) Atu amwe musono, keshi kumona pandela ngwe mahamba hanji chimwe chuma chize atu akuwayila. Alioze, umwe mukwa-kuhengwola sango ja shakulu kasonekene ngwenyi, hakutwala ku kuzanga chinji chifuchi, ‘pandela chili chimwe chilayi chize atu akuwayila mu chifuchi.’

   Tangwa lia kunanaga lize akuhalisa umwe mutu hanji chuma chisandu. Yika yinakalingiwa muze umwe lunga yoze te wakuvwila Zambi woma afulamine ku molu ja postolo Petulu? Mbimbiliya yakwamba ngwo: “Petulu yamukatwisa ngwenyi: “Katuka; ni yami nguli wika mutu.” (Yilinga 10:25, 26) Chizechene ngwe Petulu, ni apostolo akwo waze kakatayijile kwawayila chipwe kufulamana ku molu jo, Yela ja Yehova no keshi kuya ha yiwanyino yize yakuhalisa atu hanji yuma ngwe:

  •  Tangwa lia Asandu Eswe. “Chino chili chiwanyino chize chakuhalisa asandu eswe . . . Niumwe uli ni shindakenyo ya chize chiwanyino chino chaputukile wakuhi.”—Nova Enciclopédia Católica.

  •  Chiwanyino cha Nossa Senhora de Guadalupe. Kulita ni mukanda umwe, chiwanyino chino chakulemesa “Santa padroeira do México,” yoze atu anji akufuliela ngwo kali Maria naye ya Yesu. Atu anji kakufuliela nawa ngwo, iye kasolokele kuli umwe njimi ha mwaka 1531.—Enciclopédia Greenwood da Literatura Latina.

  •  Tangwa lia Jina (Dia Onomástico). Kulita ni mukanda umwe, “chiwanyino chino kakuchilinga hali umwe musandu yoze akulukisa umwe mwana ha tangwa lia upapachiso wenyi.” Mukanda unambe nawa ngwo: “Chiwanyino chino chili ni ulemu unji kuli akwa-mayingeleja.”

   Yiwanyino yize yakutala ha yuma ya mafwefwe. Mbimbiliya yakwamba ngwo: “Shinaho kuchinyina kuli Yehova, hi kufuliela mutu ko.” (Samu 118:8, 9) Mba achine kusolola ngwo kakufuliela muli atu, Yela ja Yehova keshi kuya ha yiwanyino ngwe ha Tangwa lia Mapwo ni Tangwa lia Akweze yize yinatale ha yuma ya mafwefwe. Mumu lia chino, ayo keshi kuya nawa ha chiwanyino cha lipanda. Shimbu ajikijile muli atu, Yela ja Yehova kakujikijila ngwo Wanangana wa Zambi we mukahwisa katonde ni lamba.—A-Roma 2:11; 8:21.

•   Shina tangwa lino lia kunanga liakusolola ngwo vungu limwe hanji chifuchi chimwe chili chilemu kuhiana yifuchi yikwo?

   Shimbi ya Mbimbiliya: “Zambi keshi katonde. Mumu ku mavungu eswe iye kakutayiza yoze wakumuvwila woma ni kulinga yuma yalita.”—Yilinga 10:34, 35.

   Chipwe ngwe Yela ja Yehova kakuzanga chifuchi chize asemukinyine, nihindu ayo keshi kuya ku yiwanyino yize yakuhalisa chifuchi, vungu limwe hanji munyachi ngwe yize yili mushi:

   Yiwanyino yize yakuhalisa maswalale mu chifuchi. Shimbu akolweze tumbaji twenyi kulinga jita, Yesu kaalwezele ngwenyi: “Nungenu ni kuzanga akwa-kole jenu, ni kulembela waze akunuhungumiona.” (Mateu 5:44) Mumu lia chino, Yela ja Yehova keshi kuya ha yiwanyino yize yakuhalisa maswalale ni yiwanyino yikwo ngwe:

  •  Tangwa lia Anzac. Kulita ni mukanda umwe, “liji Anzac linalumbunuka maswalale a mu Austrália ni Nova Zelândia.” Chikwo nawa, “hakupalika cha mashimbu, tangwa lia Anzac yilipwa tangwa lia kwiwuluka atu waze afwile ku jita.”—Dicionário Histórico da Austrália.

  •  Tangwa lia Tujita Akulu (Tangwa lia Kwiwuluka). Kulita ni mukanda umwe, yiwanyino yino, yakuhalisa “maswalale waze ashile jita mu chifuchi ha miaka yinji kunyima ni atu waze afwile ku jita mu chifuchi.”

   Chiwanyino cha utuswilo hanji lipanda. Yesu kambile kuli tumbaji twenyi ngwenyi: “O hi akwa hashi ko, chizechene ngwe yami hi nguli mukwa hashi ko.” (Yoano 17:16) Chipwe ngwe kakuzanga kunyingika sango ja chifuchi cho, Yela ja Yehova keshi kuya ha yiwanyino ngwe yino:

  •  Tangwa lia Austrália. Kulita ni mukanda umwe, chiwanyino chino chinatale ha limwe tangwa ha mwaka 1788 muze maswalale a mu Inglaterra azundwile pandela ni kutwa mutambi ngwo chifuchi cha Austrália chapwa chihanda cha chifuchi cho.

  •  Tangwa lia Guy Fawkes. Mukanda umwe unambe ngwo: “Lino lili tangwa lia kunanga cha chifuchi ni kwiwuluka chize Guy Fawkes ni akwa-Katolika akwo ahonene kushiha mwanangana Jaime I ni atu akwo mu Parlamento [Inglês] ha mwaka 1605.

  •  Tangwa lia lipanda. Mu yifuchi yinji, tangwa lino liapwa tangwa lize akwiwuluka mashimbu waze chifuchi chikwo chechele kusongwela chifuchi cho.

•  Shina ha tangwa lino lia kunanga, atu kakusolola yitanga yize kuyalitele ni Mbimbiliya?

   Shimbi ya Mbimbiliya: “Mumu kunahu hali yenu miaka yize yapalika kulinga upale wa akwa mavungu, ni kwenda mu ujila, ni usolo, ni kunwa vinyu, ni chimbangwinya, ni kunwanwa walwa, ni kukombelela cha kuzelwokesa.”—1 Petulu 4:3.

   Kulita ni shimbi yino, Yela ja Yehova kakwehuka yiwanyino yize yakukolweza kunwa chinji walwa ni yize yakusolola yitanga yipi yize yakuvwisa Yehova lwaji. Yela ja Yehova kakuzanga kupwa hamwe ni masepa jo, chikwo nawa, amwe mahasa kusakula kunwa ndambu ya walwa. Nihindu, ayo kakusa tachi hanga akaule shimbi yino ya Mbimbiliya: “Chipwe munulia, hanji mununwa, hanji cheswacho munulinga, lingenu yuma yeswe ha uhenya wa Zambi.”—1 A-Korindu 10:31.

   Kashika, Yela ja Yehova keshi kuya ha yiwanyino yize yakukolweza kulinga yuma yize Mbimbiliya yakukanjisa. Yino yinachingi chiwanyino cha Purim. Ku mashimbu a kunyima, Purim liapwile tangwa lia utuswilo wa A-Yunda ha sekulu yamuchitano K.M.J. Alioze, mukanda umwe unambe ngwo, musono chiwanyino cha Purim “muchihasa kupwa ngwe chiwanyino cha A-Yunda cha Mardi Gras hanji Carnaval.” Atu waze akuya ku chiwanyino chino, kanji-kanji kanachingi malunga kuzala mahina a mapwo, kunwa walwa unji ni kuneha zungo linji.

 Ewa. Mbimbiliya yakutulongesa ngwo atu katamba kuzanga ni kuvumbika asoko jo eswe chipwe ngwe uwayilo wo unalise. (1 Petulu 3:1, 2, 7) Muze umwe chela cha Yehova akwecha kupwa ha yiwanyino yimwe, amwe asoko jenyi mahasa kulivwa chipi. Kashika, Yela ja Yehova kakusa tachi hanga akwase asoko jo kupwa ni shindakenyo ngwo, kakwazanga chinji, ni kwalumbunwina mumu liaka o akwachile chiyulo cha kwehuka yiwanyino yimwe ni kwameneka ha mashimbu amwe.

 Ka. Ayo kakufuliela ngwo, mutu ni mutu katamba kukwata chiyulo chenyi mwene. (Yoshua 24:15) Yela ja Yehova “kakulemesa atu eswe” chipwe ngwe uwayilo wo unalise ni wa ayo.—1 Petulu 2:17.