Shina Yela ja Yehova kakwete Mbimbiliya yo?
Yela ja Yehova keshi kuzachisa wika Mbimbiliya yimuwika. Alioze twakuzanga chinji kuzachisa Tradução do Novo Mundo das Escrituras Sagradas, nyi yili mu limi lietu. Mumu Mbimbiliya yacho yakuzachisa jina lia Zambi, chikwo nawa yili yashi.
Kuzachisa jina lia Zambi. Mbimbiliya jimwe kujishi kulemesa Mwenyayo. Chakutalilaho. Mbimbiliya yimwe yakusolola majina 70 ja atu waze ayilumbunwine, alioze Mbimbiliya jacho yajimunamo jina lia Mwenyayo.—Yehova Zambi.
Kulisa ni Mbimbiliya yacho, Tradução do Novo Mundo yafunyisa jina lia Zambi ha yihela yeswe haze liapwile ni kusoloka mu yisoneko yikulu. Chikwo nawa, majina ja waze alumbunwine Mbimbiliya yacho keshi kusolokamo.
Ulumbunwiso walita. Hi Mbimbiliya jeswe ko jakulumbununa sango kulita ni chize Yehova atumine kujisoneka. Chakutalilaho, Mbimbiliya yimwe yinalumbununa mukanda wa Mateu 7:13 ngwo, “Njilenu ku chikolo chikehe: mumu chikolo chize chatwala ku chitende cha kahia, chinene.” Alioze yisoneko yikulu yakwamba ngwo, “kwonwona,” hi “chitende cha kahia” ko. Chinasoloka ngwe, atu waze alumbunwine Mbimbiliya yacho kaselemo liji “chitende cha kahia” mumu kapwile ni kutayiza ngwo atu api kakwazangamisa mu chitende cha kahia. Alioze longeso lino hi lia mu Mbimbiliya ko. Kashika, Tradução do Novo Mundo yakulumbununa versu yino ngwo, “Njilenu ku chikolo chikehe: mumu chikolo chize chatwala ku kwonwona, chinene.”
Yashi kutanga. Mbimbiliya yize yili yakulumbununa kanawa, kuyishi kupwa wika ni ulumbunwiso walita, alioze yapwa nawa yashi kutanga. Tala chimwe chilweza. Ha mukanda wa Mateu 5:3, Yesu kazachishile liji lize linalumbunuka ngwo, “Kawaha yiswale mu spiritu.” Alioze atu musono keshi kuhanjika chocho. Kashika, Tradução do Novo Mundo yinakalumbununa chisoneko chino ngwo: “Kawaha waze akunyingika ngwo: tuli yiswale mu mbunge.”
Kuchizako kuzachisa jina lia Zambi, ulumbunwiso walita ni kupwa yashi kutanga, Tradução do Novo Mundo yili ni chuma chikwo chilemu: Mbimbiliya kakuyihana chawana. Hamukunda wa chino, chipwe atu waze te keshi kuhasa kulanda Mbimbiliya, musono kalinayo mu malimi jo.
