Yetu kutushi kwehuka Yela ja Yehova akupapachisa waze akwecha kuya ku kukunguluka hanji kwecha kulitaka ni yetu. Kwamba umwenemwene, twakufupa atu jacho hanga twakwase kuzanga cheka yuma ya ku ufulielo.

 Yetu kutushi kuhuma mutu chamuhumina muze malinga shili yinene. Alioze, nyi ngwe Chela cha Yehova yoze hanamupapachisa mapwa ni chako cha kulinga yuma yize Mbimbiliya yakukanjisa chakuhona kulikonyeka, mutu wacho kakupwa kusosolola mu chikungulwila hanji ngwetu, twakwecha kulikata nenyi. Mbimbiliya yakwamba ngwo: “Chizenu yono chingulungulu hakachi kenu.”—1 A-Korindu 5:13.

 Mba nyi ngwe lunga yoze uli ni pwo ni ana Yela ja Yehova mamusosolola? Chipwe ngwe yuma ya ku ufulielo yize apwile ni kulinga hamuwika yakwalumuka, alioze yuma ya mu usoko yakununga chizechene. Usepa wa pwo ni mukwo-lunga hamuwika ni ana jo wakununga.

 Atu waze ali akusosolola mahasa kuya ku kukunguluka chetu. Chikwo nawa, nyi mazanga mahasa kutambula yiyulo ya ku ufulielo kuli makulwana a mu chikungulwila. Chino chakulingiwa hanga aakwase kufuna cheka kuli Yehova. Atu waze hapwa kusosolola, muze akwecha yitanga ya luchisa ni kusolola ngwo kalikonyeka ni mbunge yeswe ni kuzanga kukaula shimbi ja mu Mbimbiliya, twakwatambula cheka mu chikungulwila.