KŨUDRÃARÃ AWẼRARÃ OMEBA WIƊI PANUU
¿Biʼiawẽe ɓue mukĩra nii aɓau mukĩra ome maebʉrã wẽra nii aɓau wẽra ome kãi noɓooɗe wãɗayu?
“Mʉ wari kãriiɗe, mʉ baita chaarea ɓoosia mʉa junebena mukĩra warrarã busta basiiɗeeba. Mʉa kʉ̃risia nibaɗa jãu pasai basii, abiɗa mʉa jãu sentibarii” (David, 23 año).
David cristiano nii, maabea Dios ũri kʉ̃ria nii. ¿Nibaaka jãu kĩraka mauɗe aseyua Diosba wiɗi ɓuu? ¿Kãare kʉ̃risia ɓua Diosba mukĩra araɓau mukĩra ome kãibadau wẽra araɓau wẽra ome kãibadau?
¿Kãare jara ɓua Bibliaba?
Cristianorã kʉ̃risiaɗakaa junebena ẽbẽra kĩra. Chi Bibliaba jara ɓuu: “Setaa ijãabiabadau pũatuba jãba ãyaa adoeruu kĩra” (Efesios 4:14, Biblia Chamí, WPS.). Mukĩra, mukĩra baara kãiruu mauɗe wẽra, wẽra baara kãiruu nauɗebena kʉ̃risia panuu Bibliaba jara ɓuu kĩra.
Bibliaba jara ɓua nauɗebena, ochiaɗaika chi jara kuɓuu.
“Mukĩra baara kãi ɓoobayua araɓau wẽra ome kãiruu kĩra” (Levítico 18:22).
“Dachi Akõreba ida ɓusii ãchi sõɗe kachirua wau kʉ̃ria ɓuu wauɗamera. [...] Dachi Akõreba ida ɓusii mia pera wauɗamera. Wẽra mukĩra ome ɓuai ɓuu ida ɓuɗapeɗa araɓau wẽra ome paneesiɗau” (Romanos 1:24, 26, Biblia Chamí, WPS.).
“Ãyaa kʉ̃risiarã́ba. Waabenarã ãchi kakuaɗe kachirua ase nurea, santorãmaa wiɗibadaurã, chi kimawẽe nii kãibadau, mukĩra wẽraka nii, ara barikiau mukĩra ome kãibadau, chi orroabadau, chi aude bara kʉ̃ria nuree, itua do ãrĩã nuree, chi miadaa beɗea nuree, chi perabi orroabadau Dachi Akõre Kobiernoɗe duanaɗaabayua” (1 Corintios 6:9, 10).
Jomaurãba aseɗayua Diosba jara ɓuu kĩra. Bichi mukĩra nii aɓau mukĩra baara kãiyu bustabariibʉrã mauɗe wẽra nii araɓau wẽra baara kãiyu bustabariibʉrã, bichi biʼia kʉ̃risiayua jãka kachirua ɓuu ase nibaamaaba jãka Diosba bustakauɗeeba (Colosenses 3:5).
¿Kãare aseɗaiba?
¿Makarã iadai ɓubaaka mukĩra araɓau mukĩra ome kãibarii mauɗe wẽra araɓau wẽra ome kãibarii?
Makawẽma. Bibliaba jara ɓuu aɓa iadaa nibaabayu bari naka jara ɓuu: “Jomaurã ome jirukaraayuwãe nureásturu”, bariara jãarã kĩra niba siɗa Bibliaba jara ɓuu kĩra (Hebreos 12:14, Biblia Chamí, WPS.). Atua jarapeɗa maebʉrã iadaa nii jãka ase nureerã biꞌiwãe ɓua.
¿Kãare aseɗai ɓua chi gobiernoba mukĩra jãka nuree kima kãibiɗayu mauɗe wẽra jãka nuree kima kãibiɗayu?
Bari Diosba bustabarii kimabaraaɗayu mukĩra wẽra omeburu (Mateo 19:4-6). Bari cristianorãba jaraɗakaa kimabaraabirã́baɗa maebʉrã kimabaraabíbaɗa aɗakaa jãka aseyu politicaɗe nii kĩra ɓua, Bibliaba jara ɓuu poyaa politicaɗe nureaɗaabayu (Juan 18:36).
¿Dachi kãare aseɗaiba?
¿Mukĩra araɓau mukĩra ome kãibarii nii mauɗe wẽra araɓau wẽra ome kãibarii nii ida ɓui nibaaka?
Maka, ida ɓui ɓua. Bibliaba jara ɓuu chi nuree ẽbẽra jãka nureaɗa ida ɓupeɗaaɗa baɗa. Corintiosɗe Pabloba jaraɗa baɗa chi jãka ase nureerã chi Dachi Akõre Kobiernoɗe nureaɗaabayua, mauɗe nau siɗa jaraɗa: “Chi machirãɗebena chi nuree jãka nureaɗaa” (1 Corintios 6:11).
¿Chi naka ase nureaɗa ida ɓupeɗaaɗa baɗa ãchi waya kʉ̃risiaɗaabasaaka jãka aseɗayu? Makawẽma. Dachi Akõre Beɗeaba naka jara ɓuu: “Paru chiwiɗi jʉ̃ʉduu kĩra machi chiwiɗi paneesiɗau. Dachi Akõreba maka wausii. Mau awara machi biꞌia wau kãriɗau ichi kĩra nureaɗamera mauɗe ichi biꞌia unuɗamera” (Colosenses 3:10, Biblia Chamí, WPS.). Jãka nibayua, bikãa bikãa ɓui karibaɗe bayua.
¿Kãare asei ɓua mukĩra Dachi Akõre ũri kʉ̃ria nii waaburu kʉ̃risia niibʉrã araɓau mukĩra baara kãayu, mauɗe araɓau wẽra baara kãayu?
Ɓesɗe kʉ̃risiabadaa kachirua ɓee aseyu, aɓaaɓaa kʉ̃risiaɗayua ara jãka nibayu o maebʉrã jãka nibaabayu. ¿Kãare aseɗaiba? Chi Bibliaba naka jara ɓuu: “Dachi Akõre Jauriɗeeba nibásturu. Makaaruubʉrã machi kakuaba kachirua wau kʉ̃ria ɓuu wauɗaabai” (Gálatas 5:16, Biblia Chamí, WPS.).
Bibliaba jara ɓuuwẽma kʉ̃risiabayu kachirua ɓee ase nibaabai. Chi jara ɓuu bereka Biblia kawabudaubʉrã, kapichia wiɗii niibʉrã, aguantaɗayua mauɗe aseɗaabayu chi dachia kʉ̃risia nibaɗa.
David, naeɗe beɗeapeɗaaɗa baɗa, chi akõrerãmaa jaraɗakare ichi pasa ɓooɗa baɗa aude biʼia senti ɓoosii. Ichia jara ɓuu: “Ãchi ome beɗeaɗakare biʼia ɓeesia, mʉ ãrĩã kĩrajʉʉ nibai ɓoosii naeɗe ãchi ome beɗeaɗa basirã”.
Kĩrajʉʉ ãrĩã nuree chi ase nureeba Jeowaba kʉ̃ria ɓuu kĩra. “Chi Jeowaba jara ɓuu dachia aseɗai jipa ɓua, dachi corazón kĩrajʉʉbiyua”, jãka ase niɗaubʉrã chi biʼia ãrĩã ɓee adauɗayua (Salmo 19:8, 11).
