KŨUDRÃARÃ AWẼRARÃ OMEBA WIƊI PANUU
¿Waabenarãba mʉ ʉ̃rʉbena kãare kʉ̃risiabadaa mʉ paru unubudauba?
¿Sakãera biʼia ɓua kʉ̃risiaɗayu kãare paru jʉ̃budau? Chi ẽbẽrarãba biʼia kʉ̃risiaɗai ɓuu maebʉrã kachirua kʉ̃risiaɗai ɓuu dachi paru jʉ̃badauɗeeba. ¿Ẽbẽrarãba saka kʉ̃risiabadaa bʉchi paru?
Chi õbea ayãa kʉ̃risia duanuu paru jʉ̃buruuɗe mauɗe saka mau aseebaiba
Ayãa kʉ̃risia panuu # 1: Ida ɓuyu televisión maebʉrã internet omeeba jara ɓuu kãare paru jʉ̃ɗayu.
“Besɗe ãrĩã unubi kopaneebudauɗe, dachia busta koɓeebaria [...]. Imagen ara aɓau jʉ̃ unubi kopaneebudauɗe, dachi siɗa jãarã kĩra jʉ̃ kʉ̃riabaria”. Aɓa awẽra nii Theresa abadauba jara ɓuu.
Chi jãka unubi kopaneebudauɗe chi paruɗebena, jãu wẽrarã baitaburuwẽema. Chi libroba Una guía completa para criar chicos adolescentes (The Everything Guide to Raising Adolescent Boys) naka a ɓuu: “Chi kũudrãa chekerã siɗa ara jãka jʉ̃ɗa kʉ̃ria nurea [...]. Chuburi nureeɗeeɗa televisionɗe, internetɗe unubibadau paru ãrĩã́turu nedo kʉ̃riabii baita”.
Aude biʼia kʉ̃risiai baita: Chi Bibliaba naka a ɓuu: “Chi kawayuwẽe nii joma ijãabarii chi jarabudaurã maamina aɓa biʼia kuitaa niibʉrã biʼia ãrĩã kʉ̃risiabarii ichi asei naeɗe” (Proverbios 14:15). Dachia televisión maebʉrã internetɗe unubudauɗe, kãareɗe kʉ̃risiabiɗai ɓua. Bichia unuuruuɗe paru dachi kakua ãrĩã unubi ɓuu kʉ̃risiaba nauɗe:
“¿Mau jãka jʉ̃ʉ̃ruubʉrã kai baita biʼia ɓua?”
“¿Ẽbẽraba kãare kʉ̃risiaɗaiba mʉʉɗebena chi mʉ paru jʉ̃ nii ɓuuɗeeba?”
“¿Unubi ɓuẽ biʼia mʉ paru kãareɗe ijãa ɓuu maebʉrã kãareɗe kʉ̃risia ɓuu?”
Consejo. Semana aɓauɗe kawa ochiaba chi paru unubi panuu televisionɗe mauɗe internetɗe biɗa, ¿kãare ase kʉ̃ria panaa mʉa nedoyua? ¿Ãchia asebi kʉ̃ria panuu ãchia jara panuu kĩra? “Ãchia paru mipitaa jʉ̃bi kʉ̃riaɗapeɗa kakua mipitaa unii bayu. Ũriyu ãchia jara nureeɗe, chaarea ɓua dachi baita, awẽra kũudrãa nii aɓauba, Karen abadau naka jara ɓuu. Chi ẽbẽrarã televisionɗe trajabadaurãba kuitaa panuu paru ãrĩã unubibadaubʉrã kũudrãarãmaa ãrĩã bustaɗai ɓua”.
Ayãa kʉ̃risia panuu # 2: Jʉrʉɗayu chi paru chi junebenarãba jʉ̃ bara ɓuuɗebena, ara aɓau ãchi kĩra jʉ̃ɗayua.
Chi kũudrãa aɓauba, chi trʉ̃ Manuel jara ɓuu: “Chi paru junebenaba jʉ̃ duanuu kĩra jʉ̃wẽebʉrã, junebenaba atua jarabadau” naka a ɓuu. Chi awẽraba trʉ̃ Anna, naka jara ɓuu: “Aɓaburu biʼia ɓuuwẽema ara aɓau jʉ̃yu waabenarã kĩra, bari bʉchi amikorã bʉchi baaraburu panaɗa kʉ̃riayua”.
Aude biʼia kʉ̃risiai baita: Chi Bibliaba jara ɓuu: “Nau iujãaɗebenarãba waubadau kĩra nibarã́sturu” (Romanos 12:2, Biblia Chamí, WPS.). Nau versiculoɗe jara ɓuu kĩra, bʉchi paru biʼia ochiaba, maabae bichi mistu aɓa kʉ̃risiaba:
¿Kãareɗe kʉ̃risiabaraa mʉ paru jʉrʉʉruuɗe?
¿Mʉa bustabarii jʉ̃yu paru bia ɓéturu?
¿Mʉa jʉ̃barii junebenarãba mʉ ochiaɗai baita maebʉrã mʉa kʉ̃riayua?
Consejo. Jʉ̃ba chi paru bʉchia bustarúturu, jãka aseeruubʉrã bʉchi nomaawẽe bayua junebenaba bʉchi paru bustaɗawẽeba.
Ayãa kʉ̃risia panuu # 3: Paru pĩsua ɓeeruutu biʼia ɓeebaria.
“Mʉa jaraibʉrã paru ʉtʉ ɓoapeɗa pĩsua ɓúturu jʉ̃i bustabaria” naka a ɓuu awẽra kũudrãa niiba, Jennifer abadau.
Aude biʼia kʉ̃risiai baita: Bibliaba naka jara ɓuu: “Ãchi kakuaɗe ne joma jʉ̃ɗawẽa [...] bari chi ichi corazonɗe mipitaa iru kiɗíturu” (1 Pedro 3:3, 4). Nama jara ɓuu kĩra, kʉ̃risiaba sãu biʼia ɓuu: junebenaba ochiaɗai baita chi paru jʉ̃ nii maebʉrã ẽbẽra biʼia níturu.
Consejo. Chi biʼia ɓuu ãrĩãrã jʉ̃wẽebayu. Ẽbẽrarãba iɗibena jãka aseɗawẽmina, nauɗe kʉ̃risiaba:
Ẽbẽra aɓauba ara ichiɗebenáturu beɗea ɓuubʉrã, nau ase niiɗe junebenarã ichi ome meraa kʉ̃riaɗakau.
Kʉ̃ria panuubʉrã dachi ũriɗapeɗa ochiaɗaituru, junebenaba kʉ̃riaɗaabayua
Dachi paru jʉ̃budauɗe chi ochiabiyuaburu, makarã junebenamaa kʉ̃risiabiɗayu chi ara du aɓa biʼia sentiɗawẽe, makawẽebʉrã dachia kʉ̃risiabiɗayua juakaya ãrĩã nuree. Dachia jʉ̃budauɗe dachi ochiabiɗai baitaburu, makarã junebenarã dachi ʉ̃rʉbena kachirua kʉ̃risiaɗai ɓua.
Chi awẽra niiba Mónica abadau naka jara ɓuu: “Paru biʼia jʉ̃ɗayu mauba jarawẽa chõodraa kĩra jʉ̃yu; mauba jara kʉ̃ria ɓuu respetaɗayu ara bʉchi du aɓa mauɗe junebena biɗa”.
Nau siɗa bustai ɓua buchia
¿KÃARE KɄ̃RISIABADAA WAARÃ KŨUDRÃARÃ AWẼRARÃBA?
¿Kãare kʉ̃risiabadaa waarã kũudrãarã awẽrarãba? Saka unu nia dachi kakua
¿Sakayua chaarea ɓoi ɓua chi kũudrãarã biʹia kʉ̃risiaɗayu saka ochiaɗai ɓuu ãchi kakua? ¿Kãareba aiɗai ɓua?
