Estados Unidosɗe kũudrãarã aribiaurãmaa wiɗipeɗaaɗa basii biʼia ɓuu ʉtaa wiɗiɗayu Dachi Akõremaa, maamina ara ɓaʼãraburu jarasiɗau ewariiruucha asebadau. Mauɗeeba chi nuree ẽbẽrarãba wiɗibadau: “¿Ʉtaa wiɗiiruu jãu dachi bari biʼia akʉ ɓooyue?”.

•  ¿Kãareba ʉtaa wiɗiiruu?

•  ¿Wãraka Dachi Akõreba mʉ beɗea ũri ɓuu?

•  ¿Kãare ʉ̃rʉbena mʉa ʉtaa wiɗii ɓua?

•  Kãare kʉ̃risiabadaa waarã kũudrãarã awẽrarãba

 Ʉtaa wiɗiburuu Jeowa ome beɗearuu ɓuu, ichi joma barau Aseɗaɗeeba. Nauɗe kʉ̃risiachãu: ichi ẽbẽrarã aude mechia ãrĩa nii bẽrã, “dachirã aɓaaɓarã jʉ̃kaabena kaitawẽe ɓuuwẽe” (Hechos 17:27). Mauɗeeba, Bibliaba naka a ɓua: “Machi ichi ome merásturu, maabea ichi machi ome meraayua” (Santiago 4:8).

 ¿Kãare asei ɓua bichia Dachi Akõre jʉ̃kaa aude meraayua?

•   Ʉtaa wiɗii. Jãkaburu ichi ome beɗeabaria.

•   Biblia leai. Jãkaburu ichi bichi ome “beɗea” nia.

 Jeowa ome beɗeai mauɗe ʉtaa wiɗipeɗa, Biblia leayu jãkaburu aude amiko bai Dachi Akõre ome.

 “Jeowa ome beɗearuuɗe, chi Jomaurã ʉ̃rʉ ɓuu ome, jãdu chi aude kĩrawãrea ãrĩã ɓuu ase panua dachi ẽbẽrarãba” (Jeremy).

 “Jeowamaa mʉa senti kuɓuu jaraaruuɗe ichi jʉ̃kaa ãrĩãdu kaita ɓuu sentibi ɓua” (Miranda).

 Bariara bichia Dachi Akõreɗe ijãa ɓumina maebʉrã ʉtaa wiɗi ɓumina bichi baita chaarea ɓuu ichi bichi beɗea ũriyua. Maamina, Bibliaba jara ɓuu Jeowa “chi ʉtaa wiɗibudau Ũribarii” (Salmo 65:2). Bibliaba jara ɓuu bichia joma jarai ɓuu bichi baita preokupa ɓuu. ¿Sakayua? Dachi Akõre, bichi kakua ãrĩã ochia ua keraabariiɗeeba (1 Pedro 5:7).

 Nauɗe kʉ̃risiachãu: ¿Bichi amikorã ome beɗeabarika? Ara jãka Dachi Akõre ome asei ɓua. Ãrĩã beɗeáse ichi ome mauɗe ichi trʉ̃ Jeowa, jarás siɗa (Salmo 86:5-7; 88:9). Bibliaba jara ɓuu dachia ʉtaa ãrĩãdu wiɗiɗayu (1 Tesalonicenses 5:17).

 “Ʉtaa wiɗiiruu jãra mʉ Akõre mʉ ome beɗea ɓuu waa, ãrĩã mʉa joma sõɗe uru ɓuu jara ɓua” (Moises).

 “Mʉa Jeowamaa jara ɓuu ãrĩã ɓuu ɓee, kĩrabara mʉ dana mʉ amikorãmaa jara ɓuu kĩra” (Karen).

 Bibliaba jara ɓuu: “Dachia joma ichimaa jaraɗai ɓua, ara kiruma aɗapeɗa chi dachia nesitabadau” (Filipenses 4:6).

 Jãuba jara kʉ̃ria ɓuu dachi problemaɗebena siɗa jaraɗai ɓuu. Ara chi Bibliaba jara ɓuu jãu aseɗayu. “Bichi ekarrare chikʉa aɓa ɓuu Jeowamaa deaba, mauɗe ichia ũkuru aiɗayua” (Salmo 55:22).

 Maamina, bichi problemarãdu jaraabai ɓua. Wẽrakau Chantelle abadauba naka a ɓua: “Mʉa Jeowamaa mʉ aiɗai baitaburu wiɗiibʉrã mʉ ichi ome amiko ariɗe nibaabayua”. Jãu siɗa a ɓuu: “Naa dachia ara kiruma a jarabaraaɗai, maubapeɗa dachia ãrĩãdu baraa duanuu Jeowamaa ara kiruma aɗai baita”.

 Nauɗe kʉ̃risiachãu: ¿Kãare kakua biɗa ara kiruma aɗai ɓua? Kawa kʉ̃risiás kãare kakua õbeaɗebena iɗi bichia ara kiruma ai ɓua Jeowamaa.

 “Nepono mipitaa tono kuɓuu unuuruuɗe biɗa bichia jãuba ara kiruma ai ɓua ʉtaa wiɗiiruuɗe” (Anita).

 “Kʉ̃risiás versículo bichia ãrĩã bustabariiɗe maebʉrã chi aɓa Jeowaba aseɗa baɗa bichia ãrĩãdu busta ochia ɓeeɗa baɗa mau kakua ara kiruma ai ɓuu” (Brian).