Maera. Dachi Akõre ãrĩã preokupaɓoabaria ichi kʉ̃riakirureerã ẽperma duanuuɗe. Nauɗebena, Bibliaba naka aɓua: “Jeowaba ũkuru choroabiyua kamaɗe ẽpermo kiruree” (Salmo 41:3). Bichi ẽperma ɓeesiibʉrã naarã õbea kosarã asei ɓua:

1.   Dachi Akõremaa puersa wiɗii choroai baita. “Akõreba bi’ia ãrĩã akuduanuyua jari ẽbẽra jomaurã nau iujãaɗebenarãba kawaɗawẽa duanuu” jãkara Dachi Akõre preokupaɗawẽa duanaɗayua puersa nesitapanuu deayua dachi waaburu tuaduanaɗai baita (Filipenses 4:6, 7).

2.   Dachirã kĩrajʉʉ duanaɗai. Bibliaba jaraɓua: “Chi korason kĩrajʉʉ ɓuubʉrã maarã ʉrmidia kĩra ɓuu, maamina chi nomaa akuɓuu kĩrabara ẽperma ɓuukaɓuu” (Proverbios 17:22). Ẽbẽra ẽpermo ɓuu kĩrajʉʉ niibʉrã jãuba dachi kakua aude bi’iabiɓua.

3.   Waaburu kʉ̃risiaɗai kosa biarã neebudauɗebena. Dachirãba chi kosa biarã barau urubudauɗe kʉ̃risianureebʉrã, makãrã dachirãra kĩrajʉʉ duanaɗayua bariara ẽperma duanuumina (Romanos 12:12). Bibliaba jaraɓuu ẽbẽra aɓa biɗa wã’ãe bai ichia: “Mʉ ẽpermo ɓuu” ai baita (Isaías 33:24). Dachi Akõreba akabayua ẽpermeda baraurã chi sientipikorãba poyaa akabaabaɗa. Maubapeɗa, bikãa chi ẽbẽrarã chõra kirureaɗa kũudrãa bawãuriɗayua. Bibliaba naka aɓua: “Ẽbẽra waya kũudrãa bayua; mambea ichi waya chi puersa baraɓoika kũudrãa nibasiiɗebenaka” (Job 33:25).

 Chi dore ɓʉkuɓuu: Dachirã Jeowa ɗebena jaranũrẽba kuitaaduanuu Dachi Akõreba dachi ãrĩã aiɗaɓuu, maamina dachi ẽpermabudauɗe dotormaa wãbadaa (Marcos 2:17). Maamina daiba aɓabenamaa nau ases, o nau ʉrmidia dos aɗakaa, maarã ãchi aɓa aɓaaurãba kʉ̃risiaɗayua kãare aseɗai jãu ome.