Bibliaba tatuaje ʉ̃rʉbena ɓes aɓaburu jara ɓuu Levítico 19:28ɗe, naka jara ɓuu: “Machi kakuamaa tatuaje waubirã́baɗa”. Dachi Akõreba israelitarãmaa maka jaraɗa baɗa, ichia kʉ̃riaabasia ãchi junebena puuruɗebenarãchaa duanaɗayu, ãchia diosrãɗebena chi trʉ̃rã mauɗe diujochaa ɓʉkabachiɗau ãchi kakuamaa (Deuteronomio 14:2). Iɗibea cristianorãba ara jari Dachi Akõreba israelitarãmaa jaraɗa baɗa kĩra aseɗakau siɗa, kauwa kʉ̃risiabaraaɗai chi Dachi Akõreba kʉ̃risia ɓuu kĩraka mau ʉ̃rʉbena.

¿Biʼia ɓubaaka cristiano niiba ichi kakuamaa tatuaje waubiayu?

 Ochiaɗaika chi ɓee Bibliaɗebena textorã mauba dachimaa kawabi ɓuu:

•   “Chi wẽrarã siɗa paru ariɗe keɗéturu jʉ̃ɗayua, biʼia jʉ̃ɗapeɗa kʉ̃ris bia iɗaa” (1 Timoteo 2:9). Mukĩrarã biɗa ara jãu kĩra aseɗayua. Cristiano niiba waabenarãmaa ichi kakua ochiabi kʉ̃riawẽe waabenarã kachirua sentibiimaaba.

•   Chi nureeba ãchi kakuamaa tatuaje waubibadau waabenarãmaa unubiayua ãchi kʉ̃risia panuuɗebena, ãchi saka nureeɗebena mauɗe waabenarãmaa jaraɗayua chi kakua ãchi diujo ɓee, mauɗeeburu ãchi kakuamaa barikia waubiɗai ɓuu. Maka ɓumina, chi Bibliaba cristianorãmaa naka jara ɓua: “Machi kakua deaɗayua kĩrabara rekalo chokae ɓuu kĩra, jayoaswãe ɓoi mauɗe Dachi Akõremaa bustayua; jãkaburu Dachi Akõre baita trajaɗai bari chi biʼia ɓuudu kʉ̃risiaɗai” (Romanos 12:1). Ẽbẽra niiba ichi kakuamaa tatuaje waubi kʉ̃riaburuubʉrã, chi Bibliaba jara ɓuuchaa naaburu kauwa kʉ̃risiabarai. ¿Sakayua maka ase kʉ̃ria ɓuuɗebena? Ichia maka waubi kʉ̃ria kuɓuu waabenarãba ara maka ase duanuuɗeeburu. Mamaria kʉ̃risia aka ɓeeyua, “¿kãare aseiba kakuamaa tatuaje waubiɗa baɗa jãmabera ira ɓoo kʉ̃riawẽburuubʉrã?”. Naaburu kʉ̃risia aka ɓeeruubʉrã chi biʼia ɓuudu aseyua (Proverbios 4:7).

•   “Chi trajabarii naeɗe biʼia kʉ̃risiaburuubʉrã jãturua biʼia nibayua; maumaarã, chi biʼia kʉ̃risiaka ɓuu nii akawa wãʼãe nibaɗe wãyua” (Proverbios 21:5). Ẽbẽrarã ãrĩãrãba ãchi kakuamaa tatuaje waubibadau biʼia kʉ̃risiawẽeɗeeba. Maka asesiirã naka kʉ̃risiai ɓua: “¿Mʉa sakayua jãka waubisma? ¡Mʉa jãka waubiibaɗa!” Chi deɗabenarã maebʉrã trajoɗebenarã biɗa ãyaa kʉ̃risiaɗai ɓuu tatuaje aseɗa baɗa kakua. Tatuaje borrabii baita ãrĩã puʼuabaria mauɗe chi nejarra ãrĩã wiɗibadau, mauɗe ẽbẽrarã ãrĩãrã tatuaje kakuamaa waubipeɗaaɗa baɗaba “mʉa jãka waubiibaɗa” a duanua. Mauɗéburu iɗibea ãrĩãrã traja nurea tatuaje waupeɗaaɗa baɗa borrataɗayua.