Israelitarã naeɗebenarãmaa, Dachi Akõreba jaraɗa baɗa chi diezmo deaɗayuɗebena a maebʉrã chi décima parte ãchia ganabadauɗebena jomau añoɗe chi trajo asebadau Jeowaɗebena aiɗaɗayua. Ichia jaraɗaa: “Deabaraaɗai chi décima parte [maebʉrã “diezmo”, Nueva Reina-Valera] chi joma netaa chaubarii druaɗe año neeruucha” (Deuteronomio 14:22).

 Chi diezmo deaburuu jãu Ley mosaica abadauba mandaɗaɗeeburu, nau basia chi leyrã Dachi Akõreba deaɗa baɗa chi puuru Israelɗebenarãmaa. Chi cristianorãmaa nau Ley deaɗaabasiiɗeeba chi diezmo deaɗakau (Colosenses 2:13, 14). Mauɗéburu, chi cristiano aɓa aɓauba dea nii “ichi corazonɗeeba deai ɓuubʉrã obligaɗaabapeɗa mauɗe dea kʉ̃riamaa biɗa deabayua, Dachi Akõreba kʉ̃ria nii bẽrã chi kĩrajʉʉ ãrĩã dea niidu” (2 Corintios 9:7).

•  Chi Diezmo Bibliaɗe: Antiguo Testamentoɗe

•  Chi Diezmo Bibliaɗe: Nuevo Testamentoɗe

 Chi Antiguo Testamentoɗe jara ɓuu diezmoɗebena. Chi diezmo ʉ̃rʉbena jara ɓuuɗe mau Israelba adauɗakare chi leyrã (chi Ley mosaica), maka ɓumina chi Bibliaba jara ɓuu ome ɓes chi diezmoɗebena jãu naeɗebena.

Chi Ley mosaica naeɗe

 Chi naa deasii diezmo Abrán basii (Abrahán) (Génesis 14:18-20; Hebreos 7:4). Jãu diezmo regalo kĩraka ɓooɗa, Abranba deaɗa baɗa rey mauɗe sacerdote Salemɗebenamaa. Chi Bibliaba nebʉrʉwẽe ɓuu Abrahán chi warrarã omeeba maucha deasiɗau chi diezmoɗebena.

 Chi omeɗebena mukĩraba deasii chi diezmo Jacob basii, Abrahán ãi cheke. Jacobba Dachi Akõremaa jarasii, ichia bendeciburuubʉrã deai basii “chi décima parte” joma ichia adauburuu (Génesis 28:20-22). Chi nuree Biblia kawa panuuba jarabadau, chi diezmo Jacobba deasii mau ãnimara beaɗayuɗebena. Mau ichia chi diezmo deayu bẽrã ichi deɗabenarãmaa obligaabasii ara jãka deai baita.

Chi Ley mosaicaba jara ɓuuɗeebara

 Chi israelitarãba, diezmo deabarachesiɗaa mau ira duanaɗayua chi trajo asebudau Jeowa baitabena.

•   Chi diezmoba chi Dachi Akõre baita traja duanuurã kobiai basii, Jeowa baitaburu trajaɗaidu duanasii bẽrã mauɗe ãchi iujãa wãʼãe nureasii bẽrã uuɗai baita. Ara jãka nureasii chi levitarã, chi sacerdoterã siɗa (Números 18:20, 21). Chi puuruba diezmo deasiɗau chi levitarã sacerdote nureewẽemaa, maabea ãchia deabachidau chi décima parte diezmoɗebena chi sacerdoterã nureerãmaa (Números 18:26-29).

•   Mauɗe chi ome diezmo deaɗai ɓoosii añocha, mau chi levitarã baita mauɗe chi levitarã nureerãwẽe baita biɗa (Deuteronomio 14:22, 23). Chi deɗabena Israelɗebenarã jãu diezmoba ãchi fiesta asebachiɗau. Mauɗe chi ɓee añorãɗe jãu diezmoba ẽbẽra chi nejarraswẽe kirureerãɗeeɗa aiɗabachiɗau (Deuteronomio 14:28, 29; 26:12).

 ¿Saka kawa nureasaa sãabe diezmo deaɗai ɓoosii? Añocha, chi israelitarãba awara kuɓubachiɗau chi diezmo deaɗayuɗebena chi junaɗa baɗa chi iujãaɗe uuɗa baɗa (Levítico 27:30). Chi ãchirãba deaɗai basiibʉrã chi nejarraɗe makarã 20% mauchaburu deaɗai basii jãu baita (Levítico 27:31). Mauɗe “décima parte deaɗai basii pakarãɗebena oejarãɗebena siɗa” (Levítico 27:32).

 Kawaɗayua sãabe deaɗai basii chi diezmo ãchi ãnimaraɗebena, chi israelitarãba jʉrʉbachidau chi kaaɗebena 10 baburuuɗe ãnimara awara wãuri bara ɓuu corralɗebena. Chi Leyba jarabachii poyaa ochiabayu chi ãnimara saka nii biʼia ɓuu o biʼiawẽe ɓuu, mauɗe junebena ome biɗa poyaa cambiabasii. Mauɗe jãu diezmo chi nejarraba paaɗaabai basii (Levítico 27:32, 33). Mauɗe chi kaaɗebena diezmo adaubachiɗau chi fiesta año neeruuchaɗebena, jãra chi nejarraba paabachidau. Naka biʼia ãrĩã ɓoosia chi israelitarã kaitawẽe nureerã chi fiestaɗaa imibudaurã (Deuteronomio 14:25, 26).

 ¿Sakaeɗe deaɗai basaa chi diezmo israelitarãba? Joma chi añorã neebudauɗebena (Deuteronomio 14:22). Mauɗe chi año 7 baburuuɗe deaɗakabachiɗau. Mau año sabático abadau, mau añoɗe sĩubachiɗau, mauɗe chi israelitarãba ne uuɗakabasiɗau druaɗe (Levítico 25:4, 5). Mauɗéburu chi diezmo poyaa recogeɗaabai baɗa chi cosechaɗe. Maabea, chi año õbeaɗebena mauɗe chi año 6ɗebena jãarã 7 añoɗe, chi israelitarãba chi ome diezmo deabachidau chi nejarraswẽe nureerãmaa mauɗe levitarãmaa biɗa (Deuteronomio 14:28, 29).

 ¿Saka castigasiɗau chi paaɗawẽerã? Chi Ley mosaicaba jaraabasii castigoɗebena. Chi diezmo paabudau jãu biʼia ãrĩã ɓooɗa. Chi israelitarãba unubibachidau chi diezmo paapeɗaaɗaɗebena Dachi Akõre daaɗe, maabeeburu ãchia ʉtaa wiɗibachidau ichia bendeciyua jãka asepeɗaaɗa kakua (Deuteronomio 26:12-15). Dachi Akõre baita, chi diezmo paawẽe jãu orroaruu kĩra ɓoosii (Malaquías 3:8, 9).

 ¿Chi diezmo paayu chaarea ãrĩã ɓooɗae? Makawẽma. Dachi Akõreba jaraɗa baɗa chi puurumaa, ãchia chi diezmo paabudaubʉrã, ãrĩã bendicikuai basii mauɗe akawa neewẽe aka ɓoobayu (Malaquías 3:10). Maamina, chi deaɗawẽerã maarã biʼiwẽe wãsiɗau. Jeowabara bendecikabasii, ãchia chi diezmo deaɗaabasiiɗeeba chi sacerdoterãmaa mauɗe levitarãmaa, mauɗeeba chi ãchia trajaɗai baɗa ẽbẽrarã aiɗayua trajawẽa koɓeeɗaa (Nehemías 13:10; Malaquías 3:7).

 Jesús diaɗe biɗa, chi diezmo paabachiɗaa. Maamina, ichi biuɗakare wiɗiɗakabasiɗaa.

Jesús diaɗe

 Bibliaɗe Nuevo Testamentoɗe unubi ɓuu, Jesús nau iujãaɗe nibasiiɗe, chi israelitarã chi diezmo paa nureasiɗau. Ichia kuitaa nibasii ãchia paa ɓoosii. Maamina, chi líder religiosorã maarã baitara ara jãu jãka paaɗai ɓoosii, “chi bibuara ãrĩã ɓoosii chi Leyba jara ɓuu aseɗakabasiɗau: jipa nureaɗayu, junebenarã siɗa kĩra chuburiaɗayu, mauɗe chi biʼia ɓuu ɓuebayu” (Mateo 23:23).

Jesús biuɗakare

 Jesús biusiiɗe mamabera obligaɗaabasii chi diezmo deayua. Chi Jesús biusiiba, chi Ley mosaicaba jaraɗa baɗa kĩra aseyua nesitawẽe, “ara maka chi diezmo wiɗiyuɗebena” (Hebreos 7:5, 18; Efesios 2:13-15; Colosenses 2:13, 14).