Chi warrarãba biʼia ochia uabaraaɗai ãchi akõrerãmaa. Bibliaba jara ɓuu ãchia congregacionɗe traja kʉ̃ria panuubʉrã, ãchia naa biʼia ochia uaɗai ãchi deɗabena mauɗe biʼia trata uaɗai, ¿sakayua? Jãu biʼia ɓuu Jeowa baita (1 Timoteo 5:4). Akõrerã respetabudauɗe Bibliaba jara ɓuu kĩra asebadau (Efesios 6:2, 3).

 Bibliaba ãrĩã jarawẽmina saka trata uaɗai akõrerã chõrapeɗaaɗa baɗa, ichia jara ɓuura ẽbẽraba saka trata uasiɗau ãchi akõrerã yataɗeeɗa. Ichia biɗa jara ɓuu saka cuidaɗai ɓua chi akõrerã dawaraurã kirureerã.

•  ¿Yataɗeeɗa saka cuidasiɗaa ẽbẽrarãba ãchi akõrerã dawaraurã?

•  ¿Kãare jara ɓua Bibliaba?

•  ¿Bibliaba jara ɓubaaka warrarãba ochia ua keraabaraaɗai ãchi akõrerã ãchi deemaa?

 Ãchia aɓaaɓaa diwarau asesiɗaa ãchi akõrerã ome.

•   José akõre chõra bawasiiɗe ichi kaitawẽe ɓoosia, mauɗeeba José berekasii ichi ome ara kaita nibai baita. Ichia kobiapeɗa biʼia ɓeebisii (Génesis 45:9-11; 47:11, 12).

•   Rut ichi pakõre puuruɗaa wãpeɗa ãrĩã trajasii ichi biʼia ochiai baita (Rut 1:16; 2:2, 17, 18, 23).

•   Jesús biui naeɗe berekasii junebenaba ichi dana ochia keraai baita, ichi pẽdrãa nibasiiɗeeba (Juan 19:26, 27). a

 Akõrerã dawarau kirureerã cuidai baita chaarea ãrĩã ɓuu. Bibliaba beɗea biʼia deabaria.

•   Respeta keraaba bichi akõrerã.

   Bibliaba jara ɓua: “Respeta keraaba bichi akõre dana baare” (Éxodo 20:12).

   Saka aseɗai ɓua: Berekas bichi akõrerãba maucha ase kãrii ãchia naeɗe aseɗa baɗa kĩra, mauɗe wiɗichas bichia saka aiɗai ɓua. Isa kĩrukaraarã́ba ãchi ome respeto iɗaa trata ua keraaba.

•   Biʼia kʉ̃risiapeɗa isa perdonábaɗa.

   Bibliaba jara ɓua: “Ẽbẽra biʼia kʉ̃risiaruuba isa kĩrukaa, maabea mipitaa unu ɓua ichi miadaa wauɗa baɗa ida ɓuiruu” (Proverbios 19:11).

   Saka aseɗai ɓua: Bichi akõrerãba atua jara panuubʉrã maebʉrã biʼia kʉ̃risiawẽebʉrã chi bichia ase ɓuuɗebena, nauɗe kʉ̃risiaba: “¿Mʉa ãrĩã poyaa asewẽebʉrã mʉ saka senti ɓobaama?” Jãu chaarea ɓuu, kʉ̃risiaba ãchi saka sentibadaa mauɗe perdona keraaba, jãu aseeruuba chaareawẽebayua.

•   Arikʉɗe kawaba.

   Bibliaba jara ɓua: “Ara dachirãɗe berreaɗawẽeɗe, chi aseyu kʉ̃risia uru koɓooɗa baɗa aseɗakaa, maamina consejorã ũribudauɗe, dachia asei kʉ̃risia koɓooɗa baɗa biʼia asebaria” (Proverbios 15:22).

   Saka aseɗai ɓua: Kawaba, ¿kãare asei ɓua bichi akõrerã enfermabudauɗe? Jʉrʉba saka aiɗai ɓua bichi ɓoobariimare. Junebena ãchi akõrerã dawaraurã duanuurã ome berreaba. Bichi ãbarã ome berrease, saka cuidaɗai ɓua machi akõrerã ʉ̃rʉbena mauɗe saka jomaurãba aiɗaɗai ɓua

•   Chi bichia asei ɓuu ãyaa aserã́ba.

   Bibliaba jara ɓua: “Chi barikia niiɗebena biʼia kʉ̃risiabibadaa” (Proverbios 11:2).

   Saka aseɗai ɓua: Kʉ̃risiaba, ¿kãare asei ɓua? Capaz nureaɗawẽe nejoma aseɗai dachi akõrerã baita. Bichi akõrerã dawarau kirureerã aude aiɗai nesta panuubʉrã, wiɗiba junebenamaa o maebʉrã medicorãmaa.

•   Bichi kakua biʼia nibayua cuidas.

   Bibliaba jara ɓua: “Wãʼãe aɓa ichi kakua iadaa ãrĩã ɓoobarii, bari kʉ̃riapeɗa cuida inibapeɗa mau dauchia neɗea inibabaria” (Efesios 5:29).

   Saka aseɗai ɓua: Bichi akõre dawarau kirureerã ochiabaraimina, bichi kakua biʼia nibayua cuidabaraai; bichi kima baara niibʉrã, ichimaa mauɗe warrarãmaa ochia keraabaraai. Biʼia kaĩnopeɗa koɓoos (Eclesiastés 4:6). Jãu aseeruuba, biʼia ochia ua ɓooyua bichi akõrerã dawarau kirureerã.

 Bibliaba jãu ʉ̃rʉbena ãrĩã jarawẽe. Chi ɓeeba chi akõrerã deeɗe ɓuibadaa jãma koɓeei baita, o maebʉrã kʉ̃risiaɗai ɓua chi akõrerã duanaɗai ɓuu chi medicorã biʼia ochiabudauɗe. Joma deɗabena berreaɗai ɓua kawaɗai baita kãare aude biʼia ɓua jomaurã baita (Gálatas 6:4, 5).