Ɓiɗĩika itua dosiɗarã pekao ɓuuwẽe. Vino rekalo kĩraka ɓuu, jãu doburuuba kĩrajʉʉbibarii (Salmo 104:14, 15; Eclesiastés 3:13; 9:7). Bibliaba jara ɓuu chi vino ʉrmidia kĩraka ɓuu dachi kakua baita (1 Timoteo 5:23).

 Jesús iujãa nibasiiɗe vino dosii (Mateo 26:29; Lucas 7:34). Chi ẽbẽra kimabaraasiɗau wãsiiɗe ichia Dachi Akõre jauriɗeeba chi bania vinoɗe wauɗa baɗa, naka asepeɗa maarãmaa aiɗa kʉ̃ria ɓoosiiɗeeba (Juan 2:1-10).

Itua ãrĩã dobadaa biʼiwẽe dachi baita

 Bibliaba vino doyu biʼia ɓuu jara ɓumina, ãrĩã dosiɗarã biʼiwẽe ɓuu jara ɓua. Chi Jeowa baara ãdabarii niiba vino do kʉ̃ria ɓuubʉrã ãrĩã doobayu (1 Timoteo 3:8; Tito 2:2, 3). Naka jara ɓuu chi Bibliaba sakayua vino ãrĩã doɗaabai ɓuu:

•   Itua ãrĩã doburuuba biʼia kʉ̃risiabikau (Proverbios 23:29-35). Ẽbẽra ãrĩã itua do ɓuubʉrã nau beɗea Bibliaɗebena poyaa aseebai “machi kakua deaɗayua kĩrabara regalo chokae ɓuu kĩra, jayoaswãe ɓoi mauɗe Dachi Akõremaa bustayua; jãkaburu Dachi Akõre baita trajaɗai bari chi biʼia ɓuudu kʉ̃risiaɗai” (Romanos 12:1).

•   Biʼia asebiyu kʉ̃riabikau mauɗe “ida ɓubibaria dachi biʼia asei nibaɗa” (Oseas 4:11; Efesios 5:18).

•   Chi itua doburuuba chi nejarraswẽa ɓeebipeɗa mauɗe dachi kakua siɗa biʼia nibabikau (Proverbios 23:21, 31, 32).

•   Dachi Akõreba iadaa itua biuɗayua mauɗe ãrĩã doi siɗa (Proverbios 23:20; Gálatas 5:19-21).

¿Sãabe doɗai ɓua?

 Itua doburuuɗe mʉ kakua biʼiwẽe senti ɓuubʉrã mauɗe junebenarã ome problema baraa ɓuubʉrã, makarã itua ãrĩã dosii. Bibliaba jara ɓuu itua ãrĩã doburuuɗe jeeɗa bari ɓeepeɗa, biʼiwẽe tʉabi bapeɗa, biʼiwẽe beɗeapeɗa, jipa ãda niiwẽe mauɗe junebenarã ome biɗa problema aseburuu (Job 12:25; Salmo 107:27; Proverbios 23:29, 30, 33). Ẽbẽra itua ãrĩã do ɓuubʉrã biʼiwẽe kʉ̃risia ɓeepeɗa mauɗe problemarã ãrĩã baraayua (Lucas 21:34, 35).

¿Sakaeɗe itua doobai ɓuu?

 Bibliaba jara ɓuu sakaeɗe chi cristiano niiba itua poyaa doobai:

•   Bichi ãba drubimaaba (Romanos 14:21).

•   Bichi vivi niimare chi itua doobai jara ɓuubʉrã (Romanos 13:1).

•   Bichia itua do kʉ̃ria nibasiibʉrã jãu ara du aɓa kʉ̃risiapeɗa ida ɓusii. Bichia ãrĩãburu itua do kʉ̃ria ɓuubʉrã akawa doobai (Mateo 5:29, 30).