Bibliaba jara ɓuu “Dachi Akõre Warrbʉ” (Juan 1:49, Biblia Chamí, WPS.). Chi beɗea “Dachi Akõre Warrbʉ” a ɓuuba jara ɓuu chi Dachi Akõreburu joma wauɗa baɗa maabea ichiaburu dachirã ʉ̃yababi ɓuu, ara jãuba jara kʉ̃ria ɓuu ichia Jesús wauɗa baɗa (Salmo 36:9; Apocalipsis 4:11). Bibliaba jarawẽe Dachi Akõre jari dachi akõrerã wãwarã deabadau kĩra nii.

 Biblia biɗa jara ɓua chi angelerã jãarã siɗa “Dachi Akõre ariɗe nii warrarãbʉ” (Job 1:6). Maubapeɗa, jaradea ɓua Adán, “Dachi Akõre warr basii” (Lucas 3:38, Biblia Chamí, WPS). Maka ɓumina Bibliaba jara ɓua Jesús chi Warr aude importante nii, ichia chi naa wauɗa bẽrã, mauɗe chi aɓa jãdu ichi juaba wauɗa bẽrã.

•  Jesús ẽbẽra kĩra nacei naeɗe, ¿ɓoosee ʉtʉ bajãaɗe?

•  ¿Kãare ase ɓoosaa Jesusba ʉtʉ bajãaɗe chi iujãaɗaa neei naeɗe?

 Maka. Ichi ẽbẽra kĩra nacei naeɗe, Jesús jauri kĩra ɓoosia ʉtʉ bajãaɗe. Ara ichia jaraɗa basia ichi “bajãaɗeeba neeɗa” (Juan 6:38; 8:23).

 Jesusdu Dachi Akõreba naa wauɗa basia. Bibliaba Jesusɗebena jara ɓua:

•   “Ichidu Dachi Akõreba naa wauɗa baɗa” (Colosenses 1:15).

•   Ichidu “chi naa kuɓuu Dachi Akõreba wauɗaɗebena” (Apocalipsis 3:14).

 Jesusba cumpliɗa basia chi profecía ẽbẽra naeɗeeɗa niiɗebena (Miqueas 5:2; Mateo 2:4-6).

 Ichi cargo biʼia ɓuu ʉtʉ bajãaɗe ira ɓoosia. Jesusba nau jara ɓoosia ichia Dachi Akõreɗebena jarasiiɗe: “Mʉɗeeba Chacha, mʉ bichi daaɗe chi mechiu ɓuse bichi ome nau iujãaɗe waui naeɗe maka nibaɗa kĩra.” (Juan 17:5, Biblia Chamí, WPS.).

 Jesusba Dachi Akõre aiɗa ɓoosii ne joma waukai baita. Jesús Dachi Akõre ome trajaɗa basia “kĩrabara chi kuitaa ɓuu kĩra waui baita” (Proverbios 8:30). Bibliaba Jesusɗebena jara ɓua: “Ichiɗeeba Dachi Akõreba ne joma wausii. Bajãaɗe nuree, nau druaɗe nuree […]” (Colosenses 1:16, Biblia Chamí, WPS.).

 Dachi Akõreba joma waukaɗa basia Jesusɗeeba baraurã, chi angelerã mauɗe joma universoɗeeɗa (Apocalipsis 5:11). Dachi Akõre Jesús ome trajasiɗau jari arquitecto mauɗe chi waukabarii ome trajabadau kĩra. Arquitectoba kʉ̃risiabaria saka aseyu mauɗe chi constructorba joma waukabaria.

 Ichi chi Beɗea basia. Bibliaba Jesusɗebena beɗeaburuu ichi iujãaɗaa neei naeɗebena, “Chi Beɗea” trʉ̃abaria (Juan 1:1). Nauba jara kʉ̃ria ɓuu Dachi Akõreba ichi Warr adauɗa basii ichia jarayua chi waabenarã jaurirã baraumaa kãare aseɗaiɗebena.

 Jesús siɗa chi Dachi Akõre ichiɗeeba ẽbẽrarãmaa beɗeabarii basiika ɓuu. Jeowa Jesusɗeeba beɗeaɗa basiika ɓuu, ichia jarasiiɗe Adán Eva omeerãba kãare aseɗaabayu iujãa mipitaa kiruu Edén abadauɗe (Génesis 2:16, 17). Jesusdu chi ángel basii kĩra ɓua chi israelitarã uaɗoɗa baɗa ãchia chi iujãa põesãa ɓuuɗe ãdamaa panuuɗe mauɗe ichi beɗea basii kĩra ɓuu ũri panasii kauwa ũriɗayua (Éxodo 23:20-23). a