Chi Jauri Dachi Akõreɗe mau ichi poder, ichia adaubarii joma aseyua (Miqueas 3:8; Lucas 1:35). Dachi Akõre ichi Jauri bʉebariiɗe aɓabena lukarɗaa, mau aseyua ichia ase kʉ̃ria kuɓuu (Salmo 104:30; 139:7).

 Bibliaba jara ɓuuɗe chi “jauri” mau chi beɗea rúaj (hebreo beɗeaɗe) mauɗe pnéuma (griego beɗeaɗe). Naarã beɗearã jara kʉ̃ria panuu chi poder Dachi Akõreɗe joma aseyua, mau ichi Jauri (Génesis 1:2). Maamina, nau siɗa jara kʉ̃ria ɓuu:

•   Chi ʉ̃yaba (Habacuc 2:19; Apocalipsis 13:15).

•   Chi pua kuɓuu (Génesis 8:1; Juan 3:8).

•   Mau chi puersa deabarii ẽbẽrarãmaa mauɗe animararãmaa chokae nureabiyua (Job 34:14, 15).

•   Saka nibapeɗa kʉ̃risia nii chi ẽbẽraba (Números 14:24).

•   Chi dachia unuɗakau jari Dachi Akõre mauɗe angelerã kĩraka (1 Reyes 22:21; Juan 4:24).

 Cha naarã beɗearã araɓau duanuu, naarã ẽbẽrarãba unuɗaabai ɓuu maka ɓuumina unu panuu chi maarãba asebi panuu. Chi Dachi Akõre Jauri, “ara jari chi pua ɓuu chaarea ɓuu kĩra poyaa unuɗaabai” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Bibliaɗe jara ɓuu Dachi Akõre Jauri araɓau chi “jua” maebʉrã chi “jua jomiɗirã” kĩra Dachi Akõreɗe (Salmo 8:3; 19:1; Lucas 11:20; jãu siɗa leas Mateo 12:28). Ara jãka chi artesano ichi juaba waukabarii ɓuu kĩra trajai baita, ara mau kĩraka makarã, Dachi Akõreba ichi Jauriɗeeba naka ɓeerã aseɗabaɗa:

•   Chi universo wauyua (Salmo 33:6; Isaías 66:1, 2).

•   Chi Biblia ɓʉbiyua (2 Pedro 1:20, 21).

•   Chi ichi baita traja nureerã yataɗeeɗabena milakro asebiɗapeɗa jaradeabiɗai baita (Lucas 4:18; Hechos 1:8; 1 Corintios 12:4-11).

•   Chi ẽbẽrarã ũri nureerã chi biʼia ɓuu asebiɗayua (Gálatas 5:22, 23).

Chi Dachi Akõre Jauri ẽbẽra kĩrawẽma

 Jaraburuuɗe chi Dachi Akõre Jauri chi “jua” mauɗe “jua jomiɗirã” maebʉrã chi ʉ̃yabarii Dachi Akõreɗebena, chi Bibliaba unubi ɓuu chi jauri mau ẽbẽrawẽa (Éxodo 15:8, 10). Chi juarã artesanoɗe du aɓa trajaɗaabai ɓuu, bari ãchi traja panuu boromorɗeeba mauɗe kakuaɗeeba. Ara mau kĩraka, chi Jauriba Dachi Akõreɗe asebarii chi ichia jaradeaburuu kĩra (Lucas 11:13). Maubapeɗa, chi Bibliaba jara ɓuu chi Dachi Akõre Jauri bania kĩra ɓuu mauɗe ara jãka chi fe mauɗe chi kawa ɓuu. Cha nauba jara kuɓuu kĩra chi Dachi Akõre Jauri mau ẽbẽra kĩrawẽa (Isaías 44:3; Hechos 6:5; 2 Corintios 6:6).

 Bariara chi Bibliaba jara ɓuu chi Dachi Akõre trʉ̃ Jeowa mauɗe ichi warr, Jesucristo, chi Dachi Akõre Jauri trʉ̃ ɓuuwẽa (Isaías 42:8; Lucas 1:31). Mauɗe Estebanba unusii Dachi Akõre Jeowaba unubisii ʉtʉ bajãaɗe, mau omeburu unusii õbeawẽa. Chi Bibliaba jara ɓuu: “Maka panuuɗe Esteban Dachi Akõre Jauriɗeeba ɓuasii. Bajãaɗaa ichiaruuɗe Dachi Akõre kĩrawãrea teɗechoa mauɗe Jesús Dachi Akõre jua biare akʉ nuɓuu unusii. (Hechos 7:55 Biblia Chamí, WPS). Chi Dachi Akõre Jauri chi poder Dachi Akõreɗe unubisii Estebanmaa ichia unubii kʉ̃riasiiɗe.

 Chi nureeba ãyaa jarabadau: Chi Dachi Akõre Jauri ẽbẽra kĩra nia mauɗe nau Trinidad abadau ɓuuɗe. Naka jara ɓua 1 Juan 5:7, 8ba chi diwara Bibliarãɗe ara jãka Dachi Akõre Beɗea Karta chi beɗea chiwiɗi deaɗa ũrʉbena.

 Chi ariɗe ɓuu: Chi Biblia Dachi Akõre Beɗea Karta chi beɗea chiwiɗi deaɗa ũrʉbena abadauba jara ɓuu 1 Juan 5:7, 8: “Mauɗe bajãaɗe õbea panuuba mau biawãra araɓauɗe jara panuu; Dachi Bajãaɗebena Akõreba maka jara ɓuu, chi «Beɗea» abadauba maka jara ɓuu mauɗe ichi Jauriba maka jara ɓuu. Mau õbea panuu aɓaburubʉ. Mau õbea jara panuuba araɓauɗe kuitaabi panuu.” Maamina chi investigadornaba unusiɗau chi apóstol Juanba ɓʉwẽbasii naarã beɗearã mauɗeeba poyaa kuɓuuwẽ Bibliaɗe. Chi Bibliaɗebena kawa nii Bruce M. Metzgerba jarasii: “Jãarã beɗearã warãbenawẽ mau chi Bibliaɗe ɓʉ koɓeewãe” (Ara jãka beɗeabarima chi nuevo testamento griego beɗeaɗe).

 Chi nureeba ãyaa jarabadau: Chi Bibliaba jara ɓuu chi Dachi Akõre Jauri ẽbẽra kĩraka nii.

 Chi ariɗe ɓuu: Bibliaba jara ɓuuɗe Dachi Akõre Jauri ʉ̃rʉbena ẽbẽra kĩra nii jara ɓuu. Jesusba jarasii chi Dachi Akõre Jauri jãuba chi “aiɗabarii” kĩra ɓuu (paráclito abadau), ichia unubipeɗa, aiɗapeɗa, ũripeɗa, jaradeapeɗa, biʼia jarapeɗa ichi ʉ̃rʉbena maabea adaui basii ichiɗebena (Juan 16:7-15). Maka ɓuumina, jãuba jarawẽ mau ẽbẽra kĩraka nii. Chi Bibliaba jara ɓuu chi kawa kʉ̃risia nii, chi biuburuu, mauɗe chi pekao naarãba ẽbẽra kĩra ase nuree (Proverbios 1:20; Romanos 5:17, 21). Jari jara ɓuu, chi kawa kʉ̃risia nii traja ɓuu mauɗe warrarã bara ɓuu, mauɗe chi pekao ẽbẽra kũrũabarii nii kĩra ɓuu, chi ãrĩã bara kʉ̃ria nii, mauɗe chi beabarii kĩra (Mateo 11:19; Lucas 7:35; Romanos 7:8, 11).

 Chi nureeba ãyaa jarabadau: Ẽbẽra bautisaruuɗe mau asebarii Dachi Akõre Jauri trʉ̃ɗeeba, mauɗeeba Dachi Akõre Jauri ẽbẽra kĩra ɓuma.

 Chi ariɗe ɓuu: “Trʉ̃ɗeeba aɓuuɗe” jara kʉ̃ria ɓuu ẽbẽraba ase nii waabenaba ida bʉi ɓuuɗeeba (Deuteronomio 18:5, 19-22; Ester 8:10). Ẽbẽraba bautisa niiɗe Dachi Akõre Jauri trʉ̃ɗeeba ichia kawa ɓuu mau Jauri ãrĩã poder bara ɓuu mauɗe Jeowaɗebenadu nee ɓua (Mateo 28:19).

 Chi nureeba ãyaa jarabadau: Chi naeɗebena Jesús kaaɗe ãda nureerãba mauɗe chi apostolerã biɗa, ijãasiɗaa chi Dachi Akõre Jauri ẽbẽra kĩraka nia.

 Chi ariɗe ɓuu: Mau ni chi Biblia ni chi historia jaradeaɗakau. Chi Encyclopædia Britannica jaraɓuuɗe: “Dachi Akõre Jauri ẽbẽra kĩraka nii ʉtʉbena, ara jãka chi ɓeeba ijãa nuree, kawa koɓeesii 200 años chi apostolerã biupeɗaaɗakare, reunión Concilio de Constantinopla abadau asesiiɗe año 381ɗe Jesús kaaɗe.