Bibliaba jara ɓuuɗe anástasis a ɓuu griego beɗeaɗe, biupeɗaaɗarã waya piradruɗaiɗebena jara ɓuu, jãu jeeɗabena waya piradruburuu. Biuɗa baɗa waya piradruburuuɗe, chi kʉ̃risia mauɗe ara ichi nibaɗa kĩra ara maka piradruyua (1 Corintios 15:12, 13).

 Chi Antiguo Testamentoɗe abadau chi beɗea waya piradruɗai ʉ̃rʉbena ɓʉɗawẽe. Maka ɓumina, mamaria jara ɓuu chi ẽbẽrarã biupeɗaaɗa waya piradruɗayu. Dachi Akõreba chi profeta Oseasɗeeba jara ɓoosii chi ẽbẽrarã biuɗa baɗa, waya chokae nureabiayu (Oseas 13:14; Job 14:13-15; Isaías 26:19; Daniel 12:2, 13).

 ¿Chi ẽbẽrarã biupeɗaaɗa baɗa sama piradruɗayu? Chi nuree ẽbẽrarã ʉtʉ bajãaɗe piradruɗayu rey baɗapeɗa Jesús baara gobernaɗayua (2 Corintios 5:1; Apocalipsis 5:9, 10). Bibliaba jara ɓuu “naa chokae jiradubiaruu” (Apocalipsis 20:6, Biblia Chamí, WPS.; Filipenses 3:11). Nauba kawabi ɓuu chi piradruɗayuɗebena ome bayua. Chi Bibliaba jara ɓuu ãrĩã ẽbẽrarã chi piradruɗayu omeɗebenaɗe nau iujãaɗe nureaɗayua (Salmo 37:29).

 ¿Ẽbẽrarã biupeɗaaɗa baɗa waya piradrubudauɗe saka nureaɗai ɓua? Dachi Akõreba Jesusmaa idaarabiɗa biupeɗaaɗa baɗa waya piradrubiɗai baita (Juan 11:25). Jesusba Dachi Akõre poderɗeeba “joma ʉaɗe duanuu acordaɗayua”, waya piradrubiaburuuɗe ãchi kʉ̃risia mauɗe joma ara jãka niidu piradrubiyu (Juan 5:28, 29). Chi nama iujãaɗe piradrubudaurã chi kakua biʼia ẽpermaɗawẽa nureaɗayu (Isaías 33:24; 35:5, 6). Chi piradrubudaurã bajãaɗe nibaɗayua chi kakua angelerã kĩraka nureaɗayu (1 Corintios 15:42-44, 50).

 ¿Kairãba waya piradruɗayu? Bibliaba jara ɓuu nau iujãaɗe “chi biupeɗaaɗarã waya piradrukuayua, ẽbẽrarã ichi beɗea ũripeɗaaɗa mauɗe ichi beɗea aduabaɗa siɗa” (Hechos 24:15). Noé, Abrahán, Sara mauɗe maucha ãrĩã́turu nureaɗa Dachi Akõre beɗea ũripeɗaaɗa waya piradruɗayu (Génesis 6:9; Hebreos 11:11; Santiago 2:21). Mauɗe ẽbẽrarã ãrĩãba Dachi Akõre beɗea adua nureapeɗaaɗa baɗa siɗa piradruɗayua.

 Chi nureeba Dachi Akõre beɗea ũriɗakaurã, ãchi ne kachiruáturu ase nureerã, akawa piradruɗaabai. Ãchi biubudauɗe waya piradruɗaabayua (Mateo 23:33; Hebreos 10:26, 27).

 ¿Sakaeɗe ẽbẽrarã biupeɗaaɗa baɗa waya piradruɗaiba? Bibliaba jaraɗa baɗa 1914ɗe Jesús bajãaɗe goberna koɓeesiiɗeeɗa biupeɗaaɗa bajãaɗe piradruɗayu (1 Corintios 15:21-23). Jesusba Mil Años Gobernaburuuɗe nau iujãaɗe ẽbẽrarã biupeɗaaɗarã waya piradruɗayu, mauɗe nau iujãa kĩrawãrea ãrĩã ɓeeyu (Lucas 23:43; Apocalipsis 20:6, 12, 13).

 ¿Chi biupeɗaaɗa baɗa waya piradruɗai ɓubaaka? Maka ɓuma. Chi Bibliaba jara ɓuu 9 ẽbẽrarã piradrusiɗauɗebena, maarã piradrubisiɗau junebenarã daaɗe (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Lázaro 4 días ba ɓoosia biuɗa baɗa, Jesusba piradrubisii ẽbẽrarã ãrĩã daaɗe (Juan 11:39, 42). Jesús iadaa nureasiɗaurãba kuitaa duanasii Lázaro biuɗa baɗa mauɗe Jesusba piradrubisiiɗe ãchia Jesús beaɗa kʉ̃riaɗapeɗa mauɗe Lázaro siɗa (Juan 11:47, 53; 12:9-11).

 Chi Bibliaba jara ɓuu Dachi Akõre ãrĩã meserãa niiɗeeba ẽbẽrarã biupeɗaaɗa baɗa waya piradrubiyua. Dachi Akõreba olvidakau bẽrã, kuitaa nii saka nurea dachi ẽbẽra (Job 37:23; Mateo 10:30; Lucas 20:37, 38). Ichia ẽbẽrarã biupeɗaaɗa baɗa nau iujãaɗe piradrubii kʉ̃ria ɓuu. Mauɗeeba Bibliaba naka jara ɓuu: “Kʉ̃riayua waya unuyu bichi juaɗeeba wauɗa” (Job 14:15). Bibliaba jara ɓuu kĩra Dachi Akõreba ariɗe waya unu kʉ̃ria ɓuu chi biu keɗeemaa.

Chi ãyaa kʉ̃risia duanuu waabenarã ẽbẽrarãba chi ẽbẽrarã biupeɗaaɗa baɗa waya piradruɗai ʉ̃rʉbena

 Chi nureeba ãyaa jarabadau: Ẽbẽra biuɗa baɗa piradruburuuɗe, ichi alma awara wãɗa baɗa, ichi kakuaɗaa waya neeruu.

 Chi ariɗe ɓuu: Chi Bibliaba jara ɓuu chi beɗea alma ara chi ẽbẽra níturu; mau dachi biuɗakare kakuaɗebena awara nibaɗe wãabai (Génesis 2:7; Ezequiel 18:4). Ẽbẽrarã waya piradrubudauɗe, ãchi biui naeɗe nibaɗa, ara jãka Dachi Akõreba waya waukayua.

 Chi nureeba ãyaa jarabadau: Chi biupeɗaaɗa baɗa waya piradrubudauɗe ara nakʉɗe Dachi Akõreba beakuatayu.

 Chi ariɗe ɓuu: Bibliaba jara ɓuu chi ẽbẽrarã waya piradruɗapeɗa “chi kachirua asepeɗaaɗarã biuɗayua” (Juan 5:29). Biuɗa baɗa piradrupeɗa nibaɗe wãburuuɗe waya chi kachirua ɓuu ase nibaɗe aseburuubʉrã, maebʉrã chi biʼia ɓuu ase nibaɗe wãburuubʉrã juicio aseɗayu, bari juicio aseɗaabayu biui naeɗe ase nibaɗa. Jesusba naka jara ɓoosii: “Biuɗa kĩra nureeba mʉ, Dachi Akõre Warr beɗea ũriɗai. Chi mʉʉɗe ijãaduu chokae panaɗai” (Juan 5:25, Biblia Chamí, WPS.). Chi Jesusba jaraɗa baɗa ẽbẽrarã piradrubudauɗe ũribudaubʉrã, “kartaɗe ẽbẽrarã ewaricha chokae nureaɗai” ãchi trʉ̃rã ɓʉ koɓeeɗayu (Apocalipsis 20:12, 13, Biblia Chamí, WPS.).

 Chi nureeba ãyaa jarabadau: Chi biupeɗaaɗa baɗa waya piradrubudauɗe ara ãchi kakua chi nureapeɗaaɗa baɗáturu deatayu.

 Chi ariɗe ɓuu: Ẽbẽra biuɗakare, ãchi kakua ɓeraapeɗa ioro babarii (Eclesiastés 3:19, 20).